ESTER

1 Iha Assuero* nia tempu, katak Assuero neʼebé ukun provínsia 127+ husi rai-Índia toʼo rai-Etiópia,* 2 iha tempu neʼebá Liurai Assuero tuur daudaun iha ninia kadunan iha palásiu* Susan,*+ 3 no iha tinan tolu husi ninia ukun, nia halo festa ida ba ninia ulun-naʼin hotu ho ninia atan sira. Iha tempu neʼebá tropa Pérsia+ ho Média+ nian, ema-boot sira, no ulun-naʼin provínsia sira mós mai tuir festa neʼe, 4 no nia hatudu rikusoin kmanek husi ninia ukun no hatudu sai ninia glória ba sira ba loron barak, katak loron 180. 5 Bainhira loron sira-neʼe remata ona, liurai halo festa ba loron hitu ba povu hotu neʼebé iha palásiu* Susan.* Nia halo festa ba ema baibain deʼit toʼo ema-boot, no festa neʼe halo iha pátiu* neʼebé iha jardín iha liurai nia palásiu. 6 Jardín neʼe enfeita ho kortina husi hena-liñu, hena husi kabas neʼebé diʼak, no hena kór-azúl neʼebé kesi ho tali neʼebé halo husi kabas-liñu, kabas kór-violeta husi bibi-malae fulun neʼebé kesi ho kelu husi osan-mutin, riin husi fatuk-mármore, no sofá sira halo husi osan-mean no osan-mutin, no rai nahe ho fatuk-mármore, pérola no fatuk-mármore metan.

7 Sira hemu tua-uvas iha kopu osan-mean; kopu ida-idak la hanesan, no liurai prepara tua-uvas barak tebes hodi tuir rikusoin neʼebé liurai iha. 8 La iha ema ida mak obriga* sira atu hemu, no neʼe mak ukun-fuan ba festa neʼe, tanba liurai halo ona arranju ho ema-boot sira iha ninia palásiu katak ema ida-idak bele halo tuir deʼit ninia hakarak rasik.

9 Liurai-Feto Vasti+ mós halo festa ba feto sira iha Liurai Assuero nia palásiu.

10 Iha loron hitu, bainhira liurai nia laran sei kontente hela tanba hemu tua-uvas, nia koʼalia ba Meuman, Bista, Harbona,+ Bikta, Abagta, Zetar no Karkas. Sira naʼin-hitu mak ema-boot neʼebé serbí Liurai Assuero iha ninia palásiu. 11 Liurai haruka sira atu lori Liurai-Feto Vasti mai iha liurai nia oin. Liurai-Feto Vasti tenke tau liurai nia hena* iha ninia ulun. Liurai hakarak atu hatudu Vasti nia bonita ba povu sira no ba ulun-naʼin sira, tanba Vasti bonita tebes. 12 Maibé Liurai-Feto Vasti lakohi nafatin atu mai no la halo tuir liurai nia mandamentu neʼebé nia fó sai ona liuhusi ema-boot sira. Ho ida-neʼe, liurai sai hirus no laran-nakali tebes.

13 Tuirmai liurai koʼalia ba ema matenek sira neʼebé hatene didiʼak kona-ba toman* uluk nian, tanba iha dalan hanesan neʼe mak liurai koʼalia ho ema sira neʼebé matenek kona-ba lei no kazu sira. 14 Ema sira neʼebé besik liu nia mak Karsena, Setar, Admata, Tarsis, Meres, Marsena no Memukan. Sira naʼin-hitu mak ulun-naʼin+ husi Pérsia no Média neʼebé bele hasoru liurai no tuur iha pozisaun aas liu iha ukun neʼe. 15 Liurai husu: “Tuir ukun-fuan, ita tenke halo saida ba Liurai-Feto Vasti tanba nia la halo tuir Liurai Assuero nia orden neʼebé fó sai ona liuhusi ema-boot sira?”

16 Memukan koʼalia ba liurai no ulun-naʼin sira, hodi dehan: “Liurai-Feto Vasti halo sala laʼós deʼit kontra liurai,+ maibé mós kontra ulun-naʼin hotu no povu hotu husi provínsia sira neʼebé Liurai Assuero mak ukun. 17 Tanba feen hotu sei rona kona-ba buat neʼebé Liurai-Feto Vasti halo, no sira sei hakribi sira-nia laʼen. Sira sei dehan: ‘Liurai Assuero haruka atu lori Liurai-Feto Vasti bá iha ninia oin, maibé liurai-feto lakohi bá.’ 18 Agora ulun-naʼin Pérsia no Média sira-nia feen sei hatene kona-ba buat neʼebé liurai-feto halo. Tuirmai sira mós sei koʼalia hanesan neʼe ba liurai nia ulun-naʼin sira hotu, ikusmai sei mosu odi no muramura. 19 Se liurai hakarak, favór ida fó sai ukun-fuan ida, no hakerek neʼe hamutuk ho ukun-fuan Pérsia no Média nian neʼebé labele troka.+ Fó sai ukun-fuan katak Vasti labele mai tan iha Liurai Assuero nia oin. Diʼak ba liurai atu hasai feto neʼe nia pozisaun hodi fó fali ba feto seluk neʼebé diʼak liu nia. 20 Bainhira liurai nia ukun-fuan neʼe fó sai ona iha fatin hotu neʼebé liurai mak ukun, feen hotu sei hatudu respeitu ba sira-nia laʼen, husi ema baibain toʼo ema-boot.”

