1 Maromak nia naran (יהוה) iha Eskritura Lia-Gregu

Ohin loron, tradusaun Bíblia nian barak la iha Maromak nia naran. Maski nuneʼe, iha Eskritura Lia-Ebraiku antigu, naran neʼe mosu maizumenus dala 7.000 ho letra haat iha lia-ebraiku יהוה, no dala barak ema bolu ida-neʼe nuʼudar Tetragrama, no iha lia-inglés ida-neʼe hakerek ho letra YHWH (ka, JHVH). Agora ita ladún hatene oinsá ema iha tempu antigu temi naran neʼe, maibé ohin loron dalan neʼebé ema barak liu temi naran neʼe iha lia-portugés no lia-tetun mak “Jeová”. Naran badak husi ida-neʼe mak “Jah” (ka, “Yah”), no neʼe mosu iha ema barak nia naran neʼebé hakerek iha Eskritura Lia-Gregu, nuneʼe mós iha liafuan “Aleluia!” katak “Hahiʼi Jah, imi hotu!”—Apokalipse 19:1, 3, 4, 6.

Eskritura Lia-Gregu mós sai nuʼudar parte ba livru sira neʼebé Maromak mak leno no neʼe halo kompletu tan Eskritura Lia-Ebraiku. Tan neʼe, se Maromak nia naran la mosu iha Eskritura Lia-Gregu, ida-neʼe haree hanesan la loos, liuliu tanba Tiago hatete ba apóstolu no katuas sira iha Jeruzalein iha tinan 49 hodi dehan: “Simeaun konta ona buat hotu kona-ba oinsá ba dala primeiru Maromak fila oin ba ema husi nasaun seluk atu foti povu ida ba nia naran.” (Apóstolu 15:14) No hodi apoia ida-neʼe, Tiago temi fali liafuan husi Amós 9:11, 12, no iha versíkulu neʼe uza Maromak nia naran. Entaun, se ema kristaun tenke sai povu ida ba Maromak nia naran, tansá mak naran neʼe, neʼebé reprezenta ho Tetragrama, hasai tiha husi Eskritura Lia-Gregu?

Matenek-naʼin balu hanoin katak Maromak nia naran la hakerek iha Eskritura Lia-Gregu tanba naran neʼe la hetan iha Bíblia Septuajinta lia-gregu nian. Bíblia neʼe mak nuʼudar tradusaun primeiru husi Eskritura Lia-Ebraiku ba lia-gregu, no tradusaun neʼe hahú maizumenus tinan 280 mK. Ba tempu kleur, Bíblia Septuajinta neʼebé matenek-naʼin sira uza mak sira neʼebé halo maizumenus tinan 300 no 400 lK,a no iha Bíblia sira-neʼe nia laran Maromak nia naran troka tiha ho liafuan gregu Kyrios (Naʼi) no Theos (Maromak).

Maibé depois neʼe, ema hetan parte balu neʼebé tuan liu husi Bíblia Septuajinta, no ida-neʼe hatudu katak Maromak nia naran ho letra haat ebraiku nian mosu duni iha Bíblia Septuajinta lia-gregu nian neʼebé tuan. Parte Bíblia nian sira-neʼeb mak livru Deuteronômio, no iha parte sira-neʼe la iha fatin ida neʼebé troka Maromak nia naran ho liafuan Kyrios no Theos. Parte Bíblia nian sira-neʼe iha Maromak nia naran ho letra ebraiku haat יהוה.

Matenek-naʼin sira fiar katak parte Bíblia nian sira-neʼe husi maizumenus tinan 50 mK, neʼe katak maizumenus 200 liutiha depois Septuajinta neʼebé orijinál. Entaun, ida-neʼe hatudu katak Septuajinta orijinál iha duni Maromak nia naran iha fatin sira neʼebé mosu iha Eskritura Lia-Ebraiku orijinál.

Septuajinta lia-gregu nian neʼebé Jesus Kristu no ninia dixípulu sira uza iha Maromak nia naran ho Tetragrama ka lae? Sin iha! Tetragrama nafatin mosu iha Septuajinta ba tinan barak depois Kristu no ninia dixípulu sira-nia tempu. Maizumenus besik tinan 150 depois Kristu, mane ida naran Áquila tradús Bíblia ba lia-gregu no nia mós uza Tetragrama ho letra ebraiku antigu.

Ema ida naran Jerónimo, neʼebé moris iha tinan 347 toʼo tinan 420 lK, nia mak ida neʼebé hahú tradús Vulgata latina. Nia dehan: “Ami hetan Maromak nia naran, Tetragrama [יהוה], iha Bíblia lia-gregu balu toʼo ohin maski neʼe hakerek ho letra antigu nian.” Entaun, toʼo Jerónimo nia tempu, Eskritura Lia-Ebraiku nian balu neʼebé tradús ba lia-gregu sei uza nafatin Maromak nia naran iha letra haat ebraiku nian.

Kuandu Jesus no ninia dixípulu sira lee Bíblia iha lia-ebraiku ka iha Septuajinta lia-gregu, klaru katak sira sei hetan Maromak nia naran hakerek ho Tetragrama. Entaun, tuir Ita-nia hanoin kuandu Jesus haree Tetragrama neʼe, nia sei halo tuir toman ema judeu nian iha tempu neʼebá hodi dehan fali liafuan ebraiku nian Adonai (Naʼi Kbiit Boot) tanba taʼuk atu hafoʼer Maromak nia naran no kontra ukun-fuan terseiru ka lae? (Êxodo 20:7) Iha sinagoga ida iha Nazaré, kuandu nia hamriik no simu livru Isaías nian no lee versíkulu sira iha Isaías (61:1, 2) iha neʼebé uza Tetragrama, nia sei la temi Maromak nia naran ka lae? Ita bele fiar katak nia sei uza duni Maromak nia naran tanba Jesus iha toman atu la simu ema judeu nia tradisaun sira neʼebé la tuir Eskritura. Mateus 7:29 dehan: “Ninia hanorin mai husi Maromak, laʼós hanesan ema eskriba sira.” No kuandu Jesus halo orasaun ba Maromak Jeová no ninia dixípulu sira rona ida-neʼe, iha tempu neʼe nia dehan: “No ema sira neʼebé Ita fó mai haʼu husi mundu neʼe, haʼu halo sira hatene kona-ba Ita-nia naran. . . . No haʼu fó sai tiha ona Ita-nia naran ba sira no sei kontinua fó sai ida-neʼe.”—João 17:6, 26.