AMÓS
1 Tuirmai neʼe mak liafuan husi Amós,* bibi-atan ida husi Tekoa.+ Nia simu liafuan tuirmai neʼe kona-ba Izraél liuhusi vizaun. Nia simu vizaun neʼe tinan rua antes rai-nakdoko,+ katak durante Liurai Uzias+ husi Judá nia tempu no durante Liurai Jeroboão+ husi Izraél, Joas+ nia oan-mane nia tempu. 2 Nia dehan:
“Jeová sei hakilar husi Siaun hanesan leaun,
No nia sei hasai lian makaʼas husi Jeruzalein.
Rai neʼebé bibi sira han duʼut matak sei halerik,
No Foho Karmel nia tutun sei maran.”+
3 “Jeová dehan nuneʼe:
‘“Damasku halo sala* fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
4 Tan neʼe, haʼu sei haruka ahi ba Hazael+ nia palásiu,
5 Haʼu sei harahun ai-lolon neʼebé xave Damasku+ nia portaun,
Haʼu sei halakon ema husi Bikat-Aven
Haʼu mós sei halakon ema neʼebé ukun* Bet-Eden,
No povu husi Síria sei sai dadur iha Kir”,+ Jeová mak dehan.’
6 Jeová dehan nuneʼe:
‘“Gaza+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba sira lori ema barak nuʼudar dadur+ no entrega sira ba Edom.
Haʼu sei foti liman hasoru Ekron,+
No ema restu husi Filístia sei mate”,+ Jeová, Naʼi Ukun-Naʼin Boot Liu, mak dehan.’
9 Jeová dehan nuneʼe:
‘Tiro+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba sira entrega ema barak ba Edom nuʼudar dadur,
No tanba sira haluha tiha aliansa entre maun-alin.+
11 Jeová dehan nuneʼe:
‘Edom+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba nia duni tuir ninia alin rasik ho surik,+
No tanba nia lakohi hatudu laran-sadiʼa,
Ho hirus nia kontinua lees sira,
No nia kontinua sai hirus makaʼas ba sira.+
13 Jeová dehan nuneʼe:
‘“Ema Ammon+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba sira lees feto isin-rua nia kabun, katak feto sira husi Gilead, tanba hakarak haluan sira-nia rai.+
14 Tan neʼe, haʼu sei sunu Rabá+ nia moru,
No ahi neʼe sei han Rabá nia palásiu sira,*
Tropa sira hakilar lian funu nian iha loron neʼebé sira ataka sidade neʼe,
No sei iha anin-fuik.
15 No sira-nia liurai sei sai dadur hamutuk ho ninia ulun-naʼin sira”,+ Jeová mak dehan.’
2 “Jeová dehan nuneʼe:
‘“Moab+ halo sala* fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba nia sunu liurai husi Edom nia ruin toʼo sai ahi-kadesan.*
2 Tan neʼe, haʼu sei haruka ahi ba Moab,
No ahi neʼe sei han Keriot+ nia palásiu sira.*
Moab sei mate bainhira funu-naʼin sira halo lian barullu,
Bainhira sira hakilar lian funu nian no huu dikur.+
3 Haʼu sei hasai ukun-naʼin* husi Moab nia leet
No haʼu sei oho ninia ulun-naʼin hotu hamutuk ho nia”,+ Jeová mak dehan.’
4 Jeová dehan nuneʼe:
‘Judá+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba sira la simu Jeová nia ukun-fuan,*
No tanba sira la halo tuir ninia lei sira.+
Maibé sira halo tuir lia-bosok neʼebé uluk sira-nia beiʼala sira halo tuir, no neʼe lori sira laʼo sala dalan.+
6 Jeová dehan nuneʼe:
‘Izraél+ halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira faʼan ema laran-loos atu hetan osan-mutin,
No faʼan ema kiak atu hetan sandálias.+
Mane ida no ninia aman halo relasaun ho feto neʼebé hanesan,
Hodi hafoʼer haʼu-nia naran neʼebé santu.
8 Sira foti ema nia roupa nuʼudar garantia ba buat neʼebé nia debe,*+ no nahe roupa neʼe iha altár+ hotu nia sorin hodi toba.
Sira haruka ema atu selu multa, no uza osan neʼe atu sosa tua-uvas no hemu iha sira-nia maromak nia templu.’
9 ‘Maibé haʼu halakon ona ema Amoreu husi sira-nia oin;+
Ema Amoreu neʼebé ain-aas hanesan ai-sedru no forte hanesan ai-karvallu.
Sira mak hanesan ai-hun, no haʼu estraga sira-nia fuan no abut.+
10 Haʼu lori sai ona imi husi rai-Ejitu,+
No haʼu halo imi laʼo iha rai-fuik ba tinan 40,+
Atu bele foti ema Amoreu nia rai nuʼudar imi-nian.