21 Liurai no ulun-naʼin sira gosta konsellu neʼe, no liurai halo tuir buat neʼebé Memukan hatete. 22 Entaun nia haruka karta ba provínsia hotu neʼebé liurai mak ukun.+ Karta sira-neʼe hakerek tuir provínsia ida-idak nia letra* no povu ida-idak nia língua, atu nuneʼe laʼen ida-idak kontinua sai nuʼudar naʼi* iha ninia umakain no koʼalia ninia língua rasik.*

2 Depois neʼe, bainhira Liurai Assuero+ la hirus tan, nia hanoin-hetan buat neʼebé Vasti halo+ no kastigu neʼebé nia deside ona ba Vasti.+ 2 Tuirmai liurai nia atan sira dehan: “Ita tenke buka feto joven sira neʼebé bonita no virjen hela ba liurai. 3 Liurai tenke hili ema-boot sira iha provínsia hotu neʼebé liurai mak ukun+ atu halibur feto virjen hotu neʼebé bonita iha palásiu* Susan,* iha uma ba feto sira. Hegai,+ neʼebé nuʼudar liurai nia ulun-naʼin* no mós nuʼudar guarda ba feto sira, mak sei tau matan ba feto sira-neʼe, no iha neʼebá ema sei kumu sira-nia isin. 4 Feto joven ida neʼebé liurai gosta tebes mak sei sai liurai-feto hodi troka Vasti.”+ Liurai kontente ho konsellu neʼe, no halo tuir duni.

5 Iha palásiu* Susan*+ iha mane Judeu ida naran Mordecai,+ nia mak Jair nia oan-mane. Jair mak Simei nia oan-mane, no Simei mak Kis nia oan-mane husi suku Benjamim.+ 6 Uluk ema lori Mordecai mai husi Jeruzalein nuʼudar dadur* hamutuk ho povu sira no mós Liurai Jeconias*+ husi Judá, neʼebé Liurai Nabukodonozór husi Babilónia lori mai nuʼudar dadur. 7 Mordecai tau matan ba ninia prima+ Hadasa,* katak Ester, tanba feto neʼe nia inan-aman la iha ona. Feto joven neʼe bonita no isin kapás, no bainhira ninia inan-aman mate ona, Mordecai hakiak nia nuʼudar ninia oan-feto rasik. 8 Bainhira ema fó sai liurai nia liafuan no ukun-fuan, no feto joven barak halibur ona iha palásiu* Susan* atu Hegai+ tau matan, ema mós lori Ester ba liurai nia palásiu no Hegai, guarda ba feto sira, mak tau matan ba nia.

9 Hegai kontente ho feto joven neʼe no nia monu loos ba Hegai nia laran,* entaun Hegai halo kedas arranju hodi ema kumu Ester nia isin+ no tau matan ba ninia hahán, no nia fó atan-feto joven naʼin-hitu ba Ester husi liurai nia palásiu. Nia mós lori Ester ho ninia atan sira ba fatin neʼebé diʼak liu iha uma ba feto sira. 10 Ester la fó sai buat ida kona-ba ninia nasaun+ ka ninia família, tanba Mordecai+ haruka nia atu la konta neʼe ba ema ida.+ 11 Loroloron, Mordecai laʼo besik pátiu* husi uma ba feto sira atu haree Ester nia situasaun, atu bele hatene saida mak akontese ba nia.

12 Feto joven ida-idak troka malu hodi bá hasoru Liurai Assuero bainhira sira remata ona kumu isin ba fulan 12 tuir arranju neʼebé halo ona ba feto sira. Sira tenke kumpre sira-nia prosesu kumu isin nian hanesan tuirmai neʼe: ba fulan neen kumu isin ho mina-morin mirra*+ no ba fulan neen ho mina-bálsamu+ no ho mina oioin neʼebé uza atu kumu isin. 13 Depois neʼe mak feto joven ida prontu ona atu bá hasoru liurai. Feto neʼe sei simu buat naran deʼit neʼebé nia husu bainhira nia sai husi uma ba feto sira hodi bá liurai nia palásiu. 14 Feto neʼe sei bá hasoru liurai iha kalan, no iha dadeer nia sei fila fali ba uma segundu ba feto sira, neʼebé liurai nia ulun-naʼin*+ naran Sasgaz mak tau matan, no Sasgaz mak proteje liurai nia feen-kiʼik sira. Feto neʼe bele bá hasoru fali liurai, só deʼit se liurai kontente tebes ho nia no bolu feto neʼe ho ninia naran.+

15 Bainhira toʼo ona tempu ba Ester atu bá hasoru liurai, Ester la husu buat ida, só deʼit buat neʼebé liurai nia ulun-naʼin* ida naran Hegai haruka Ester atu husu. Iha tempu neʼebá, ema hotu neʼebé haree Ester gosta nia. Ester mak Abihail nia oan-feto, Abihail mak Mordecai nia tiu, no Mordecai mak hakiak Ester nuʼudar ninia oan-feto rasik.+ 16 Iha fulan-sanulu, neʼe katak fulan-Tebet,* iha tinan hitu+ husi liurai Assuero nia ukun, sira lori Ester bá hasoru liurai iha ninia palásiu. 17 Liurai hadomi Ester liu fali feto sira seluk, no nia kontente ho Ester no gosta* Ester liu fali feto virjen sira seluk. Entaun nia tau liurai nia hena* iha Ester nia ulun no halo nia sai liurai-feto+ hodi troka Vasti.+ 18 Liurai halo festa boot ida ba Ester no konvida ulun-naʼin sira no ninia atan sira. Tuirmai liurai fó sai tempu livre nian* ba provínsia sira neʼebé liurai mak ukun, no liurai kontinua fó prezente tuir rikusoin neʼebé liurai iha.

