Deuteronómio

12 “Neʼe mak ukun-fuan no lei sira neʼebé imi tenke halo tuir ho didiʼak iha loron hotu neʼebé imi moris iha rai neʼebé Jeová, imi-nia beiʼala nia Maromak, sei fó ba imi nuʼudar imi-nian. 2 Bainhira imi hasai nasaun sira husi rai neʼe, imi tenke halakon tiha fatin hotu neʼebé sira uza hodi serbí sira-nia maromak sira,+ maski fatin sira-neʼe iha foho aas, foho-oan, ka iha ai-hun buras nia okos. 3 Imi tenke sobu tiha sira-nia altár, harahun sira-nia fatuk lulik,*+ sunu sira-nia ai-riin lulik,* no tesi tiha sira-nia estátua neʼebé reprezenta sira-nia maromak sira+ hodi halakon hotu sira-nia maromak nia naran husi fatin neʼebá.+

4 “Imi labele adora Jeová, imi-nia Maromak, iha dalan hanesan sira adora sira-nia maromak sira.+ 5 Maibé, laʼo ba fatin neʼebé Jeová, imi-nia Maromak, sei hili atu lori ninia naran no nuʼudar ninia hela-fatin iha imi-nia suku hotu nia leet, no imi tenke adora nia iha neʼebá.+ 6 Iha fatin neʼebá mak imi tenke lori imi-nia sakrifísiu sunu nian,+ imi-nia sakrifísiu sira, imi-nia porsentu sanulu,+ imi-nia kontribuisaun sira,+ imi-nia sakrifísiu juramentu nian, sakrifísiu neʼebé imi fó ho hakarak rasik,+ no imi-nia karau no bibi sira-nia oan primeiru.+ 7 Imi no imi-nia umakain tenke han iha neʼebá iha Jeová, imi-nia Maromak, nia oin+ no haksolok ho buat hotu neʼebé imi halo,+ tanba Jeová, imi-nia Maromak, haraik ona bensaun ba imi.

8 “Imi labele halo buat neʼebé ohin loron ita halo daudaun, katak ema ida-idak halo tuir deʼit buat neʼebé nia hakarak,* 9 tanba imi seidauk tama ba imi-nia hela-fatin+ no liman-rohan neʼebé Jeová, imi-nia Maromak, sei fó ba imi. 10 Bainhira imi hakur Mota Jordaun+ no hela ona iha rai neʼebé Jeová, imi-nia Maromak, fó ba imi nuʼudar imi-nian, nia sei halo imi moris hakmatek husi imi-nia inimigu hotu neʼebé haleʼu imi, no imi sei moris hakmatek.+ 11 Imi tenke lori sakrifísiu hotu neʼebé haʼu dehan ona ba imi hodi bá fatin neʼebé Jeová, imi-nia Maromak, sei hili atu lori ninia naran.+ Imi tenke lori imi-nia sakrifísiu sunu nian, imi-nia sakrifísiu sira, imi-nia porsentu sanulu,+ imi-nia kontribuisaun sira no sakrifísiu juramentu nian hotu neʼebé imi jura ona atu hasaʼe ba Jeová. 12 Imi hotu sei haksolok iha Jeová, imi-nia Maromak, nia oin;+ imi sei haksolok hamutuk ho imi-nia oan-mane, oan-feto, imi-nia atan-mane no atan-feto, no ema Levi neʼebé iha imi-nia sidade laran* tanba sira la hetan parte ka liman-rohan hanesan imi.+ 13 Kuidadu bá atu la hasaʼe imi-nia sakrifísiu sunu nian iha fatin seluk neʼebé imi gosta.+ 14 Imi tenke hasaʼe imi-nia sakrifísiu sunu nian iha fatin neʼebé Jeová hili iha imi-nia suku ida nia leet, no iha neʼebá deʼit mak imi tenke halo buat hotu neʼebé haʼu fó sai ba imi.+