11 Haʼu hili imi-nia oan-mane balu nuʼudar profeta+
No imi-nia oan-mane joven balu nuʼudar ema Nazireu.+
Oh povu Izraél, haʼu halo ona buat sira-neʼe ba imi, loos ka lae?’ Jeová mak dehan.
12 ‘Maibé imi kontinua fó tua-uvas ba ema Nazireu atu hemu,+
No imi bandu profeta sira, hodi dehan: “Imi labele fó sai profesia.”+
13 Tan neʼe, haʼu sei sama rahun imi iha imi-nia fatin,
Hanesan karrosa neʼebé nakonu ho trigu* foun sei sama rahun buat neʼebé iha ninia okos.
14 Ema neʼebé isin-moris sei la iha fatin atu halai,+
Ema neʼebé forte sei lakon ninia kbiit,
No la iha funu-naʼin ida mak bele salva ninia moris rasik.
15 Ema neʼebé hana rama-oan sei la hamriik metin iha ninia fatin,
Ema neʼebé halai lalais sei la salva ninia moris,
No ema neʼebé saʼe kuda labele salva ninia moris.
16 Mane neʼebé brani* liu hotu iha funu-naʼin sira-nia leet,
Sei halai ho isin-tanan iha tempu neʼebá’,+ Jeová mak dehan.”
3 “Oh povu Izraél, rona ba Jeová nia liafuan tuirmai neʼebé nia koʼalia kona-ba imi, kona-ba família hotu neʼebé nia lori sai husi rai-Ejitu:
2 ‘Husi família hotu iha rai, só imi deʼit mak haʼu koñese.+
Tan neʼe haʼu sei tesi-lia ba imi tuir sala hotu neʼebé imi halo.+
3 Ema naʼin-rua bele laʼo hamutuk se sira seidauk planu ka lae?
4 Leaun sei hasai lian iha ai-laran se la iha animál ida atu nia kaer ka lae?
Leaun-aman sei hasai lian husi ninia subar-fatin se nia seidauk kaer buat ruma ka lae?
5 Manu ida bele tama ba lasu se ema seidauk tau lasu* iha rai ka lae?
Lasu ida bele taka mesak deʼit se animál ruma la tama uluk ka lae?
6 Se ema huu dikur iha sidade, povu sei nakdedar, loos ka lae?
Se susar mosu iha sidade, Jeová mak lori susar neʼe, loos ka lae?
7 Tanba Jeová, Naʼi Ukun-Naʼin Boot Liu, sei la halo buat ida
Se nia la fó sai uluk ninia segredu ba ninia atan profeta sira.+
8 Leaun ida hasai lian ona!+ Sé mak la sai taʼuk?
Jeová, Naʼi Ukun-Naʼin Boot Liu, koʼalia ona! Sé mak sei la fó sai profesia?’+
Hatete nuneʼe bá: “Halibur hamutuk iha Samaria nia foho sira,+
Haree ba susar sira neʼebé mosu iha ninia leet
No haree oinsá ema lohi hodi hamatak malu iha sidade laran.+
10 Tanba sira la hatene oinsá atu halo buat neʼebé loos”, Jeová dehan,
“Sira rai rikusoin neʼebé sira hadau liuhusi violénsia no harahun sira-nia palásiu sira.”’*
11 Tan neʼe, Jeová, Naʼi Ukun-Naʼin Boot Liu, dehan nuneʼe:
‘Inimigu ida sei haleʼu rai neʼe,+
Nia sei halakon ó-nia kbiit,
12 Jeová dehan nuneʼe:
‘Ema Izraél sira agora tuur iha kama furak nia leten no iha sofá neʼebé kapás* iha Samaria,+
Maibé, hanesan bibi-atan ida rasta sai bibi nia ain rua ka bibi nia tilun husi leaun nia ibun,
Nuneʼe mós ema Izraél balu deʼit mak sei halai sees husi inimigu nia liman.’
13 Jeová, Naʼi Ukun-Naʼin Boot Liu, Maromak neʼebé ukun tropa lalehan nian, dehan: ‘Rona no fó avizu* ba Jacob nia umakain.
14 Iha loron neʼebé haʼu tesi-lia ba Izraél tanba ninia hahalok sala* hotu,+
Haʼu mós sei tesi-lia ba Betel nia altár sira,+
Haʼu sei tesi altár sira-neʼe nia dikur no halo sira monu ba rai.+
15 Haʼu sei sobu uma neʼebé sira hela durante tempu malirin no uma neʼebé sira hela durante tempu manas.’
4 “Rona ba liafuan tuirmai neʼe, imi neʼebé hanesan karau-inan husi Basan,
Imi neʼebé hela iha foho Samaria nian,+
Imi feto sira neʼebé lohi hodi hamatak ema kiʼik,+ no hanehan ema kiak,
Imi neʼebé hatete ba imi-nia laʼen:* ‘Lori tua mai atu ami bele hemu!’