19 Bainhira feto virjen sira*+ halibur hamutuk ba dala segundu, Mordecai tuur hela iha liurai nia portaun. 20 Ester la fó sai buat ida kona-ba ninia família no ninia nasaun,+ hodi tuir Mordecai nia liafuan ba nia. Ester nafatin halo tuir buat neʼebé Mordecai hatete, hanesan uluk bainhira Mordecai sei tau matan hela ba nia.+

21 Iha tempu neʼebá bainhira Mordecai tuur daudaun iha liurai nia portaun, liurai nia ema-boot naʼin-rua naran Bigtan no Teres neʼebé serbí nuʼudar guarda ba liurai nia portaun, sai hirus no planu atu oho Liurai Assuero. 22 Maibé Mordecai rona kona-ba neʼe no fó-hatene kedas ba Liurai-Feto Ester. Tuirmai Ester hatete fali ba liurai hodi Mordecai nia naran. 23 Nuneʼe ema buka-hatene kona-ba neʼe, ikusmai sira haree katak ida-neʼe loos duni, entaun sira tara mane naʼin-rua neʼe iha ai-riin. Buat hotu neʼe hakerek iha livru istória kona-ba akontesimentu sira iha liurai nia oin.+

3 Depois neʼe, Liurai Assuero fó pozisaun neʼebé aas liután ba Hamedata, ema Agag,+ nia oan-mane Haman,+ no tau ninia kadunan aas liu fali ulun-naʼin sira seluk.+ 2 Liurai nia atan hotu neʼebé iha liurai nia portaun sempre hakruʼuk no hakneʼak ho oin ba rai iha Haman nia oin, tanba liurai halo ona ukun-fuan neʼe kona-ba Haman. Maibé Mordecai lakohi hakruʼuk no hakneʼak iha Haman nia oin. 3 Entaun liurai nia atan sira neʼebé iha liurai nia portaun hatete ba Mordecai: “Tanbasá mak ó kontra liurai nia ukun-fuan?” 4 Loroloron sira husu nia, maibé nia lakohi rona ba sira. Tuirmai sira hatete ba Haman hodi haree Haman simu Mordecai nia hahalok neʼe ka lae,+ tanba Mordecai fó-hatene ona ba sira katak nia mak ema Judeu ida.+

5 Bainhira Haman haree katak Mordecai lakohi hakruʼuk no hakneʼak ho oin ba rai iha ninia oin, Haman sai hirus tebes.+ 6 Maibé nia lakohi oho Mordecai mesak deʼit, tanba sira fó-hatene ona ba nia kona-ba Mordecai nia povu. Entaun Haman komesa buka dalan atu halakon ema Judeu sira iha rai hotu neʼebé Liurai Assuero mak ukun. Nia hakarak atu halakon Mordecai nia povu hotu.

7 Iha fulan-primeiru, neʼe katak fulan-Nisan,* iha tinan 12+ husi Liurai Assuero nia ukun, sira dada Pur,* katak dada sorteiu,+ iha Haman nia oin atu deside loron no fulan atu halo ida-neʼe, no sorteiu neʼe monu iha fulan-12, neʼe katak fulan-Adar.*+ 8 Tuirmai Haman hatete ba Liurai Assuero: “Iha povu ida neʼebé hela namkari iha povu sira seluk nia leet+ iha provínsia hotu neʼebé Ita-Boot ukun,+ no povu neʼe nia lei la hanesan ho povu sira seluk. Sira la halo tuir liurai nia ukun-fuan sira, no la diʼak ba liurai atu husik sira nafatin. 9 Se liurai hakarak, entaun hakerek ukun-fuan ida atu bele halakon sira. Haʼu sei selu osan-mutin kilograma 342.000* ba ulun-naʼin sira hodi tau iha liurai nia osan-fatin.”*

10 Rona tiha neʼe, liurai hasai nia kadeli selus*+ husi ninia liman no fó ida-neʼe ba Hamedata, ema Agag,+ nia oan-mane Haman.+ Haman mak ema Judeu nia inimigu. 11 Liurai hatete ba Haman: “Haʼu entrega osan-mutin no povu neʼe ba ó, no ó bele halo ba sira tuir buat neʼebé ó hanoin mak diʼak.” 12 Sira halibur liurai nia sekretáriu+ sira iha loron 13 fulan-primeiru. Sira hakerek+ Haman nia mandamentu hotu hodi fó ba liurai nia ukun-naʼin sira,* governadór ba provínsia sira, no ulun-naʼin ba povu oioin. Sira hakerek ba provínsia ida-idak tuir sira-nia letra* rasik no ba povu ida-idak tuir sira-nia língua rasik. Mandamentu neʼe hakerek hodi Liurai Assuero nia naran no tau selus ho liurai nia kadeli selus.+

13 Sira haruka ema atu lori karta sira-neʼe ba provínsia hotu neʼebé liurai mak ukun, hodi fó orden atu oho no halakon ema Judeu hotu, inklui joven no ferik-katuas sira, labarik no feto sira. Sira planu atu halo nuneʼe iha loron ida nia laran, neʼe mak iha loron 13 fulan-12, neʼe katak fulan-Adar,+ no atu hadau sira-nia sasán.+ 14 Liafuan neʼebé hakerek iha karta neʼe tenke sai nuʼudar ukun-fuan iha provínsia hotu no tenke fó sai ba povu sira hotu, atu nuneʼe sira bele prepara an ba loron neʼe. 15 Ema sira neʼebé lori karta laʼo sai lalais+ hodi halo tuir liurai nia mandamentu. Ukun-fuan neʼe fó sai iha palásiu* Susan.*+ Tuirmai liurai no Haman tuur hodi hemu tua, maibé ema iha sidade Susan* runguranga, sira la hatene saida mak akontese.

