Salmo

5 Oh Jeová, rona ba haʼu-nia liafuan sira;+

See tilun ba haʼu-nia halerik.

 2 Oh haʼu-nia Liurai no haʼu-nia Maromak, see tilun didiʼak ba haʼu-nia halerik atu husu ajuda

Tanba haʼu harohan ba Ita.

 3 Oh Jeová, Ita sei rona haʼu-nia lian iha dadeer;+

Iha dadeer-saan haʼu sei fó sai haʼu-nia laran-taridu ba Ita+ no hein ba Ita atu hatán.

 4 Tanba Ita mak Maromak neʼebé la gosta hahalok aat;+

Ema aat labele sai Ita-nia bainaka.+

Ita odi ema hotu neʼebé halo hahalok aat;+

 6 Ita sei halakon ema sira neʼebé koʼalia bosok.+

 7 Maibé haʼu sei tama ba Ita-nia uma+ tanba Ita-nia domin boot ho laran-metin;+

Haʼu sei hakruʼuk ba Ita-nia templu santu* ho laran neʼebé hamtaʼuk Ita.+

 8 Oh Jeová, dirije haʼu iha Ita-nia dalan neʼebé loos tanba haʼu-nia inimigu sira;

Ajuda haʼu laʼo iha Ita-nia dalan hodi la sidi.+

 9 Tanba liafuan hotu husi sira-nia ibun, ema labele tau fiar;

Sira-nia laran nakonu deʼit ho buat neʼebé aat;

Sira-nia garganta hanesan rate neʼebé nakloke;

Sira-nia nanál koʼalia liafuan midar deʼit.+

10 Maibé Maromak sei fó sai katak sira mak sala;

Sira-nia planu rasik mak sei halakon sira.+

Favór ida, duni sai tiha sira tanba sira halo ona sala barak,

Tanba sira kontra hasoru Ita.

11 Maibé ema hotu neʼebé buka protesaun husi Ita sei haksolok;+

Sira sei haklalak ho haksolok nafatin.

Ita sei proteje sira,

No ema sira neʼebé hadomi Ita-nia naran sei haksolok tanba Ita.

12 Oh Jeová, Ita sei haraik bensaun ba ema hotu neʼebé laran-loos;

Ita sei hatudu laran-diʼak ba sira hanesan eskudu boot neʼebé proteje sira.+