Primeiru Krónikas
12 Tuirmai neʼe mak mane sira neʼebé bá hasoru David iha Ziklag+ bainhira nia subar hela husi Kis nia oan-mane Saul.+ Mane sira-neʼe mak asuwaʼin neʼebé apoia David iha funu.+ 2 Sira kaer rama, no sira bele uza liman-loos no liman-karuk+ atu tuda fatuk ho tali-baku*+ ka hana rama. Sira mak Saul nia maun-alin husi suku Benjamim.+ 3 Ulun-naʼin mak Ahiezer, no tuirmai mak Joas, sira naʼin-rua mak Semá husi Gibea+ nia oan-mane sira; Jeziel no Pelet, sira mak Azmavet+ nia oan-mane sira; Beraka; Jeú ema Anatot; 4 Ismaias ema Gibeão,+ nia mak asuwaʼin ida husi ulun-naʼin naʼin-30+ no nia mak sira-nia xefe; no mós Jeremias; Jaaziel; Joanan; Jozabad ema Gedera; 5 Eluzai; Jerimot; Bealias; Semarias; Sefatias ema Harif; 6 Elkana, Isias, Azarel, Joezer no Jasobeam, sira mak Kora nia bei-oan sira;+ 7 no mós Joela no Zebadias, sira mak Jeroam husi Gedor nia oan-mane sira.
8 Ema Gad balu bá apoia David iha ninia subar-fatin iha rai-fuik.+ Sira mak asuwaʼin, tropa neʼebé hetan ona treinu ba funu, no sira sempre prontu ho eskudu boot no diman, sira-nia oin hanesan leaun* no sira halai lalais hanesan bibi-rusa gazela iha foho leten. 9 Ezer mak ulun-naʼin primeiru, segundu mak Obadias, terseiru mak Eliab, 10 haat mak Mismana, lima mak Jeremias, 11 neen mak Atai, hitu mak Eliel, 12 ualu mak Joanan, sia mak Elzabad, 13 sanulu mak Jeremias, sanulu-resin-ida mak Makbanai. 14 Sira mak ema Gad,+ no ulun-naʼin ba tropa sira. Kona-ba ulun-naʼin sira-neʼe, ida neʼebé fraku bele manán tropa naʼin-100, no ida neʼebé forte bele manán tropa naʼin-1.000.+ 15 Mane sira-neʼe hakur Mota Jordaun iha fulan-primeiru bainhira bee iha mota neʼe nakonu toʼo liu mota ninin, no sira duni sai ema hotu neʼebé hela iha rai-tetuk, hodi halai namkari ba parte leste no parte oeste.
16 Mane balu husi suku Benjamim no suku Judá mós bá hasoru David iha ninia subar-fatin.+ 17 Ho ida-neʼe, David sai hodi hamriik iha sira-nia oin no dehan: “Se imi mai ho dame atu ajuda haʼu, haʼu sei simu imi nuʼudar belun. Maibé se imi mai atu entrega haʼu ba haʼu-nia inimigu sira-nia liman maski haʼu la halo sala ida, ita-nia beiʼala sira-nia Maromak sei haree no tesi-lia kona-ba neʼe.”+ 18 Tuirmai Maromak nia espíritu tun ba* Amasai,+ ulun-naʼin ba sira naʼin-30, no Amasai dehan:
“Oh David, Jessé nia oan-mane, ami mak Ita-nia atan, no ami apoia Ita-Boot.+
Dame hela ho Ita, no dame hela ho ema hotu neʼebé ajuda Ita,
Tanba Ita-nia Maromak ajuda Ita.”+
Entaun David simu sira no foti sira sai nuʼudar ulun-naʼin ba tropa sira.