4 Bainhira Mordecai+ hatene kona-ba buat hotu neʼebé akontese daudaun,+ nia lees ninia roupa no hatais fali hena karón* no tau ahi-kadesan ba ninia an. Tuirmai nia sai ba sidade nia klaran no hakilar makaʼas ho laran-triste. 2 Nia laʼo toʼo deʼit liurai nia portaun, tanba ema labele tama ba liurai nia portaun se hatais hena karón. 3 Iha provínsia hotu,+ ema Judeu neʼebé rona liurai nia liafuan no ukun-fuan neʼe sai triste boot, no sira mós halo jejún,+ tanis no lelir. Sira barak toba iha hena karón leten no iha ahi-kadesan laran.+ 4 Bainhira Liurai-Feto Ester nia atan-feto no atan-mane* sira tama no konta ba nia, nia sai neon-susar tebes. Tuirmai nia haruka ema lori roupa sira ba Mordecai atu hatais duké uza hena karón, maibé Mordecai lakohi simu. 5 Ho ida-neʼe, Ester bolu Hatak, liurai nia ulun-naʼin* ida neʼebé liurai hili atu serbí Ester, no Ester haruka Hatak atu buka-hatene husi Mordecai kona-ba buat sira-neʼe katak sá no saida mak akontese.

6 Entaun Hatak bá hasoru Mordecai iha sidade nia fatin públiku iha liurai nia portaun oin. 7 Mordecai konta buat hotu neʼebé akontese ba nia no fó sai kona-ba osan folin+ neʼebé Haman promete atu selu ba liurai nia osan-fatin hodi bele halakon ema Judeu.+ 8 Mordecai mós fó ba nia dokumentu ida neʼebé iha ukun-fuan neʼebé fó sai ona iha Susan*+ atu halakon ema Judeu. Hatak tenke hatudu karta neʼe ba Ester no esplika neʼe ba nia no haruka nia+ atu bá hasoru liurai hodi husu liurai nia laran-sadiʼa ba Ester nia povu.

9 Hatak fila fali no konta Mordecai nia liafuan ba Ester. 10 Ester hatán ba Hatak hodi haruka nia konta fali ba Mordecai no dehan:+ 11 “Liurai nia atan hotu no povu hotu iha provínsia neʼebé liurai mak ukun hatene katak se mane ka feto ida tama ba liurai nia pátiu*+ hodi hasoru liurai maski liurai la bolu, iha lei ida deʼit ba ema neʼe: Ema neʼe tenke mate. Maibé se liurai lolo ninia ai-tonka osan-mean+ ba ema neʼe mak nia bele moris. Kona-ba haʼu, liurai seidauk bolu haʼu bá hasoru nia ba loron 30 ona.”

12 Bainhira ema fó-hatene ba Mordecai buat neʼebé Ester dehan, 13 nia hatán ba Ester: “Keta hanoin katak tanba ó iha liurai nia umakain, ó sei la mate hanesan ema Judeu sira seluk. 14 Se ó kontinua nonook deʼit iha tempu neʼe, ema Judeu sei simu ajuda no salvasaun husi fatin seluk,+ maibé ó no ó-nia aman nia umakain sei lakon mohu. No sé mak hatene se ó-nia pozisaun nuʼudar liurai-feto neʼe bele ajuda iha tempu hanesan neʼe?”+

15 Tuirmai Ester hatán ba Mordecai: 16 “Bá halibur ema Judeu hotu neʼebé iha Susan* no halo jejún+ kona-ba haʼu. Imi labele han ka hemu ba loron tolu no kalan tolu.+ Haʼu ho haʼu-nia atan-feto sira mós sei halo jejún. Haʼu sei bá hasoru liurai maski neʼe kontra lei, no se haʼu tenke mate, haʼu sei mate.” 17 Entaun Mordecai bá no halo tuir buat hotu neʼebé Ester haruka nia atu halo.

5 Iha loron terseiru,+ Ester hatais ninia roupa liurai-feto nian no bá hamriik iha pátiu* laran iha liurai nia palásiu; pátiu neʼe iha liurai nia uma oin. Iha tempu neʼebá liurai tuur daudaun iha ninia kadunan iha portaun oin. 2 Bainhira liurai haree Liurai-Feto Ester hamriik iha pátiu laran, nia kontente atu haree Ester, no nia lolo kedas ninia ai-tonka osan-mean+ iha nia liman ba Ester. Tuirmai Ester hakbesik no kona ai-tonka neʼe nia tutun.

3 Liurai husu ba nia: “Oh Liurai-Feto Ester, ó iha problema saida? Ó hakarak husu saida? Se ó husu haʼu-nia nasaun sorin, haʼu sei entrega ba ó!” 4 Ester hatán: “Se diʼak ba liurai, entaun iha loron neʼe liurai no Haman+ bele bá tuir festa neʼebé haʼu prepara ona ba liurai.” 5 Ho ida-neʼe, liurai hatete ba ninia ema sira: “Fó-hatene Haman atu mai lalais hodi tuir buat neʼebé Ester husu.” Tuirmai liurai no Haman bá hodi tuir festa neʼebé Ester prepara ona.

