Roma

11 Entaun haʼu husu: Neʼe katak Maromak la simu ona ninia povu ka?+ Lae duni! Tanba haʼu mós ema Izraél ida, Abraão nia bei-oan, husi suku Benjamim. 2 Maromak la husik ninia povu neʼebé uluk nia hili.+ Imi hatene ka lae buat neʼebé eskritura dehan kona-ba Elias bainhira nia koʼalia ho Maromak atu kontra ema Izraél? 3 “Jeová,* sira oho ona Ita-nia profeta sira, no sira sobu tiha Ita-nia altár, no haʼu mesak mak hela, no agora sira buka daudaun atu oho haʼu.”*+ 4 Maibé saida mak Maromak hatán ba nia? “Haʼu sei iha mane naʼin-7.000 neʼebé la hakneʼak ba Baal.”+ 5 Entaun, agora mós sei iha ema Izraél restu+ neʼebé Maromak hili ona tuir ninia laran-diʼak neʼebé boot. 6 Nia hili sira tanba ninia laran-diʼak neʼebé boot,+ laʼós tanba buat neʼebé sira halo.+ Se lae karik, ninia laran-diʼak neʼe laʼós tan nuʼudar laran-diʼak neʼebé boot.

7 Entaun, ita sei dehan saida? Ema Izraél la hetan buat neʼebé sira buka namanas, maibé sira neʼebé Maromak hili ona mak hetan ida-neʼe.+ Sira seluk lakohi rona,+ 8 hanesan hakerek nanis ona: “Maromak halo sira toba-dukur loos,+ sira-nia matan labele haree no sira-nia tilun labele rona toʼo ohin loron.”+ 9 No mós David dehan: “Halo sira-nia meza* rasik sai hanesan rede ida, lasu ida, fatuk sidi nian ida no kastigu ida ba sira. 10 Halo sira-nia matan sai nakukun atu sira labele haree, no sira lori nafatin naha todan iha sira-nia kotuk.”+

11 Entaun haʼu husu: Neʼe katak sira sidi no monu toʼo labele hamriik fali ka? Lae duni! Maibé tanba sira kontra ukun-fuan, neʼe lori salvasaun ba ema husi nasaun seluk, atu halo sira sai laran-moras.+ 12 No se sira-nia hahalok kontra lori bensaun ba mundu, no se nasaun seluk bele hetan bensaun kuandu sira-nia númeru sai menus,+ entaun bainhira sira-nia númeru sai kompletu, neʼe sei lori bensaun barak liután.

13 Agora haʼu koʼalia ba imi neʼebé mai husi nasaun seluk: Haʼu mak apóstolu ba nasaun sira,+ no haʼu hafolin* haʼu-nia serbisu haklaken,+ 14 atu nuneʼe haʼu bele book haʼu-nia povu* balu atu sira sai laran-moras hodi sira balu bele hetan salvasaun. 15 Tanba se Maromak soe tiha sira,+ loke dalan ba mundu atu hadame malu ho Maromak, entaun se Maromak simu fali sira, neʼe katak sira moris fali husi mate. 16 Liután neʼe, se parte husi trigu neʼebé masa ona mak sai santu tanba neʼe mak trigu* primeiru neʼebé hasaʼe ona nuʼudar sakrifísiu, neʼe katak masa tomak neʼe mak santu. No se ai nia abut mak santu, neʼe katak ninia sanak hotu mós santu.

17 Maibé, Maromak tesi tiha ai-oliveira sanak balu, no maski imi mak ai-oliveira fuik nia sanak, nia tutan fali imi ba ai neʼe no imi mós hetan buat diʼak husi ai neʼe nia abut. 18 Neʼe duni, keta sai foti an* kona-ba sanak sira neʼebé Maromak tesi tiha ona,+ tanba laʼós imi mak apoia ai nia abut, maibé ai-abut mak apoia imi. 19 Imi sei dehan: “Maromak tesi tiha ai-sanak sira-neʼe hodi bele tutan fali haʼu ba ai-hun neʼe.”+ 20 Neʼe loos! Maromak tesi tiha sira tanba sira la iha fiar,+ maibé imi hamriik tanba imi-nia fiar.+ Tan neʼe, keta loko an, maibé kuidadu bá. 21 Tanba se Maromak la husik ai-sanak loloos atu kontinua moris, nia mós sei la husik imi atu kontinua moris se imi halo hanesan sira. 22 Tan neʼe, hanoin didiʼak kona-ba Maromak nia laran-diʼak+ no kastigu. Maromak fó kastigu ba sira neʼebé monu,+ maibé nia hatudu laran-diʼak ba imi, naran katak imi hela nafatin iha ninia laran-diʼak, se lae karik, imi mós sei tesi sai tiha. 23 Kona-ba sira, se sira hatudu fali fiar, Maromak sei tutan fali ba ai-hun,+ tanba Maromak bele tutan fali sira. 24 Tanba Maromak tesi imi husi ai-oliveira fuik no tutan imi ba ai-oliveira neʼebé moris iha toʼos, maski ida-neʼe laʼós buat neʼebé baibain. Se nuneʼe, fasil liu ba nia atu tutan fali ai-oliveira neʼe nia sanak rasik, loos ka lae?

25 Maun-alin sira, haʼu hakarak imi atu hatene segredu santu tuirmai neʼe,+ atu nuneʼe imi la sai matenek iha imi-nia matan rasik: Ema Izraél balu lakohi rona. Ida-neʼe sei kontinua toʼo númeru ba ema husi nasaun seluk nian sai kompletu ona, 26 no iha dalan neʼe mak ema Izraél hotu+ sei hetan salvasaun. Hanesan hakerek nanis ona: “Salvadór sei mai husi Siaun+ no nia sei halo Jacob nia bei-oan sira husik sira-nia hahalok aat. 27 Neʼe mak haʼu-nia aliansa ho sira,+ bainhira haʼu hamoos tiha sira-nia sala.”+ 28 Loos duni, sira sai Maromak nia inimigu tanba sira la simu liafuan diʼak, no tan neʼe imi hetan buat diʼak husi ida-neʼe. Maibé tanba promesa neʼebé Maromak halo ona ho sira-nia beiʼala, nia hadomi sira hodi hili sira balu.+ 29 Tanba Maromak sei la troka ninia hanoin kona-ba prezente neʼebé nia fó no ema neʼebé nia hili. 30 Tanba uluk imi la halo tuir Maromak,+ maibé agora nia hatudu laran-sadiʼa ba imi+ tanba ema Judeu la halo tuir.+ 31 Entaun, nia hatudu laran-sadiʼa ba imi tanba ema Judeu la halo tuir, atu nuneʼe nia mós bele hatudu laran-sadiʼa ba sira. 32 Maromak haree sira hotu hanesan ema dadur tanba sira la halo tuir,+ atu nuneʼe nia bele hatudu laran-sadiʼa ba sira hotu.+

33 Bensaun husi Maromak mak boot tebes!* Ninia matenek no koñesimentu mak kleʼan tebes! Ita-nia hanoin la toʼo atu komprende kona-ba ninia desizaun no ita labele hatene ninia dalan hotu! 34 Tanba hakerek nanis ona: “Sé mak hatene Jeová* nia hanoin sira, ka sé mak bele sai ninia konsellu-naʼin?”+ 35 Ka, “Sé mak fó uluk buat ruma ba Maromak, hodi nuneʼe Maromak tenke selu fali ba nia?”+ 36 Tanba buat hotu mai husi nia, no sira iha liuhusi nia no tanba ninia hakarak. Fó glória nafatin ba nia. Amen.