JOEL
1 Jeová fó sai liafuan tuirmai neʼe ba Petuel nia oan-mane Joel:*
2 “Imi katuas sira, rona bá,
Imi hotu neʼebé hela iha rai neʼe,* see tilun didiʼak bá.
Buat ida hanesan neʼe akontese ona iha imi-nia tempu
Ka iha imi-nia beiʼala sira-nia tempu ka lae?+
3 Konta ida-neʼe ba imi-nia oan sira,
No imi-nia oan sira sei konta tutan ba sira-nia oan,
No sira-nia oan sei konta tutan ba jerasaun tuirmai.
4 Ai-horis neʼebé gafañotu neʼebé hamlaha la han, gafañotu boot mak sei han,+
Buat neʼebé gafañotu boot la han, gafañotu oan neʼebé la iha liras mak sei han,
No buat neʼebé gafañotu oan la han, gafañotu neʼebé kaan-teen mak sei han.+
5 Imi lanu-teen sira,+ hadeer no tanis bá!
Imi hotu neʼebé hemu tua-uvas, tanis hakilar bá,
Tanba tua-uvas midar hasai tiha husi imi-nia ibun.+
6 Tanba nasaun ida tama ona ba haʼu-nia rai, nia forte no ninia tropa labele sura.+
Ninia nehan no hasan-ruin hanesan leaun nian.+
7 Nasaun neʼe estraga ona haʼu-nia uvas-hun no tesi ona haʼu-nia ai-figeira,
Sira hasai ai nia kulit hotu no soe tiha,
No sira la husik ai-kulit ida iha ninia sanak sira.
8 Tanis bá hanesan feto virjen* neʼebé hatais hena karón*
Hodi tanis ba ninia noivu* neʼebé mate ona.
9 La iha tan sakrifísiu trigu* nian+ no sakrifísiu hemu nian+ iha Jeová nia uma.
Amlulik sira neʼebé serbí Jeová sei triste hela.
10 Ai-horis iha toʼos estraga ona, rai neʼe halerik.+
Ai-han estraga ona, tua-uvas foun sai maran ona, no mina la iha tan ona.+
11 Toʼos-naʼin sente laran-taridu, toʼos-uvas nia naʼin sira halerik
Tanba la iha trigu no sevada.
Ai-han sira iha toʼos lakon tiha ona.
12 Uvas-hun sai maran ona,
Figeira-hun namlaek ona.
Romaun-hun, palmeira-hun no masán-hun,
Ai-hun hotu iha rai-luan maran ona.+
Tanba ksolok sai fali moe iha povu nia leet.
13 Imi amlulik sira, hatais hena karón no tanis bá,*
Imi neʼebé halo serbisu iha Maromak nia altár, halerik bá.+
Imi neʼebé serbí haʼu-nia Maromak, hatais hena karón no tama mai uma neʼe hodi hela kalan ida.
Tanba ema la hasaʼe tan sakrifísiu trigu nian+ no sakrifísiu hemu nian+ iha imi-nia Maromak nia uma.
14 Fó sai* tempu jejún, no bolu povu hodi halaʼo reuniaun espesiál ida.+
Halibur katuas sira no ema hotu husi rai neʼe,
Halibur sira iha imi-nia Maromak Jeová nia uma,+ no halerik ba Jeová hodi husu ajuda.
15 Susar boot tanba loron neʼe mai daudaun!
Jeová nia loron besik ona!+
Loron neʼe sei mai bainhira Maromak neʼebé Kbiit Boot Liu Hotu halakon buat barak!
16 Haksolok no kontente lakon ona husi ita-nia Maromak nia uma,
No ai-han la iha tan.
17 Fini* neʼebé sira kuda sai maran ona.
Armazén sai mamuk ona.
Sira sobu ona armazén tanba ai-han maran ona.
18 Animál-hakiak mós halerik!
Karau sira laʼo bilán tanba duʼut matak la iha,
No bibi-lubun sira mós hetan susar tanba kastigu neʼe.
19 Oh Jeová, haʼu sei bolu Ita,+
Tanba ahi han tiha duʼut iha rai-fuik,
No ahi han ona ai hotu iha rai-luan.
20 Animál fuik mós hein namanas ba Ita-nia ajuda,
Tanba mota sira sai maran ona
No ahi han mohu tiha duʼut iha rai-fuik.”
2 “Huu dikur bá iha Siaun!+
Hakilar ho lian funu nian iha haʼu-nia foho santu.