6 Bainhira sira hemu daudaun tua-uvas, liurai hatete ba Ester: “Ó hakarak saida? Haʼu sei fó ba ó! Saida mak ó husu? Se ó husu haʼu-nia nasaun sorin, haʼu sei entrega ba ó!”+ 7 Ester hatán: “Buat neʼebé haʼu hakarak no haʼu husu mak neʼe, 8 se haʼu monu loos ba liurai nia laran no se liurai kontente atu fó buat neʼebé haʼu husu no haʼu hakarak, entaun liurai ho Haman bele mai tuir festa neʼebé haʼu sei halo iha loron aban. No aban haʼu sei fó sai haʼu-nia hakarak hodi halo tuir buat neʼebé liurai hatete.”

9 Iha loron neʼebá Haman sai ba liʼur ho kontente tebes no laran-haksolok. Maibé bainhira Haman haree Mordecai iha liurai nia portaun oin no haree katak Mordecai la hamriik no la taʼuk nia, Haman sai hirus tebes hasoru Mordecai.+ 10 Maibé Haman kontrola ninia an no laʼo ba ninia uma. Tuirmai nia haruka ema atu bolu ninia belun sira no ninia feen Zeres.+ 11 Haman gaba an kona-ba ninia rikusoin neʼebé barak loos no ninia oan-mane sira neʼebé barak,+ no mós gaba an kona-ba oinsá mak liurai fó pozisaun ba nia no foti nia aas liu fali ulun-naʼin sira seluk no mós liurai nia atan sira.+

12 Haman hatutan tan dehan: “Liután neʼe, Liurai-Feto Ester la konvida ema seluk, nia konvida haʼu deʼit atu tuir liurai ba festa neʼebé nia prepara ona.+ Haʼu mós hetan konvite atu han hamutuk ho nia no ho liurai aban.+ 13 Maibé buat hotu neʼe la halo haʼu kontente se haʼu haree nafatin Mordecai, ema Judeu, neʼebé tuur iha liurai nia portaun.” 14 Haman nia belun hotu no ninia feen Zeres hatete ba nia: “Harii ai-riin ida neʼebé aas metru 22.* No iha dadeer hatete ba liurai atu tara Mordecai iha ai-riin neʼe.+ Tuirmai bá hamutuk ho liurai no sai kontente iha festa neʼe.” Haman gosta konsellu neʼe, entaun nia haruka ema atu harii ai-riin ida.

6 Iha kalan neʼe liurai toba la dukur. Entaun nia haruka ema atu lori ba nia livru istória kona-ba akontesimentu sira,+ no lee livru neʼe ba nia. 2 Iha livru neʼe hakerek buat neʼebé Mordecai fó sai kona-ba Bigtan no Teres neʼebé planu atu oho Liurai Assuero.+ Bigtan no Teres mak ema-boot no guarda ba liurai nia portaun. 3 Entaun liurai husu: “Mordecai simu ona glória no kolen ba buat neʼebé nia halo ka lae?” Liurai nia atan sira hatán: “Nia seidauk simu kolen ida.”

4 Iha tempu neʼebá Haman mai iha pátiu*+ liʼur nian iha liurai nia palásiu atu koʼalia ho liurai kona-ba tara Mordecai iha ai-riin neʼebé nia prepara ona.+ Liurai husu: “Sé mak hamriik iha pátiu liʼur?” 5 Liurai nia atan sira hatán ba nia: “Haman+ mak hamriik iha pátiu.” Entaun liurai hatete: “Haruka nia tama mai.”

6 Bainhira Haman tama, liurai husu ba nia: “Haʼu tenke halo saida ba mane neʼebé haʼu hakarak atu fó hahiʼi?” Haman hanoin iha ninia laran: “La iha mane seluk neʼebé liurai hakarak atu fó hahiʼi só haʼu deʼit, loos ka lae?”+ 7 Entaun Haman hatán ba liurai: “Kona-ba mane neʼebé liurai hakarak atu fó hahiʼi, 8 diʼak atu haruka ema lori liurai nia roupa+ neʼebé liurai uza no lori kuda ida neʼebé liurai saʼe, no enfeita kuda nia ulun ho hena espesiál. 9 Tuirmai entrega roupa no kuda ba liurai nia ulun-naʼin ida atu tau matan, no atan sira tenke tau roupa neʼe ba mane neʼebé liurai hakarak atu fó hahiʼi no haruka nia atu saʼe kuda neʼe iha sidade nia fatin públiku. Atan sira tenke hakilar iha ninia oin, dehan: ‘Neʼe mak buat neʼebé ita halo ba ema neʼebé liurai hakarak atu fó hahiʼi!’”+ 10 Rona tiha neʼe, liurai haruka kedas Haman, hodi dehan: “Lalais! Foti roupa no kuda, no halo tuir buat neʼebé ó foin hatete, halo neʼe ba Mordecai ema Judeu, neʼebé tuur iha liurai nia portaun. Keta haluha buat ida husi liafuan hotu neʼebé ó hatete.”

11 Entaun Haman foti roupa no kuda, no tau roupa neʼe ba Mordecai+ no haruka nia saʼe kuda iha sidade nia fatin públiku no Haman laʼo iha ninia oin hodi hakilar dehan: “Neʼe mak buat neʼebé ita halo ba ema neʼebé liurai hakarak atu fó hahiʼi!” 12 Depois neʼe, Mordecai fila fali ba liurai nia portaun, maibé Haman fila lalais ba nia uma, nia triste no ho moe nia taka ninia ulun ho hena. 13 Bainhira Haman konta ba ninia feen Zeres+ no ninia belun hotu kona-ba buat hotu neʼebé akontese ona ba nia, ninia ema matenek sira no ninia feen Zeres hatete ba nia: “Se Mordecai neʼebé agora hetan pozisaun aas liu fali ó mak ema Judeu ida, ó sei la manán nia, maibé ó sei lakon duni iha nia oin.”