2 Jeová, Naʼi Ukun-Naʼin Boot Liu, Maromak neʼebé santu, jura ona hodi dehan:
‘“Tempu sei toʼo mai bainhira inimigu sei hiʼit saʼe imi ho besi-kaʼit naʼan nian
No hiʼit saʼe imi seluk ho kail ikan nian.
3 Imi ida-idak sei laʼo loos ba oin liuhusi moru nia kuak sira,
No inimigu sei soe imi ba Harmon”, Jeová mak dehan.’
5 Sunu paun neʼebé iha fermentu nuʼudar sakrifísiu agradese nian,+
Fó avizu ho lian boot kona-ba imi-nia sakrifísiu neʼebé imi fó ho hakarak rasik!
Tanba imi gosta atu halo nuneʼe, oh povu Izraél’, Jeová, Naʼi Ukun-Naʼin Boot Liu, mak dehan.
6 ‘Haʼu, haʼu hasai ona ai-han husi imi-nia nehan* iha imi-nia sidade sira hotu
No haʼu hamenus ai-han iha imi-nia uma hotu.+
Maski nuneʼe, imi lakohi fila fali mai haʼu’,+ Jeová mak dehan.
7 ‘Haʼu mós hanetik ona udan atu labele tun ba imi ba fulan tolu antes tempu koʼa nian.+
Haʼu halo udan tau iha sidade ida maibé la tau iha sidade seluk.
Haʼu hatún udan ba ema ida nia rai,
Maibé ema seluk nia rai la hetan udan, no sai maran hotu.
8 Povu husi sidade rua ka tolu hakaʼas an tebes atu laʼo ba sidade ida atu buka bee,+
Maibé bee la toʼo ba sira atu hemu.
Maski nuneʼe, imi lakohi fila fali mai haʼu’,+ Jeová mak dehan.
9 ‘Haʼu lori rai-manas makaʼas no kulapur+ ba imi-nia toʼos.
Imi aumenta imi-nia toʼos no toʼos-uvas sira,
Maibé gafañotu han imi-nia ai-figeira no ai-oliveira.+
Maski nuneʼe, imi lakohi nafatin fila fali mai haʼu’,+ Jeová mak dehan.
10 ‘Haʼu haruka moras-peste* ba imi-nia leet hanesan ida neʼebé uluk kona rai-Ejitu.+
Haʼu oho imi-nia mane joven ho surik+ no kaer imi-nia kuda.+
Dois husi mate-isin nakonu iha imi-nia hela-fatin.+
Maski nuneʼe, imi lakohi fila fali mai haʼu’, Jeová mak dehan.
11 ‘Haʼu estraga imi-nia rai
Hanesan haʼu estraga Sodoma no Gomorra.+
Imi neʼebé hetan salvasaun mak hanesan ai rohan neʼebé foti sai husi ahi neʼebé lakan hela.
Maski nuneʼe, imi lakohi fila fali mai haʼu’,+ Jeová mak dehan.
12 Entaun oh Izraél, haʼu sei fó kastigu fali ba imi.
Oh Izraél, sai prontu bá atu hasoru imi-nia Maromak,
Tanba haʼu sei fó kastigu ba imi.
13 Tanba nia mak Maromak neʼebé kria foho sira+ no anin,+
Nia fó sai ninia hanoin ba ema,
Nia halo rai naroman sai fali nakukun,+
Nia sama fatin aas sira iha rai,+
Ninia naran mak Jeová, Maromak neʼebé ukun tropa lalehan nian.”
5 “Oh umakain Izraél, rona ba liafuan neʼebé haʼu fó sai ba imi nuʼudar knananuk triste nian:*
2 ‘Izraél mak hanesan feto virjen neʼebé monu tiha ona,
Nia labele hamriik fali.
Ema hotu husik hela nia iha ninia rai rasik,
La iha ema ida atu ajuda nia hamriik fali.’
3 “Tanba Jeová, Naʼi Ukun-Naʼin Boot Liu, dehan nuneʼe:
‘Sidade neʼebé haruka ema naʼin-rihun ida atu bá funu sei hela deʼit ema naʼin-atus ida,
No sidade neʼebé haruka ema naʼin-atus ida atu bá funu sei hela deʼit ema naʼin-sanulu. Neʼe sei akontese ba umakain Izraél.’+
4 “Tanba Jeová dehan nuneʼe ba umakain Izraél:
‘Buka haʼu hodi bele kontinua moris.+
6 Buka Jeová hodi bele kontinua moris,+
Atu nuneʼe nia la sai hanesan ahi-lakan ba José nia umakain,
Hodi han mohu Betel, no la iha ema ida mak bele hamate ahi neʼe.
