Primeiru Tesalónika
4 Ikusliu maun-alin sira, ami hanorin ona imi kona-ba oinsá imi tenke halaʼo imi-nia moris hodi halo kontente Maromak,+ no tuir loloos imi halo daudaun ida-neʼe. Agora ami husu imi no fó laran-manas ba imi hodi Naʼi Jesus nia naran atu imi kontinua halo ida-neʼe diʼak liután. 2 Tanba imi hatene hanorin* sira neʼebé ami fó sai ona ba imi liuhusi Naʼi Jesus.
3 Maromak nia hakarak mak neʼe, katak imi tenke sai santu+ no hasees an husi sala seksuál.*+ 4 Imi ida-idak tenke hatene oinsá atu kontrola imi-nia isin rasik+ hodi bele santu+ nafatin no iha dignidade, 5 atu la kaan hahalok seksuál neʼebé labele kontrola+ hanesan ema husi nasaun sira neʼebé la hatene Maromak.+ 6 Ema ida labele hakat liu fali morál neʼebé loos no aproveita ninia maun-alin sira kona-ba neʼe, tanba Jeová* fó kastigu ba hahalok sira-neʼe hotu, hanesan uluk ami fó-hatene nanis ona ba imi no mós fó avizu makaʼas ona ba imi. 7 Tanba Maromak bolu ita, laʼós atu moris ho hahalok la moos, maibé atu iha moris santu.+ 8 Tan neʼe, ema neʼebé la simu hanorin neʼe, nia la kontra ema, maibé kontra Maromak,+ neʼebé fó ninia espíritu santu ba imi.+
9 Maibé, ami la presiza hakerek ba imi kona-ba hadomi malu nuʼudar maun-alin,+ tanba Maromak rasik hanorin ona imi atu hadomi malu.+ 10 Tuir loloos, imi hatudu daudaun domin ba maun-alin hotu iha Masedónia tomak. Maibé, ami husu imi, maun-alin sira, atu kontinua halo ida-neʼe liután. 11 Hakaʼas an atu moris ho hakmatek+ no keta mete ema seluk nia moris+ no halo serbisu ho imi-nia liman,+ hanesan ami hanorin ona ba imi, 12 atu nuneʼe imi bele halaʼo imi-nia moris ho didiʼak iha ema seluk*+ nia oin no la presiza buat ida.
13 Liután neʼe, maun-alin sira, ami hakarak atu imi hatene ho loloos kona-ba sira neʼebé mate* ona,+ atu nuneʼe imi labele triste hanesan ema seluk neʼebé la iha esperansa.+ 14 Tanba se ita fiar katak Jesus mate no moris hiʼas fali ona,+ entaun, ita mós fiar katak Maromak sei halibur sira neʼebé mate* ona liuhusi Jesus, hodi nuneʼe sira sei hamutuk ho Jesus.+ 15 Tanba ida-neʼe mak ami fó-hatene ba imi tuir Jeová* nia liafuan, katak ita neʼebé moris hela iha tempu neʼebé Naʼi toʼo ona mai,* ita sei la saʼe ba lalehan uluk liu fali sira neʼebé mate* ona, 16 tanba Naʼi rasik sei tun husi lalehan no nia sei fó mandamentu ho arkanju+ nia lian no ho Maromak nia trombeta, no sira neʼebé mate ona ho laran-metin ba* Kristu, sei moris hiʼas uluk.+ 17 Depois neʼe, ita neʼebé moris hela, sei saʼe bá iha kalohan laran+ hamutuk ho sira atu hasoru Naʼi+ iha leten, nuneʼe ita sei hamutuk ho Naʼi ba nafatin.+ 18 Tan neʼe, kontinua fó aten-brani ba malu ho liafuan sira-neʼe.