Isaias
63 Ida neʼebé mai daudaun husi Edom,+
Neʼebé mai husi Bozra+ ho roupa neʼebé kór moris,*
Neʼebé hatais roupa furak,
No marxa ho kbiit boot, nia neʼe sé?
“Neʼe mak haʼu, neʼebé koʼalia hodi tuir buat neʼebé loos,
No iha kbiit boot atu fó salvasaun.”
2 Tanbasá mak Ita-nia roupa mean?
Tanbasá mak Ita-nia roupa hanesan deʼit ho sira neʼebé sama uvas-fuan?+
3 “Haʼu mesak mak sama ona uvas-fuan iha fatin halo tua-uvas nian.
La iha ema ida husi povu sira mak hamutuk ho haʼu.
Haʼu kontinua sama sira ho hirus,
No haʼu kontinua sama sira ho haʼu-nia laran-nakali.+
Sira-nia raan kona haʼu-nia roupa,
No haʼu-nia roupa hotu iha ona noda.
4 Haʼu deside ona loron atu selu fali,+
No tinan neʼebé haʼu atu sosa fali haʼu-nia povu toʼo ona mai.
5 Haʼu hateke, maibé la iha ema ida atu ajuda haʼu;
Haʼu la kontente tanba la iha ema ida apoia haʼu.
6 Haʼu sama tiha povu sira ho hirus,
Haʼu halo sira lanu ho haʼu-nia laran-nakali+
No haʼu fakar sai sira-nia raan ba rai.”
7 Haʼu sei fó sai Jeová nia hahalok domin neʼebé laran-metin,
Jeová nia hahalok neʼebé merese atu hahiʼi,
Tanba buat hotu neʼebé Jeová halo ona ba ita,+
Nia halo ona buat diʼak barak ba umakain Izraél,
Hodi tuir ninia laran-sadiʼa no ninia domin boot ho laran-metin.
8 Tanba nia dehan: “Loloos sira mak haʼu-nia povu duni, oan-mane sira neʼebé sei laran-metin ba haʼu.”*+
Tan neʼe mak nia sai sira-nia Salvadór.+
9 Durante sira-nia susar hotu, nia mós sente neon-susar.+
No ninia atan rasik neʼebé lori ninia mensajen* mak salva sira.+
Ho ninia domin no laran-sadiʼa mak nia sosa fali sira,+
No iha tempu neʼebá nia foti sira no lori sira loroloron.+
10 Maibé sira kontra+ no halo triste ninia espíritu santu.+
11 No sira hanoin-hetan fali tempu uluk,
Sira hanoin fali ninia atan Moisés nia tempu, hodi dehan:
“Maromak neʼebé lori sira sai husi tasi+ hamutuk ho ninia povu nia bibi-atan sira, nia iha neʼebé?+
Maromak neʼebé tau nia espíritu santu ba Moisés,* nia iha neʼebé?+
12 Maromak neʼebé fó Ninia liman neʼebé kmanek ba Moisés nia liman-loos, nia iha neʼebé?+
Maromak neʼebé fahe tasi iha sira-nia oin+
Hodi halo ninia naran rasik hela ba nafatin, nia iha neʼebé?+
13 Ida neʼebé halo sira laʼo liuhusi tasi neʼebé siʼak,*
No halo sira laʼo liu no la sidi,
Hanesan kuda iha rai-luan,* nia iha neʼebé?
14 Hanesan animál-hakiak sira laʼo tun ba rai-tetuk atu deskansa,
Jeová nia espíritu mós halo sira deskansa.”+
15 Favór ida, hateke tun husi lalehan no haree
Husi Ita-nia hela-fatin neʼebé aas, santu no kmanek.*
Ita-nia laran-manas no Ita-nia kbiit iha neʼebé?
Ita-nia laran-diʼak neʼebé kleʼan+ no laran-sadiʼa neʼebé boot iha neʼebé?+
Ita la hatudu buat sira-neʼe ba haʼu.
16 Tanba Ita mak ami-nia Aman;+
Maski Abraão la hatene ami
No Izraél la koñese ami,
Maibé oh Jeová, Ita mak ami-nia Aman.
Ita-nia naran mak Ida neʼebé Sosa Fali ami husi tempu uluk.+
17 Oh Jeová, tanbasá mak Ita husik* ami laʼo sees husi Ita-nia dalan sira?
Tanbasá mak Ita husik* ami-nia laran sai toos, hodi nuneʼe ami la hamtaʼuk Ita?+
Fila fali mai hodi ajuda ami tanba Ita-nia atan sira,
Suku sira neʼebé nuʼudar Ita-nia liman-rohan.+
18 Ita-nia povu neʼebé santu foti rai neʼe nuʼudar sira-nian ba tempu badak deʼit.
Ami-nia inimigu sama ona Ita-nia fatin sagradu.+
19 Tanba tempu kleur liu ona ami sai hanesan povu neʼebé Ita nunka ukun,
Hanesan povu neʼebé nunka lori Ita-nia naran.