7 Imi halo justisa sai fali ai-tahan neʼebé moruk,
No imi soe deʼit hahalok loos ba rai.+
8 Maromak halo fitun-lubun Kima no fitun-lubun Kesil,+
Maromak halo nakukun sai fali dadeer,
Maromak halo loron sai nakukun hanesan iha kalan,+
Maromak halibur tasi-been
Atu bele fakar fali ba rai.+
Ninia naran mak Jeová.
9 Nia sei halakon ema sira neʼebé forte,No harahun uma boot sira neʼebé metin.
10 Sira odi ema neʼebé fó konsellu iha sidade nia portaun,
No sira hakribi ema neʼebé koʼalia sai buat neʼebé loos.+
11 Imi haruka ema kiak atu selu imi hodi aluga toʼos sira*
No imi foti ninia trigu* nuʼudar impostu,+
Tan neʼe, imi sei la hela tan iha uma neʼebé imi harii ho fatuk neʼebé fera ona+
No mós imi sei la hemu tan tua-uvas husi imi-nia toʼos-uvas neʼebé diʼak liu.+
12 Haʼu hatene sala* sira neʼebé imi halo fila-fila
No hatene imi-nia sala sira mak boot.
Imi fó susar ba ema neʼebé laran-loos,
Imi simu prezente hodi bobar lia-loos,*
No imi nega ema kiak nia direitu iha sidade nia portaun.+
13 Iha tempu neʼebá, sira neʼebé matenek sei nonook deʼit,
Tanba tempu neʼebá mak susar tebes.+
Karik Jeová, Maromak neʼebé ukun tropa lalehan nian, sei hamutuk ho imi,
Hanesan imi hatete ona katak nia hamutuk ho imi.+
15 Odi buat neʼebé aat, no hadomi buat neʼebé diʼak,+
Halaʼo justisa iha imi-nia sidade nia portaun.+
Karik Jeová, Maromak neʼebé ukun tropa lalehan nian,
Sei hatudu laran-diʼak ba ema restu husi José.’+
16 “Tan neʼe Jeová, Maromak neʼebé ukun tropa lalehan nian, Jeová dehan:
‘Ema sei tanis halerik iha sidade nia fatin públiku hotu,
No iha dalan hotu, ema sei dehan: “Susar, susar!”
Sira sei haruka toʼos-naʼin atu tanis halerik
No sira sei selu ema atu lelir.’
17 ‘Ema sei tanis halerik iha toʼos-uvas hotu,+
Tanba haʼu sei liu imi-nia leet atu fó kastigu’, Jeová mak dehan.
18 ‘Susar ba ema neʼebé hein namanas ba Jeová nia loron!+
Saida mak sei akontese ba imi iha Jeová nia loron?+
Iha loron neʼe sei iha nakukun, no naroman sei la iha.+
19 Loron neʼe sei sai hanesan mane neʼebé halai husi leaun maibé ursu mak hasoru nia,
No bainhira nia tama ba ninia uma no tau ninia liman ba didin, samea mak tata fali nia.
20 Iha Jeová nia loron sei iha nakukun, no naroman sei la iha.
Loron neʼe sei iha deʼit nakukun, no la iha naroman.
21 Haʼu odi, haʼu hakribi imi-nia festa sira,+
Haʼu la kontente ho imi-nia sakrifísiu sira-nia morin neʼebé imi hasaʼe iha imi-nia reuniaun santu sira.
22 Maski imi fó sakrifísiu sunu nian neʼebé hasaʼe tomak no sakrifísiu seluk ba haʼu,
Haʼu sei la kontente ho buat sira-neʼe.+
Haʼu sei la simu animál bokur neʼebé imi hasaʼe nuʼudar sakrifísiu dame nian.+
23 Keta kanta imi-nia knananuk sira hodi halo barullu deʼit,
Haʼu lakohi rona lian husi imi-nia instrumentu sira neʼebé iha talin.+
24 Halo imi-nia justisa suli sai hanesan bee,+
No halo imi-nia hahalok loos suli sai hanesan mota neʼebé suli nafatin.
25 Oh umakain Izraél, durante tinan 40 nia laran neʼebé imi iha rai-fuik,
Imi hasaʼe sakrifísiu no prezente sira mai haʼu ka lae?+
26 Agora imi sei lori imi-nia liurai Sakut no Kaivan* hamutuk ho imi bainhira imi sai dadur,
Imi sei lori imi-nia estátua sira, imi-nia maromak fitun nian, neʼebé imi halo ba imi-nia an,
27 No haʼu sei haruka imi ba rai neʼebé dook liu Damasku nuʼudar dadur’,+ Maromak neʼebé naran Jeová, neʼebé ukun tropa lalehan nian,+ mak dehan.”