15 “Maibé kuandu imi* hakarak, imi bele oho animál no han naʼan,+ hodi tuir bensaun neʼebé Jeová, imi-nia Maromak, fó ona ba imi iha imi-nia sidade sira hotu. Ema neʼebé la moos* no ema neʼebé moos* bele han ida-neʼe, hanesan imi han naʼan husi bibi-rusa.* 16 Maibé imi labele han raan;+ imi tenke fakar neʼe ba rai hanesan bee.+ 17 Iha sidade laran imi labele han ka hemu buat sira neʼebé haketak ona hanesan porsentu sanulu husi imi-nia trigu,* tua-uvas foun no mina, imi-nia karau no bibi nia oan primeiru,+ imi-nia sakrifísiu juramentu nian hotu neʼebé imi jura ona, imi-nia sakrifísiu neʼebé imi fó ho hakarak rasik, ka imi-nia kontribuisaun. 18 Imi tenke han buat sira-neʼe iha Jeová, imi-nia Maromak, nia oin iha fatin neʼebé Jeová, imi-nia Maromak, sei hili;+ imi tenke han buat sira-neʼe hamutuk ho imi-nia oan-mane, oan-feto, imi-nia atan-mane no atan-feto, no ema Levi neʼebé iha imi-nia sidade laran;* no imi sei haksolok iha Jeová, imi-nia Maromak, nia oin iha buat hotu neʼebé imi halo. 19 Durante tempu hotu neʼebé imi moris iha imi-nia rai, kuidadu bá atu imi la haluha ema Levi.+

20 “Bainhira Jeová, imi-nia Maromak, halo luan imi-nia rai,+ hanesan nia promete ona ba imi,+ no se imi hatete: ‘Haʼu hakarak han naʼan’, tanba imi* hakarak atu han naʼan, imi bele han naʼan iha tempu naran deʼit neʼebé imi hakarak.+ 21 Se fatin neʼebé Jeová, imi-nia Maromak, hili ba ninia naran+ mak dook tebes husi imi, entaun imi bele oho imi-nia karau ka bibi balu neʼebé Jeová fó ona ba imi, hodi tuir haʼu-nia mandamentu ba imi, no imi tenke han naʼan neʼe iha imi-nia sidade laran* iha tempu naran deʼit neʼebé imi* hakarak. 22 Imi bele han naʼan neʼe hanesan imi han naʼan husi bibi-rusa;*+ ema neʼebé la moos no ema neʼebé moos bele han naʼan neʼe. 23 Maibé imi tenke halo desizaun metin atu labele han raan,+ tanba raan mak moris,*+ no imi labele han moris* hamutuk ho naʼan-isin. 24 Imi labele han raan. Imi tenke fakar neʼe ba rai hanesan bee.+ 25 Imi labele han raan, atu nuneʼe imi no imi-nia oan sira bele moris diʼak tanba imi halo buat neʼebé loos tuir Jeová nia haree. 26 Imi tenke lori deʼit buat santu neʼebé imi-nian no imi-nia sakrifísiu juramentu nian bainhira imi bá fatin neʼebé Jeová sei hili. 27 Iha neʼebá imi sei hasaʼe imi-nia sakrifísiu sunu nian, ninia isin no raan,+ iha Jeová, imi-nia Maromak, nia altár leten, no imi tenke fakar raan husi imi-nia sakrifísiu iha Jeová, imi-nia Maromak, nia altár sorin,+ maibé imi bele han naʼan-isin.

28 “Imi tenke halo tuir ho didiʼak liafuan hotu neʼebé haʼu dehan ba imi, atu nuneʼe imi no imi-nia oan sira bele nafatin moris diʼak, tanba imi halo buat neʼebé diʼak no loos iha Jeová, imi-nia Maromak, nia haree.

29 “Bainhira Jeová, imi-nia Maromak, halakon nasaun sira neʼebé imi sei duni sai,+ no imi hela ona iha sira-nia rai, 30 kuidadu bá atu imi la monu ba lasu bainhira sira lakon ona husi imi-nia oin. Keta husu kona-ba sira-nia maromak sira, hodi dehan: ‘Oinsá mak uluk nasaun sira-neʼe adora sira-nia maromak sira? Haʼu mós sei halo hanesan neʼe.’+ 31 Imi labele adora Jeová, imi-nia Maromak, iha dalan hanesan neʼe, tanba nasaun sira-neʼe adora sira-nia maromak hodi halo buat aat oioin neʼebé Jeová odi, no sira mós sunu sira-nia oan-mane no oan-feto sira iha ahi nuʼudar sakrifísiu ba sira-nia maromak sira.+ 32 Imi tenke halo tuir ho didiʼak liafuan hotu neʼebé haʼu fó sai ba imi.+ Imi labele aumenta ka hamenus liafuan ida husi liafuan sira-neʼe.+