2 Loron neʼe sei nakukun tebes,+
Loron neʼe sei iha kalohan metan,+
Hanesan rai naroman nia naroman neʼebé foho sira taka netik.
Povu neʼebé barak no forte sei mai,+
Husi tempu uluk kedas la iha nasaun ida mak hanesan neʼe,
No sei la mosu tan iha futuru
Husi jerasaun ba jerasaun.
3 Ahi han buat hotu iha sira-nia oin,
No buat hotu iha sira-nia kotuk.+
Rai neʼebé iha sira-nia oin hanesan ho jardín Eden,+
Maibé iha sira-nia kotuk rai sai fuik no mamuk,
No la iha buat ida mak bele halai sees.
4 Sira haree hanesan kuda,
No sira halai hanesan kuda funu nian.+
5 Bainhira sira halai iha foho-tutun sira, sira halo tarutu hanesan kuda-karreta,+
Hanesan tarutu husi ahi boot neʼebé han duʼut-maran.
Sira hanesan tropa forte neʼebé forma hodi prontu ba funu.+
6 Ema sei sai laran-taridu tanba sira.
Ema hotu nia oin sei sai taʼuk.*
7 Sira halai ba oin hanesan funu-naʼin sira,
Sira saʼe moru hanesan tropa sira,
Sira ida-idak laʼo loos tuir sira-nia dalan,
No sira la sees husi sira-nia dalan.
8 Sira la dudu malu,
Mane ida-idak laʼo ba oin tuir sira-nia dalan.
Se rama-oan* halo sira balu monu,
Sira seluk la sees husi sira-nia dalan.
9 Sira tama lalais ba sidade laran, sira halai iha moru leten.
Sira saʼe ba uma-leten, no tama uma liuhusi janela hanesan naʼok-teen.
10 Rai nakdedar no lalehan nakdoko iha sira-nia oin.
Loro-matan no fulan sai nakukun,+
No fitun sira la nabilan tan.
11 Jeová sei koʼalia ho lian boot iha ninia tropa sira-nia oin,+ tanba ninia tropa mak barak tebes.+
Nia neʼebé kumpre Ninia liafuan mak iha kbiit boot.
Jeová nia loron mak boot no kmanek liu.+
Sé mak bele tahan loron neʼe?”+
12 Jeová dehan: “Maski nuneʼe, agora kedas, fila fali mai haʼu ho imi-nia laran tomak,+
Halo jejún,+ tanis no halerik bá.
13 Lees imi-nia fuan,+ laʼós imi-nia roupa,+
No fila fali ba Jeová, imi-nia Maromak,
Tanba nia laran-diʼak no laran-sadiʼa, la hirus lalais+ no nakonu ho domin neʼebé laran-metin,+
No nia sei hanoin fali* kona-ba ninia desizaun atu lori susar boot neʼe.
14 Sé mak hatene karik nia sei hatún ninia hirus no troka ninia desizaun*+
No haraik bensaun ba imi,
Atu nuneʼe imi bele hasaʼe sakrifísiu trigu* nian no sakrifísiu hemu nian ba Jeová, imi-nia Maromak.
15 Huu dikur bá iha Siaun!
Fó sai* tempu jejún, no bolu povu sira hodi halaʼo reuniaun espesiál.+
16 Halibur povu bá, no halo santu kongregasaun* neʼe.+
Halibur katuas, labarik no bebé sira neʼebé sei susu hela.+
Noivu tenke sai husi kuartu, no noiva mós tenke sai husi kuartu laran.
17 Husik amlulik sira neʼebé serbí Jeová tanis
Iha varanda no altár nia leet,+ hodi dehan:
‘Oh Jeová, favór ida hanoin Ita-nia povu,
Keta husik ema goza Ita-nia povu,*
Keta husik nasaun sira ukun Ita-nia povu.
Keta husik ema dehan: “Sira-nia Maromak iha neʼebé?”’+
19 Jeová sei hatán ba ninia povu, hodi dehan:
‘Haʼu sei haruka ai-han, tua-uvas foun no mina ba imi.
Imi sei sai bosu loos.+
Haʼu sei la husik tan ema atu goza imi iha nasaun sira-nia leet.+
20 Haʼu sei duni sira neʼebé mai husi parte norte hodi dook husi imi,
Haʼu sei halo sira namkari ba rai neʼebé maran, fuik no mamuk,
Tropa sira neʼebé iha oin sei namkari ba tasi parte leste,*
No tropa sira neʼebé iha kotuk sei namkari ba tasi parte oeste.*
Sira-nia iis dois sei saʼe ba leten,
Sira-nia mate-isin nia dois sei kontinua saʼe ba leten;+
Tanba Maromak sei halo buat neʼebé kmanek tebes.’