6 “Susar ba ema sira neʼebé fiar an* demais iha Siaun,
Ba ema sira neʼebé sente seguru iha foho Samaria,+
Ema-boot sira husi nasaun neʼebé boot liu,
Sira neʼebé umakain Izraél tau fiar!
2 Bá Kalne no haree.
Husi Kalne bá toʼo sidade boot Hamat+
No tun ba sidade Gat iha ema Filístia nia rai.
Sira-nia ukun mak diʼak liu fali imi-nian* ka lae?
Ka sira-nia rai boot liu fali imi-nian ka lae?
4 Imi toba iha kama husi marfín+ no sadere an iha sofá sira,+
Imi han naʼan husi bibi-malae aman neʼebé diʼak liu iha bibi-lubun nia leet, no karau-oan neʼebé bokur.+
5 Imi halo knananuk sira atu kanta hamutuk ho arpa,*+
No imi inventa instrumentu múzika nian hanesan David.+
6 Imi hemu tua-uvas ho kopu boot+
No kose mina neʼebé diʼak liu ba imi-nia an.
Maibé imi la hanoin* kona-ba José nia susar.+
7 Tan neʼe, imi sei sai dadur* no laʼo uluk iha dadur sira seluk nia oin,+
No imi-nia tempu festa no halimar sei remata.
8 Jeová, Maromak neʼebé ukun tropa lalehan nian, dehan: ‘Jeová, Naʼi Ukun-Naʼin Boot Liu, jura hodi ninia an rasik:*+
“Haʼu odi Jacob nia hahalok foti an,+
Haʼu hakribi ninia palásiu sira,*+
No haʼu sei entrega sidade neʼe no buat hotu neʼebé iha laran ba inimigu sira.+
9 “‘“Se karik mane naʼin-sanulu moris hela iha uma ida nia laran, sira mós sei mate. 10 Sira-nia família* ida sei mai atu lori sai sira ba uma nia liʼur no sunu sira ida-idak. Nia sei lori sira-nia ruin husi uma laran, tuirmai nia sei dehan ba ema iha uma laran: ‘Iha ema seluk tan hamutuk ho ó?’ Ema neʼe sei hatán: ‘La iha!’ Depois neʼe, nia sei dehan: ‘Nonook tiha! Tanba neʼe laʼós tempu atu temi naran Jeová.’”
11 Tanba Jeová mak fó mandamentu neʼe,+
Nia sei baku rahun uma boot toʼo uut,
No baku rahun uma kiʼik toʼo uut.+
12 Kuda sira sei halai iha fatuk boot laran ka lae?
Ema sei uza karau atu fila rai iha fatuk laran ka lae?
Imi troka ona justisa ho ai-horis neʼebé iha venenu,
No hahalok loos ho ai-tahan neʼebé moruk.+
13 Imi haksolok kona-ba buat neʼebé folin-laek,
No imi dehan: “Ita sai forte ona* ho ita-nia kbiit rasik,+ loos ka lae?”
14 Tan neʼe, oh umakain Izraél, haʼu sei lori nasaun ida atu kontra imi,+
No sira sei hanehan imi husi Lebo-Hamat*+ toʼo Mota* iha área Araba.’ Jeová, Maromak neʼebé ukun tropa lalehan nian, mak dehan.”
7 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Nia haruka gafañotu barak bainhira fini neʼebé kuda ikus* komesa moris. Sira kuda fini neʼe bainhira ema tesi ona liurai nia duʼut. 2 Bainhira gafañotu han hotu ona ai-horis neʼebé iha rai neʼe, haʼu dehan: “Oh Jeová, Naʼi Ukun-Naʼin Boot Liu, favór ida, fó perdua ba sira!+ Oinsá mak Jacob bele tahan susar neʼe?* Tanba nia mak fraku!”+
3 Entaun Jeová hanoin fali* kona-ba neʼe,+ no Jeová dehan: “Neʼe sei la akontese.”
4 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Jeová, Naʼi Ukun-Naʼin Boot Liu, haruka ahi hodi fó kastigu. Ahi neʼe han bee kleʼan sira, no han mós rai balu. 5 Ho ida-neʼe, haʼu dehan: “Oh Jeová, Naʼi Ukun-Naʼin Boot Liu, favór ida, keta halo nuneʼe.+ Oinsá mak Jacob bele tahan susar neʼe?* Tanba nia mak fraku!”+
