Miqueias
7 Susar ba haʼu! Haʼu sai hanesan ema
Neʼebé la hetan uvas-fuan atu han
No la hetan figeira-fuan primeiru gostu neʼebé haʼu kaan,
Bainhira tempu koʼa uvas-fuan nian liu tiha ona
No ema halibur ona ai-fuan oioin.*
2 Ema laran-metin sira lakon ona husi rai,
La iha ema ida mak laran-loos iha ema nia leet.+
Sira hotu hein subasubar atu ataka hodi fakar ema nia raan.+
Sira ida-idak lasu sira-nia maun-alin rasik ho rede.
3 Sira-nia liman prontu atu halo buat neʼebé aat;+
Ulun-naʼin sira obriga ema,
Juís sira husu kolen,+
Ema naran-boot sira fó sai sira-nia hakarak,+
No sira serbisu hamutuk hodi kumpre sira-nia planu.*
4 Ema neʼebé diʼak liu iha sira-nia leet mós hanesan ai-tarak,
Ema neʼebé laran-loos liu iha sira-nia leet mós aat liu fali lutu husi ai-tarak.
Loron neʼebé imi-nia guarda sira fó sai ona no imi-nia loron kastigu nian sei toʼo mai.+
Agora imi sei taʼuk tebes.+
5 Keta tau fiar ba ó-nia maluk
No keta fiar ba ó-nia belun diʼak.+
Kuidadu kona-ba liafuan neʼebé ó koʼalia ba ida neʼebé sadere ba ó-nia hirus-matan.
6 Tanba oan-mane hakribi ninia aman,
Oan-feto hamriik hodi kontra ninia inan,+
No feto-foun kontra ninia banin-feto;+
Ema nia inimigu mak husi ninia umakain rasik.+
7 Maibé kona-ba haʼu, haʼu sei kontinua hein ba Jeová.+
Haʼu sei hein ho pasiénsia ba Maromak neʼebé salva haʼu.+
Haʼu-nia Maromak sei rona haʼu.+
8 Oh haʼu-nia inimigu, keta haksolok kona-ba haʼu.
Maski haʼu monu ona, haʼu sei hamriik fali;
Maski haʼu hela iha nakukun laran, Jeová sei sai haʼu-nia naroman.
9 Haʼu tenke tahan Jeová nia hirus,
Tanba haʼu halo ona sala hasoru nia,+
Toʼo nia defende haʼu-nia kazu no lori justisa ba haʼu.
Nia sei lori haʼu ba naroman;
Haʼu sei haree ninia hahalok loos.
10 Haʼu-nia inimigu mós sei haree,
No moe mak sei taka ema neʼebé dehan ba haʼu:
“Jeová, ó-nia Maromak, iha neʼebé?”+
Haʼu-nia matan sei hateke ba inimigu neʼe.
Agora ema sei sama nia hanesan tahu iha dalan.
11 Iha loron neʼe, ó-nia moru fatuk nian sei harii fali;
Iha loron neʼe, ó-nia rai nia fronteira sei aumenta.*
12 Iha loron neʼe, sira sei mai toʼo ba ó,
Sira sei mai husi rai-Asíria no husi rai-Ejitu nia sidade sira,
Sira neʼebé mai mak husi rai-Ejitu toʼo Mota Eufrates;*
Husi tasi toʼo tasi no husi foho toʼo foho.+
13 No rai sei sai mamuk tanba ema sira neʼebé hela iha neʼebá,
Tanba buat neʼebé sira halo ona.*
14 Favór ida, dirije Ita-nia povu ho Ita-nia ai-tonka, sira mak bibi-lubun neʼebé nuʼudar Ita-nia liman-rohan,+
Sira hela mesak deʼit iha ai-laran, iha toʼos ai-fuan nia klaran.
Husik sira han iha Basan no Gilead+ hanesan tempu uluk.
15 “Haʼu sei hatudu buat kmanek ba sira,
Hanesan tempu neʼebé sira sai husi rai-Ejitu.+
16 Nasaun sira sei haree no sai moe maski sira iha kbiit boot.+
Sira sei taka sira-nia ibun ho sira-nia liman;
Sira-nia tilun sei sai diuk.
17 Sira sei lambe rai-rahun hanesan samea.+
Hanesan animál* neʼebé dolar iha rai, sira sei sai mai ho nakdedar husi sira-nia fatin seguru.
Sira sei laʼo ba Jeová, ita-nia Maromak, ho nakdedar,
No sira sei hamtaʼuk Ita.”+
18 Maromak ida-neʼebé mak hanesan Ita-Boot?
Ita fó perdua ba sala no la hanoin tan hahalok kontra+ husi ema restu sira husi Ita-nia povu.*+
Ita sei la kaer metin Ita-nia hirus ba nafatin,
Tanba Ita haksolok ho domin neʼebé laran-metin.+
19 Ita sei hatudu fali laran-sadiʼa ba ami;+ Ita sei sama* ami-nia sala sira.
Ita sei soe tiha ami-nia sala hotu ba tasi kleʼan.+
20 Ita sei hatudu laran-metin ba Jacob,
No domin neʼebé laran-metin ba Abraão,
Hanesan Ita jura ona ba ami-nia beiʼala sira iha tempu uluk.+