21 Oh rai, keta sai taʼuk.
Sai kontente no haksolok bá, tanba Jeová sei halo buat neʼebé kmanek tebes.
22 Animál sira iha rai-luan, keta sai taʼuk,
Tanba duʼut iha rai-fuik sei sai matak,+
No ai-horis sira sei fó fuan.+
Ai-figeira no uvas-hun sei fó fuan barak.+
23 Siaun nia oan-mane sira, sai kontente no haksolok bá tanba Jeová, imi-nia Maromak,+
Tanba nia sei fó ba imi udan neʼebé natoon iha tempu neʼebé loos,
No nia sei haruka udan barak ba imi,
24 Fatin sama trigu nian sei sai nakonu ho trigu neʼebé diʼak,
No imi-nia fatin atu halo tua-uvas foun no mina sei nakonu toʼo resin.+
25 Haʼu sei selu fali ba imi tuir tinan sira
Neʼebé gafañotu boot, gafañotu oan neʼebé la iha liras, gafañotu neʼebé kaan-teen, no gafañotu neʼebé hamlaha han ai-han iha imi-nia toʼos,
Sira mak haʼu-nia tropa boot neʼebé haʼu haruka ba imi-nia leet.+
26 Imi sei han toʼo bosu duni,+
No imi sei hahiʼi Jeová, imi-nia Maromak, nia naran,+
Neʼebé halo buat kmanek ba imi.
Haʼu-nia povu sei la hetan tan moe.+
27 Nuneʼe imi sei hatene duni katak haʼu mak iha ema Izraél nia leet+
No haʼu mak Jeová, imi-nia Maromak,+ no la iha Maromak seluk!
Haʼu-nia povu sei la hetan moe tan.
28 Depois neʼe, haʼu sei fakar haʼu-nia espíritu+ ba ema oioin,
Imi-nia oan-mane no oan-feto sira sei fó sai profesia,
Imi-nia katuas sira sei hetan mehi,
No imi-nia mane joven sira sei haree vizaun.+
29 Iha tempu neʼebá haʼu mós sei fakar haʼu-nia espíritu
Ba haʼu-nia atan-mane no atan-feto sira.
30 No haʼu sei hatudu sai sinál sira iha lalehan no iha rai,
Sei iha raan, ahi no suar barak neʼebé saʼe ba leten.+
31 Loro-matan sei sai nakukun no fulan sei sai raan+
Antes Jeová nia loron neʼebé boot no kmanek liu toʼo mai.+
32 Ema hotu neʼebé bolu Jeová nia naran sei hetan salvasaun.+
Iha Foho Siaun no iha Jeruzalein sei iha ema neʼebé hetan salvasaun,+ hodi tuir buat neʼebé Jeová hatete ona,
Sira mak ema neʼebé Jeová bolu atu hetan salvasaun.”
3 “Iha loron sira iha tempu neʼebá,
Haʼu sei lori ema Judá no ema Jeruzalein neʼebé sai ona dadur atu fila fali,+
2 Haʼu mós sei halibur nasaun hotu hamutuk
No lori sira ba Rai-Tetuk Jeosafát.*
Haʼu sei tesi-lia ba sira iha neʼebá+
Hodi apoia haʼu-nia povu Izraél neʼebé mak haʼu-nia liman-rohan.
Tanba nasaun sira-neʼe halo haʼu-nia povu laʼo namkari iha sira-nia leet,
No sira fahe haʼu-nia rai ba malu.+
3 Sira dada sorteiu* atu fahe haʼu-nia povu,+
Sira faʼan labarik-mane atu selu feto-aat*
No faʼan labarik-feto atu sosa tua-uvas hodi hemu.
4 Tiro, Sidon no área Filístia tomak,
Tanbasá mak imi halo nuneʼe mai haʼu?
Imi selu aat ba haʼu tanba haʼu halo aat ba imi ka?
Se imi halo aat ba haʼu,
Haʼu mós sei selu fali kedas ba imi tuir buat neʼebé imi halo.+
5 Tanba imi foti ona haʼu-nia osan-mutin no osan-mean,+
No imi lori haʼu-nia rikusoin neʼebé diʼak liu no tau iha imi-nia templu sira,
6 Imi faʼan ema Judá no Jeruzalein ba ema Gregu,+
Atu nuneʼe sira bá dook husi sira-nia rai.