6 Entaun Jeová hanoin fali* kona-ba neʼe,+ no Jeová, Naʼi Ukun-Naʼin Boot Liu, dehan: “Neʼe mós sei la akontese.”
7 Nia hatudu buat tuirmai neʼe ba haʼu: Jeová hamriik iha moru leten neʼebé sukat ho tali-prumu,* no nia kaer tali-prumu iha ninia liman. 8 Tuirmai Jeová husu haʼu: “Amós, ó haree saida?” Haʼu hatán: “Tali-prumu.” Jeová hatete: “Haʼu sei tau tali-prumu iha haʼu-nia povu Izraél nia leet. Haʼu sei la fó perdua tan ba sira.+ 9 Isaac nia fatin aas* sira+ sei rahun, no Izraél nia fatin santu sira sei estraga tiha,+ no haʼu sei bá kontra Jeroboão nia umakain ho surik.”+
10 Amlulik Amazias husi Betel+ haruka lia-menon tuirmai neʼe ba Liurai Jeroboão+ husi Izraél: “Amós halo planu aat ba Ita-Boot iha umakain Izraél+ nia leet. Ema iha rai neʼe labele tahan ona ho buat hotu neʼebé nia koʼalia.+ 11 Tanba Amós hatete: ‘Jeroboão sei mate ho surik, no ema Izraél sei sai dadur* iha rai seluk.’”+
12 Entaun Amazias dehan ba Amós: “Ó neʼebé fó sai vizaun, sai husi neʼe, halai ba rai-Judá, no buka moris* iha neʼebá. Iha fatin neʼebá mak ó bele fó sai profesia.+ 13 Maibé ó labele fó sai tan profesia iha Betel,+ tanba fatin neʼe mak liurai nia fatin sagradu+ no templu* ba ninia ukun.”
14 Tuirmai Amós hatán ba Amazias: “Uluk haʼu laʼós profeta ida no haʼu mós laʼós profeta nia oan, uluk haʼu bibi-atan ida,+ no tau matan ba ai-sikómoru sira.* 15 Maibé Jeová hasai haʼu husi haʼu-nia serbisu nuʼudar bibi-atan no Jeová hatete ba haʼu: ‘Bá, fó sai profesia ba haʼu-nia povu Izraél.’+ 16 Tan neʼe, rona Jeová nia liafuan bá: ‘Ó dehan: “Keta fó sai profesia hodi kontra Izraél,+ no keta fó sai liafuan+ kontra Isaac nia umakain.” 17 Tan neʼe, Jeová dehan nuneʼe: “Ó-nia feen sei sai feto-aat* iha sidade laran. Ó-nia oan-mane no oan-feto sira sei mate ho surik. Ema sei sukat ó-nia rai ho tali sukat nian no fahe rai neʼe ba malu, no kona-ba ó, ó sei mate iha rai seluk, no ema Izraél sei sai duni dadur iha rai seluk.”’”+
8 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Iha raga neʼebé nakonu ho ai-fuan oioin.* 2 Tuirmai nia husu: “Amós, ó haree saida?” Haʼu hatán: “Iha raga neʼebé nakonu ho ai-fuan oioin.” Entaun Jeová hatete ba haʼu: “Haʼu-nia povu Izraél nia tempu toʼo ona rohan. Haʼu sei la fó tan perdua ba sira.+ 3 ‘Knananuk sira iha templu sei sai fali halerik,+ no mate-isin barak sei lekar iha fatin hotu.+ Nonook deʼit!’ Jeová, Naʼi Ukun-Naʼin Boot Liu, mak dehan.
4 Rona bá, imi neʼebé hanehan ema kiak
No imi neʼebé halakon ema laran-maus husi rai neʼe,+
5 Imi dehan: ‘Bainhira mak festa fulan-foun nian sei remata,+ hodi ami bele faʼan ami-nia ai-han?*
Bainhira mak loron Sábadu+ sei remata, hodi ami bele faʼan ami-nia ai-han?
Atu nuneʼe ami bele halo fatin sukat efa* nian sai kiʼik liu
No halo dasin-fuan* sai todan liu,
Hodi halo dasin neʼebé la loos;+
6 Atu nuneʼe ami bele faʼan ai-han neʼebé aat ona
No sosa ema kiak ho osan-mutin,
No sosa ema kiʼik sira ho sandálias nia folin.’+
7 Jeová, neʼebé mak Jacob nia glória,+ jura hodi ninia an rasik dehan:
‘Haʼu sei nunka haluha sira-nia hahalok hotu.+
Rai tomak sei sai hanesan bee iha Mota Nilo neʼebé nakonu toʼo resin,
No sira hotu sei sai hanesan bee neʼebé la hakmatek iha Mota Nilo iha rai-Ejitu durante tempu udan.’+
9 Jeová, Naʼi Ukun-Naʼin Boot Liu, hatete nuneʼe: ‘Iha loron neʼebá,
Haʼu sei halo loro-matan tun maski meiudia hela,
No haʼu sei halo rai sai nakukun maski loro-matan fó naroman hela.+
10 Haʼu sei halo imi-nia festa sira sai fali tempu triste nian+
No imi-nia knananuk hotu sai fali knananuk triste nian.*
Haʼu sei halo ema hotu tau hena karón* iha sira-nia knotak no koi molik sira-nia ulun,
Haʼu sei halo loron neʼe sai hanesan tempu neʼebé ema tanis bainhira ninia oan-mane mesak mate,
No loron neʼe nia rohan sei sai moruk tebes.’