14 Bainhira sira koʼalia hela ho Haman, liurai nia ema-boot sira toʼo mai no lori lalais Haman ba festa neʼebé Ester prepara ona.+

7 Nuneʼe liurai no Haman+ bá tuir festa neʼebé Liurai-Feto Ester prepara ona. 2 Iha loron segundu husi festa neʼe bainhira sira hemu hela tua-uvas, liurai dehan tan ba Ester: “Oh Liurai-Feto Ester, ó hakarak saida? Haʼu sei fó ba ó. Ó hakarak husu saida? Se ó husu haʼu-nia nasaun sorin, haʼu sei entrega ba ó!”+ 3 Liurai-Feto Ester hatán: “Oh liurai, se haʼu monu loos ba liurai nia laran no se liurai kontente, haʼu husu ba liurai atu salva haʼu-nia moris no mós husik haʼu-nia povu moris.+ 4 Tanba ema faʼan tiha haʼu no haʼu-nia povu atu oho no halakon ami.+ Se ema faʼan ami atu sai nuʼudar atan-mane no atan-feto, haʼu sei nonook deʼit. Maibé susar neʼe mak la diʼak duni, tanba neʼe sei lori aat mós ba liurai.”

5 Tuirmai Liurai Assuero hatete ba Liurai-Feto Ester: “Sé mak ema neʼe? Mane neʼebé brani atu halo buat sira-neʼe mak iha neʼebé?” 6 Ester hatán: “Funu-balun no inimigu neʼe mak Haman. Nia ema aat.”

Haman sai taʼuk tebes tanba liurai no liurai-feto. 7 Liurai hamriik hodi sai husi festa neʼe ho hirus loos no bá jardín iha palásiu neʼe, maibé Haman hamriik hodi husu Liurai-Feto Ester atu salva ninia moris, tanba nia hatene katak liurai deside ona atu fó kastigu ba nia. 8 Bainhira liurai fila husi jardín neʼe hodi tama fali ba uma neʼebé sira halo festa no hemu tua-uvas, nia haree katak Haman latan an iha sofá neʼebé Ester tuur bá. Nuneʼe liurai hakilar, hodi dehan: “Ó mós sei estraga liurai-feto iha haʼu-nia uma rasik ka?” Bainhira liurai koʼalia tiha liafuan sira-neʼe, liurai nia atan sira taka kedas Haman nia oin.* 9 Ema-boot ida naran Harbona+ neʼebé serbisu iha liurai nia palásiu, dehan: “Haman mós prepara ona ai-riin ida ba Mordecai,+ neʼebé uluk fó avizu hodi salva liurai.+ Ai-riin neʼe iha Haman nia uma, no aas metru 22.”* Ho ida-neʼe, liurai dehan: “Tara nia iha ai-riin neʼe!” 10 Nuneʼe sira tara Haman iha ai-riin neʼebé nia prepara ona ba Mordecai, no liurai la hirus tan.

8 Iha loron neʼebá Liurai Assuero entrega Haman nia uma no sasán+ hotu ba Liurai-Feto Ester. Haman mak ema Judeu nia inimigu.+ Tuirmai Mordecai mai hamriik iha liurai nia oin, tanba Ester fó sai ona katak sira naʼin-rua mak família.+ 2 Depois neʼe, liurai hasai ninia kadeli selus*+ neʼebé nia foti ona husi Haman no entrega fali kadeli neʼe ba Mordecai. Ester hili Mordecai atu tau matan ba Haman nia uma no sasán hotu.+

3 Depois neʼe, Ester bá koʼalia fali ho liurai. Nia hakneʼak no hakruʼuk iha liurai nia ain no tanis hodi husu liurai atu hapara planu aat neʼebé Haman ema Agag halo ona kontra ema Judeu.+ 4 Liurai lolo ninia ai-tonka osan-mean ba Ester,+ nuneʼe, Ester hamriik iha liurai nia oin. 5 Ester hatete: “Se liurai kontente no se haʼu monu loos ba liurai nia laran, no se neʼe diʼak ba liurai no haʼu simu ona liurai nia laran-diʼak, entaun favór ida, hakerek mandamentu ida atu kansela dokumentu sira neʼebé Hamedata, ema Agag,+ nia oan-mane Haman+ hakerek ona atu halakon ema Judeu hotu iha provínsia hotu neʼebé liurai mak ukun. 6 Se lae, oinsá mak haʼu bele tahan hodi haree susar neʼebé sei kona haʼu-nia povu? Oinsá mak haʼu bele tahan atu haree haʼu-nia família sira lakon?”

7 Entaun Liurai Assuero hatete ba Liurai-Feto Ester no Mordecai, ema Judeu neʼe, hodi dehan: “Haʼu entrega ona Haman nia uma no sasán hotu ba Ester+ no haʼu haruka ema tara nia iha ai-riin,+ tanba ninia planu aat atu ataka ema Judeu. 8 Agora ó bele hakerek ukun-fuan ida hodi liurai nia naran kona-ba buat naran deʼit neʼebé ó hanoin mak diʼak ba ema Judeu no tau selus ho liurai nia kadeli selus, tanba ukun-fuan neʼebé hakerek hodi liurai nia naran no tau ona selus ho liurai nia kadeli selus labele kansela.”+

9 Entaun sira halibur liurai nia sekretáriu sira iha loron 23 fulan-terseiru, neʼe katak fulan-Sivan,* no sira hakerek liafuan hotu neʼebé Mordecai haruka ba ema Judeu, no mós ba ukun-naʼin sira,*+ governadór sira, no ulun-naʼin provínsia+ sira husi rai-Índia toʼo rai-Etiópia, hamutuk provínsia 127. Sira hakerek ba provínsia ida-idak tuir sira-nia letra* rasik no ba povu ida-idak tuir sira-nia língua rasik no ba ema Judeu tuir sira-nia letra* no língua rasik.

