Primeiru Samuel

5 Bainhira ema Filístia hadau tiha Maromak loos nia Arka,+ sira lori neʼe husi Ebenezer toʼo Asdod. 2 Ema Filístia lori Maromak loos nia Arka hodi hatama ba Dagon nia templu no tau ida-neʼe iha estátua Dagon nia sorin.+ 3 Iha loron tuirmai, bainhira ema Asdod hadeer sedu, sira haree Dagon monu ona ho oin ba rai iha Jeová nia Arka oin.+ Entaun sira foti Dagon no tau fali iha ninia fatin.+ 4 Bainhira sira hadeer sedu iha loron tuirmai, sira haree Dagon monu ona ho oin ba rai iha Jeová nia Arka oin. Dagon nia ulun no ninia liman rua kotu tiha ona no monu hela iha odamatan hun. Só deʼit parte neʼebé hanesan ikan* mak la monu. 5 Tan neʼe mak toʼo ohin loron, amlulik Dagon nian no ema hotu neʼebé tama ba Dagon nia templu iha Asdod hakat liu deʼit odamatan hun iha templu neʼe.

6 Jeová nia liman fó kastigu makaʼas hasoru Asdod, no nia ataka ema Asdod iha sira-nia rai tomak ho moras emorroidas.*+ 7 Bainhira ema Asdod haree buat neʼebé akontese, sira hatete: “Keta husik Izraél nia Maromak nia Arka hela nafatin ho ita, tanba nia fó kastigu makaʼas ba ita no ba ita-nia maromak Dagon.” 8 Entaun sira haruka atu halibur ema Filístia nia naʼi-ulun sira no husu: “Ita sei halo saida ho Izraél nia Maromak nia Arka?” Sira hatán: “Mai ita muda Izraél nia Maromak nia Arka ba Gat.”+ Nuneʼe sira muda Izraél nia Maromak nia Arka ba neʼebá.

9 Bainhira sira muda tiha Arka neʼe ba neʼebá, Jeová fó kastigu ba sidade neʼe, no halo sira taʼuk tebes. Nia kastigu ema hotu husi sidade neʼe, husi kiʼik toʼo boot ho moras emorroidas.+ 10 Nuneʼe sira muda Maromak loos nia Arka ba Ekron,+ maibé kuandu Maromak loos nia Arka toʼo iha Ekron, ema Ekron komesa hakilar dehan: “Sira lori Izraél nia Maromak nia Arka mai atu oho ita no ita-nia povu!”+ 11 Entaun sira halibur ema Filístia nia naʼi-ulun hotu no hatete ba sira: “Lori sai Izraél nia Maromak nia Arka husi fatin neʼe. Mai ita haruka fali Arka neʼe ba ninia fatin atu nuneʼe ita no ita-nia povu labele mate.” Taʼuk mate habelar ona iha sidade tomak, tanba Maromak loos fó kastigu makaʼas ba sira iha neʼebá,+ 12 no ema sira neʼebé la mate hetan moras emorroidas. No ema iha sidade neʼe nia lian halerik atu husu ajuda saʼe toʼo lalehan.