11 Jeová, Naʼi Ukun-Naʼin Boot Liu, hatete nuneʼe: ‘Tempu sei toʼo mai
Bainhira haʼu halo hamlaha boot mosu iha rai neʼe,
Neʼe laʼós hamlaha ba ai-han ka hamrook ba bee,
Maibé hamlaha atu rona Jeová nia liafuan.+
12 Sira sei hakaʼas an laʼo husi tasi ida ba tasi seluk
No husi parte norte ba parte leste.*
Sira sei laʼo-lemo hodi buka Jeová nia liafuan, maibé sira sei la hetan.
13 Iha loron neʼebá, feto virjen sira neʼebé bonita sei dezmaia,
Nuneʼe mós ho mane joven sira, tanba sira hamrook.
14 Sira neʼebé jura hodi Samaria+ nia sala no dehan:
“Oh Dan,+ haʼu jura hodi ó-nia maromak neʼebé moris!”
No “Haʼu jura hodi dalan Beer-Seba+ nian!”
Sira sei monu, no sira sei la hamriik fali.’”+
9 Haʼu haree Jeová+ hamriik iha altár leten, no nia dehan: “Baku uma riin sira-nia tutun, no sira-nia hun sei nakdoko. Tesi tiha uma riin sira-nia tutun, no haʼu sei halakon ema restu ho surik. La iha ema ida mak bele halai sees ka salva ninia moris.+
2 Se sira keʼe rai kleʼan hodi subar iha rate,*
Haʼu-nia liman sei hasai sira husi neʼebá.
No se sira saʼe ba lalehan,
Haʼu sei lori tun sira husi neʼebá.
3 Se sira subar an iha Foho Karmel nia tutun,
Haʼu sei buka sira no lori tun sira husi neʼebá.+
Se sira subar an husi haʼu iha tasi okos,
Haʼu sei haruka samea atu tata sira iha neʼebá.
4 Se sira-nia inimigu lori sira bá nuʼudar dadur,
Haʼu sei haruka surik atu oho sira iha neʼebá.+
Haʼu sei hateke ba sira atu lori susar ba sira, laʼós atu halo buat neʼebé diʼak.+
5 Jeová, Naʼi Ukun-Naʼin Boot Liu, Maromak neʼebé ukun tropa lalehan nian, mak kona rai neʼe*
No halo rai neʼe sai nabeen,+ no ema hotu neʼebé hela iha rai neʼe sei lelir.+
Rai tomak sei sai hanesan bee neʼebé nakonu toʼo resin iha Mota Nilo,
No hanesan bee neʼebé la hakmatek iha Mota Nilo iha rai-Ejitu durante tempu udan.+
6 Maromak neʼebé halo ninia eskada iha lalehan
No harii lalehan hanesan uma-kakuluk ba rai.
Maromak neʼebé halibur tasi-been
Atu bele fakar fali bee neʼe ba rai.+
Ninia naran mak Jeová.+
7 Jeová hatete: ‘Oh povu Izraél, ba haʼu, imi hanesan deʼit ho ema Kus nia oan sira.
Haʼu mak lori sai ema Izraél husi rai-Ejitu, loos ka lae?+
Haʼu mak lori sai ema Filístia husi Kreta+ no ema Síria husi Kir,+ loos ka lae?’
8 ‘Haʼu Jeová, Naʼi Ukun-Naʼin Boot Liu, haʼu-nia matan hateke ba nasaun neʼebé halo sala,
No haʼu sei halakon nasaun neʼe husi rai nia leten.+
Maibé haʼu sei la halakon Jacob nia umakain toʼo hotu’,+ Jeová mak dehan.
9 ‘Tanba haʼu sei fó sai ona mandamentu,
Katak haʼu sei doko umakain Izraél iha nasaun hotu nia leet,+
Hanesan ema peneira trigu,
Atu nuneʼe la iha fatuk musan ida mak monu ba rai.
10 Sala-naʼin hotu husi haʼu-nia povu nia leet sei mate ho surik,
Sira neʼebé dehan: “Susar neʼe sei la besik ita ka kona ita.”’
11 ‘Iha loron neʼebá haʼu sei harii fali David nia tenda*+ neʼebé monu ona,
Haʼu sei hadiʼa moru nia kuak sira,
No haʼu sei harii fali buat neʼebé rahun ona.