10 Nia hakerek ukun-fuan neʼe hodi liurai Assuero nia naran no tau selus ho liurai nia kadeli selus.+ Nia haruka atan sira neʼebé saʼe kuda atu lori dokumentu sira-neʼe. Sira saʼe kuda neʼebé halai lalais, kuda neʼebé sira hakiak atu uza hodi halo liurai nia serbisu. 11 Iha dokumentu sira-neʼe liurai fó lisensa ba ema Judeu iha sidade hotu atu halibur hamutuk hodi defende sira-nia moris no atu oho no halakon tropa hotu husi povu ka provínsia naran deʼit neʼebé ataka sira, inklui feto no labarik sira, no atu hadau ema sira-neʼe nia sasán.+ 12 Iha provínsia hotu neʼebé Liurai Assuero mak ukun, ema Judeu sira tenke halo nuneʼe iha loron neʼebé hanesan, iha loron 13 fulan-12, neʼe katak fulan-Adar.*+ 13 Liafuan iha dokumentu neʼe* tenke sai nuʼudar ukun-fuan iha provínsia hotu. No tenke fó sai neʼe ba povu hotu, atu nuneʼe ema Judeu bele sai prontu ba loron neʼe hodi selu fali sira-nia inimigu nia hahalok.+ 14 Ema sira neʼebé lori dokumentu neʼe saʼe kuda neʼebé uza atu halo liurai nia serbisu, sira bá ho urjente no ansi hodi tuir liurai nia mandamentu. Ukun-fuan neʼe mós fó sai iha palásiu* Susan.*+

15 Mordecai sai husi liurai nia oin no nia uza roupa liurai nian neʼebé kór-azúl no kór-mutin, no nia mós uza koroa furak husi osan-mean no roupa furak neʼebé halo ho kabas kór-violeta husi bibi-malae fulun.+ Iha tempu neʼebá sidade Susan* haklalak ho haksolok. 16 Ema Judeu sira hetan esperansa.* Sira haksolok, kontente, no ema respeitu sira. 17 Iha provínsia hotu no sidade hotu neʼebé liurai nia mandamentu no ukun-fuan toʼo bá, ema Judeu sira haksolok no kontente, sira halo festa no selebra ida-neʼe. Ema barak husi nasaun seluk fó sai katak sira mós ema Judeu,+ tanba sira taʼuk ema Judeu.

9 Iha loron 13 fulan-12, neʼe katak fulan-Adar,*+ mak tempu atu kumpre liurai nia liafuan no ninia ukun-fuan.+ Iha loron neʼebá ema Judeu nia inimigu sira hein atu manán sira, maibé neʼe la akontese. Ema Judeu mak halakon fali ema hotu neʼebé odi sira.+ 2 Ema Judeu sira halibur hamutuk iha sira-nia sidade iha provínsia hotu neʼebé Liurai Assuero+ mak ukun, no sira halo funu hasoru ema neʼebé buka atu halo aat ba sira, no la iha ema ida mak bele hamriik kontra sira, tanba povu hotu sai taʼuk ona ba sira.+ 3 Ulun-naʼin provínsia sira hotu, ukun-naʼin sira,*+ governadór sira, no sira neʼebé tau matan ba liurai nia serbisu, sira apoia ema Judeu tanba sira taʼuk Mordecai. 4 Mordecai nia pozisaun sai boot+ ona iha liurai nia palásiu, no ninia naran-boot habelar ba provínsia hotu, tanba Mordecai kontinua sai forte liután.

5 Ema Judeu manán sira-nia inimigu hotu no oho sira ho surik hodi halakon sira. Ema Judeu halo ba inimigu neʼebé odi sira tuir deʼit sira-nia hakarak.+ 6 Ema Judeu oho no halakon mane naʼin-500 iha palásiu* iha Susan.*+ 7 Sira mós oho Parsandata, Dalfon, Aspata, 8 Porata, Adalia, Aridata, 9 Parmasta, Arisai, Aridai no Vaisata, 10 sira mak Haman nia oan-mane. Sira hamutuk naʼin-sanulu. Haman nia aman mak Hamedata, Haman mak ema Judeu nia inimigu.+ Maibé bainhira sira oho tiha mane sira-neʼe, sira la hadau sasán ida husi mane sira-neʼe.+

11 Iha loron neʼebá, ema fó-hatene ba liurai kona-ba ema naʼin-hira mak sira oho tiha ona iha palásiu* iha Susan.*

12 Liurai hatete ba Liurai-Feto Ester: “Iha palásiu* iha Susan,* ema Judeu oho no halakon ona mane naʼin-500 no oho mós Haman nia oan-mane naʼin-sanulu. Entaun, saida mak ema Judeu halo ona iha liurai nia provínsia sira seluk?+ Agora, saida tan mak ó husu? Haʼu mós sei fó ba ó. Saida tan mak ó hakarak? Haʼu sei halo ba ó.” 13 Ester hatán: “Se liurai kontente,+ favór ida, fó lisensa ba ema Judeu sira iha Susan* atu aban sira mós bele kumpre ukun-fuan neʼebé Ita halo ohin.+ No husik sira tara Haman nia oan-mane naʼin-sanulu iha ai-riin.”+ 14 Entaun liurai fó mandamentu atu kumpre ida-neʼe. Nia fó sai ukun-fuan ida iha Susan,* no sira tara Haman nia oan-mane naʼin-sanulu.