19 Ema balu husi suku Manasés mós husik Saul hodi tuir fali David bainhira nia mai hamutuk ho ema Filístia atu funu hasoru Saul. Maibé ikusmai David la ajuda ema Filístia, tanba ema Filístia nia naʼi-ulun sira+ koʼalia hamutuk no haruka nia fila, hodi dehan: “Nia sei husik ita atu apoia fali ninia naʼi Saul, no ita sei mate.”+ 20 Bainhira David bá Ziklag,+ mane sira husi suku Manasés husik hela Saul no apoia fali David. Mane sira-neʼe mak Adná, Jozabad, Jediael, Micael, Jozabad, Eliú no Ziletai, sira mak ulun-naʼin ba tropa naʼin-1.000 husi suku Manasés.+ 21 Mane sira-neʼe ajuda David halo funu hasoru grupu naʼok-teen neʼebé mai atu hadau sasán, tanba mane sira-neʼe hotu mak kbiit boot no aten-brani.+ Sira sai nuʼudar xefe tropa nian. 22 Loroloron ema kontinua mai atu ajuda David+ toʼo ninia tropa sira sai barak tebes hanesan Maromak nia tropa.+
23 Tuirmai neʼe mak númeru ba ulun-naʼin ba tropa sira neʼebé kaer armas funu nian, neʼebé bá hasoru David iha Hebron+ atu entrega fali Saul nia pozisaun nuʼudar liurai ba David hodi tuir Jeová nia mandamentu.+ 24 Tropa naʼin-6.800 husi suku Judá lori eskudu boot no diman, no sira prontu atu bá funu. 25 Tropa naʼin-7.100 husi suku Simeão mak kbiit boot no aten-brani.
26 Tropa naʼin-4.600 husi suku Levi. 27 Jeoada+ mak ulun-naʼin ba Arão nia oan-mane sira,+ no tropa naʼin-3.700 hamutuk ho nia, 28 no mós Zadoc,+ mane joven neʼebé kbiit boot no aten-brani, hamutuk ho xefe naʼin-22 husi ninia aman nia umakain.
29 Tropa naʼin-3.000 husi suku Benjamim, sira mak Saul nia maun-alin,+ no uluk sira barak mak proteje Saul nia umakain. 30 Tropa naʼin-20.800 husi suku Efraim, sira mak kbiit boot, aten-brani no naran-boot iha sira-nia aman nia umakain.
31 Tropa naʼin-18.000 husi suku Manasés nia sorin balu simu knaar hodi bá foti David nuʼudar liurai. 32 Xefe naʼin-200 husi suku Issacar, sira hatene kona-ba saida mak ema Izraél tenke halo iha tempu neʼebá, no sira mak dirije sira-nia maun-alin hotu. 33 Mane naʼin-50.000 husi suku Zebulão, sira bele sai nuʼudar tropa, sira prontu atu bá funu no iha armas funu nian oioin, sira apoia David ho laran tomak.* 34 Xefe naʼin-1.000 husi suku Naftali, hamutuk ho tropa naʼin-37.000 neʼebé kaer eskudu boot no diman. 35 Tropa naʼin-28.600 husi suku Dan, sira prontu atu bá funu. 36 No mós mane naʼin-40.000 husi suku Aser neʼebé bele sai nuʼudar tropa, sira prontu atu bá funu.
37 Iha mós tropa naʼin-120.000 husi Mota Jordaun nia sorin seluk,+ sira husi suku Ruben, suku Gad, no suku Manasés nia sorin balu, sira kaer armas funu nian oioin. 38 Mane sira-neʼe hotu mak funu-naʼin, sira prontu atu bá funu. Ho laran tomak sira bá Hebron atu foti David nuʼudar liurai ba Izraél tomak, no mós ema Izraél sira seluk ho laran ida deʼit hakarak atu foti David nuʼudar liurai.+ 39 No sira hela iha neʼebá hamutuk ho David ba loron tolu; sira han-hemu iha neʼebá, tanba sira-nia maun-alin prepara ona ai-han ba sira. 40 Ema neʼebé hela besik sira, no mós ema neʼebé hela dook toʼo Issacar, Zebulão no Naftali, ema sira-neʼe mós lori ai-han hodi tula iha kuda-burru, kuda-kamelu, kuda-mula* no karau; ai-han sira-neʼe mak trigu uut, dose husi uvas-maran no figeira-maran,* tua-uvas no mina. Sira mós lori tan karau ho bibi barak tebes, tanba iha tempu neʼebá ema Izraél haksolok tebes.