Haʼu sei harii fali neʼe hanesan tempu uluk,+
12 Atu nuneʼe sira bele foti buat restu husi Edom,+
No husi nasaun sira hotu neʼebé lori haʼu-nia naran’, Jeová neʼebé kumpre buat sira-neʼe mak dehan.
13 Jeová hatutan tan: ‘Haree bá! Tempu sei toʼo mai
Bainhira ema neʼebé fila rai sei toman ema neʼebé koʼa trigu,
No ema neʼebé sama uvas-fuan sei toman ema neʼebé kari fini.+
No tua-uvas midar sei suli iha foho sira,+
14 Haʼu sei halibur fali haʼu-nia povu Izraél husi dadur,+
No sira sei harii fali sidade sira neʼebé mamuk no hela iha neʼebá.+
Sira sei kuda uvas iha toʼos no hemu tua-uvas,+
No halo toʼos sira no han ai-fuan sira.’+
15 ‘Haʼu sei kuda fali sira iha sira-nia rai,
No ema sei nunka fokit sai fali sira
Husi sira-nia rai neʼebé haʼu fó ona ba sira’,+ Jeová, ó-nia Maromak, mak dehan.”
Naran neʼe katak “Nuʼudar naha” ka “Lori naha”.
Ka “krime”.
Orj., “sira hanehan Gilead ho besi neʼebé uza atu sama trigu”.
Orj., “torre sira neʼebé seguru”. Haree “Torre” iha Glosáriu.
Orj., “ema neʼebé kaer liurai nia ai-tonka husi”.
Orj., “torre sira neʼebé seguru”.
Orj., “ema neʼebé kaer liurai nia ai-tonka husi”.
Orj., “torre sira neʼebé seguru”.
Orj., “torre sira neʼebé seguru”.
Orj., “torre sira neʼebé seguru”.
Ka “krime”.
Orj., “ahu”.
Orj., “torre sira neʼebé seguru”.
Orj., “juís”.
Ka “hanorin”.
Orj., “torre sira neʼebé seguru”.
Ka “nuʼudar peñór”.
Neʼe bele refere mós ba sevada.
Ka “neʼebé laran forte”.
Ka karik “ema la tau hahán iha laran”.
Orj., “torre sira neʼebé seguru”.
Orj., “torre sira neʼebé seguru”.
Orj., “torre sira neʼebé seguru”.
Orj., “torre sira neʼebé seguru”.
Ka “sofá neʼebé halo iha Damasku”.
Ka “fó sasin”.
Ka “krime”.
Haree Glosáriu.
Ka “naʼi”.
Ka “kontra bá”.
Ka “la fó ai-han ba imi atu han”.
Haree Glosáriu.
Ka “knananuk lelir nian”.
Haree “Ezíliu” iha Glosáriu.
Ka karik “sei sai fatin neʼebé aat”.
Ka “selu impostu rai nian”.
Neʼe bele refere mós ba sevada.
Ka “krime”.
Ka “simu osan atu taka ibun”.
Maromak rua neʼe karik refere ba planeta Saturnu neʼebé ema adora nuʼudar maromak.
Ka “sente seguru”.
Karik neʼe refere ba Judá no Izraél nia ukun.
Ka “instrumentu neʼebé iha talin”.
Ka “la sente moras”.
Haree “Ezíliu” iha Glosáriu.
Ka “ninia moris rasik”. Haree “Nefes” iha Glosáriu.
Orj., “torre sira neʼebé seguru”.
Orj., “Sira-nia aman nia maun-alin”.
Orj., “Ita foti ona dikur sira”.
Ka “fatin atu tama ba Hamat”.
Ka “Uádi”. Haree Glosáriu.
Neʼe katak durante fulan-Janeiru no Fevereiru.
Orj., “bele hamriik”.
Ka “sente triste”.
Orj., “bele hamriik”.
Ka “sente triste”.
Neʼe mak tali ho besi neʼebé kesi iha rohan. Ema uza ida-neʼe atu sukat se didin hamriik loos ka kleʼuk.
Haree “Fatin aas” iha Glosáriu.
Haree “Ezíliu” iha Glosáriu.
Orj., “no han paun”.
Orj., “uma”.
Ka “no haʼu tuu ai-sikómoru nia fuan”. Haree “Ai-sikómoru” iha Glosáriu.
Ka “prostituta”.
Liuliu figeira-fuan no karik mós palmeira-fuan.
Karik neʼe mak trigu ka sevada.
Haree Ap. B14.
Orj., “siklo”. Haree Ap. B14.
Ka “mundu”.
Ka “knananuk lelir nian”.
Haree “Hena karón” iha Glosáriu.
Ka “fatin neʼebé loro-matan saʼe”.
Haree “Siol” iha Glosáriu.
Ka “mundu tomak”.
Ka “barraka”.
Orj., “No foho-oan hotu sei nabeen”.