15 Ema Judeu iha Susan* halibur hamutuk fali iha loron 14 fulan-Adar+ no oho mane naʼin-300 iha Susan,* maibé sira la hadau sasán ida.

16 Kona-ba ema Judeu sira seluk iha provínsia sira neʼebé liurai mak ukun, sira mós halibur hamutuk no defende sira-nia moris.+ Sira oho sira-nia inimigu,+ no halakon ema neʼebé odi sira hamutuk naʼin-75.000, maibé sira la hadau sasán ida. 17 Sira halo nuneʼe iha loron 13 fulan-Adar, no iha loron 14 sira para no sira halo loron neʼe sai nuʼudar loron festa no loron ksolok nian.

18 Ema Judeu sira iha Susan* halibur hamutuk atu defende an iha loron 13+ no loron 14,+ no sira para iha loron 15, no sira halo loron neʼe sai nuʼudar loron festa no loron ksolok nian. 19 Tan neʼe mak ema Judeu sira neʼebé hela iha sidade iha distritu hotu neʼebé iha sidade kapitál nia liʼur, halo loron 14 fulan-Adar nuʼudar loron ksolok no festa nian, loron atu selebra,+ no loron atu haruka ai-han ba malu.+

20 Mordecai+ hakerek buat hotu neʼebé akontese no haruka karta ofisiál ba ema Judeu sira iha provínsia hotu neʼebé Liurai Assuero mak ukun, maski besik ka dook. 21 Nia haruka sira atu halo selebrasaun iha loron 14 no mós loron 15 fulan-Adar, no selebra neʼe tinan-tinan, 22 tanba iha loron sira-neʼe mak ema Judeu sai livre husi sira-nia inimigu, no iha fulan neʼe mak sira-nia triste troka fali ho ksolok no sira-nia neon-susar+ troka fali ho loron festa nian. Sira tenke haree loron neʼe nuʼudar loron festa no ksolok nian no nuʼudar loron atu haruka ai-han ba malu no haruka prezente ba ema kiak.

23 Ema Judeu sira konkorda atu kontinua halo selebrasaun neʼebé sira hahú ona no atu halo tuir buat neʼebé Mordecai hakerek ba sira. 24 Uluk Hamedata ema Agag+ nia oan-mane Haman,+ ema Judeu sira-nia inimigu, halo ona planu aat ba ema Judeu atu halakon sira,+ no nia dada sorteiu*+ ona atu halo ema Judeu sai taʼuk no halakon sira. 25 Maibé bainhira Ester tama hodi hamriik iha liurai nia oin, liurai hakerek ukun-fuan,+ hodi dehan: “Husik Haman nia planu aat ba ema Judeu+ fila fali ba ninia ulun leten”, no sira tara nia no ninia oan-mane sira iha ai-riin.+ 26 Tan neʼe mak sira bolu loron sira-neʼe nuʼudar Purim, hodi tuir liafuan Pur.*+ Tanba buat hotu neʼebé hakerek ona iha karta neʼe no buat neʼebé sira haree ona iha situasaun neʼe no buat neʼebé akontese ba sira, 27 ema Judeu no sira-nia jerasaun no ema hotu neʼebé hamutuk ho sira+ tenke halo selebrasaun iha loron rua neʼe no halo tuir buat sira neʼebé hakerek ona kona-ba sira hodi tuir tempu neʼebé deside ona tinan-tinan. 28 Sira tenke hanoin-hetan loron sira-neʼe no selebra neʼe iha sira-nia jerasaun hotu. Família ida-idak iha provínsia ida-idak no iha sidade ida-idak tenke selebra loron sira-neʼe. Ema Judeu no sira-nia jerasaun tenke hanoin-hetan nafatin loron Purim sira-neʼe.

29 Tuirmai Abihail nia oan-feto Ester neʼebé nuʼudar Liurai-Feto, no Mordecai ema Judeu, hakerek karta segundu ho podér tomak atu hametin ukun-fuan kona-ba tempu Purim. 30 Nia haruka karta ofisiál ba ema Judeu hotu iha provínsia 127+ neʼebé Liurai Assuero mak ukun,+ nia haruka karta sira-neʼe ho liafuan dame nian no lia-loos 31 atu hametin ukun-fuan kona-ba tempu Purim hodi tuir tempu neʼebé deside ona atu ema Judeu hotu tenke halo tuir. Neʼe tuir mandamentu neʼebé Mordecai no Liurai-Feto Ester fó sai ona ba sira,+ no tuir buat neʼebé sira rasik promete atu halo,+ inklui halo jejún+ no harohan.+ 32 Ester nia mandamentu mós hametin ukun-fuan sira kona-ba Purim,+ no neʼe hakerek ona iha livru ida.

10 Liurai Assuero obriga ema sira neʼebé hela iha rai neʼe no illa sira iha tasi atu halo serbisu.

2 Kona-ba buat oioin neʼebé liurai kumpre ho ninia kbiit boot, no mós kona-ba oinsá liurai fó pozisaun aas ba Mordecai,+ buat hotu neʼe hakerek ona iha livru istória kona-ba liurai sira husi Média no Pérsia.+ 3 Mordecai ema Judeu, tuur iha pozisaun segundu depois Liurai Assuero. Nia hetan naran-boot* iha ema Judeu nia leet no ninia maun-alin sira hatudu respeitu ba nia, tanba nia halo serbisu ba ninia maluk ema Judeu nia diʼak no hakarak lori diʼak* ba sira-nia jerasaun hotu.