7 Haʼu sei lori sira fila fali husi fatin neʼebé imi faʼan sira,+
No haʼu sei selu fali imi-nia hahalok aat sira-neʼe.
8 Haʼu sei faʼan imi-nia oan-mane no oan-feto sira ba ema Judá nia liman,+
No ema Judá sei faʼan fali sira ba ema husi Sabá, ba nasaun ida neʼebé dook liu;
Tanba Jeová rasik mak fó sai ona ida-neʼe.
9 Fó sai liafuan tuirmai neʼe iha nasaun sira-nia leet:+
‘Sai prontu bá atu halo funu!* Bolu asuwaʼin sira!
Tropa hotu tenke hakbesik no ataka!+
10 Tuku imi-nia xarrua sai fali surik no imi-nia sabit sai fali diman.
Ema neʼebé fraku tenke dehan: “Haʼu forte.”
11 Mai no ajuda malu bá, imi nasaun sira hotu iha sorin-sorin, halibur hamutuk!’”+
Oh Jeová, lori Ita-nia funu-naʼin sira neʼebé kbiit boot ba fatin neʼe.
12 “Nasaun sira sei halibur hamutuk no bá Rai-Tetuk Jeosafát,
Tanba haʼu sei tuur iha neʼebá atu tesi-lia ba nasaun sira hotu neʼebé haleʼu.+
13 Lolo sabit bá, tanba toʼos prontu ona atu koʼa.
Tun mai no sama uvas, tanba fatin atu halo tua-uvas sai nakonu ona.+
Tua-uvas fatin sai nakonu toʼo resin, tanba sira-nia hahalok aat sai barak tebes ona.
14 Iha ema barak tebes iha rai-tetuk desizaun nian,
Tanba loron neʼebé Jeová tesi-lia ba sira iha neʼebá besik ona.+
15 Loro-matan no fulan sei sai nakukun,
No fitun sira sei mós la nabilan tan.
16 Jeová sei hakilar husi Siaun hanesan leaun,
Nia sei hasai lian makaʼas husi Jeruzalein.
Lalehan no rai sei nakdoko,
Maibé Jeová sei sai fatin protesaun ba ninia povu,+
Sai uma neʼebé seguru ba povu Izraél.
17 Imi sei hatene duni katak haʼu mak Jeová, imi-nia Maromak, neʼebé hela iha Siaun, haʼu-nia foho santu.+
18 Iha loron neʼebá, foho sira sei nakonu ho tua-uvas neʼebé midar,+
Susubeen sei suli iha foho-oan sira,
No mota hotu iha Judá sei suli.
19 Maibé rai-Ejitu sei sai mamuk,+
No Edom sei sai rai-fuik neʼebé mamuk,+
Tanba sira halo violénsia hasoru povu Judá,+
No fakar ema laran-moos nia raan iha povu Judá nia rai.+
20 Maibé ema sei hela nafatin iha rai-Judá,
No ema sei hela iha Jeruzalein husi jerasaun ba jerasaun.+
21 Haʼu sei hamoos sira-nia sala uluk nian kona-ba ema nia raan,+
No Jeová sei hela iha Siaun.”+
Naran neʼe katak “Jeová mak Maromak”.
Ka “mundu tomak”.
Ka “feto joven”.
Haree “Hena karón” iha Glosáriu.
Ka “ninia laʼen”.
Neʼe bele refere mós ba sevada. Haree “Sakrifísiu trigu nian” iha Glosáriu.
Ka “baku imi-nia hirus-matan bá”.
Orj., “Halo santu”.
Ka karik “Figeira-fuan maran”.
Ka “mundu tomak”.
Ka “oin-mean”.
Ka “armas”.
Ka “sei sente triste”.
Ka “no sente triste”.
Neʼe bele refere mós ba sevada. Haree “Sakrifísiu trigu nian” iha Glosáriu.
Orj., “Halo santu”.
Haree Glosáriu.
Orj., “liman-rohan”.
Ka “hatudu laran-manas ba”.
Neʼe katak Tasi Mate.
Neʼe katak Tasi Mediterráneu.
Udan primeiru komesa maizumenus iha fulan-Outubru nia klaran no udan ikus komesa maizumenus iha fulan-Abríl nia klaran. Haree Ap. B15.
Naran neʼe katak “Jeová mak juís”.
Haree “Dada sorteiu” iha Glosáriu.
Ka “prostituta”.
Orj., “Halo santu funu bá!”
Ka “Uádi”. Haree Glosáriu.