KARTA BA FILEMON

1 Karta neʼe husi haʼu, Paulo, neʼebé sai dadur+ tanba Kristu Jesus, no husi ita-nia maluk fiar-naʼin Timóteo,+ ba ami-nia maluk serbisu-naʼin Filemon neʼebé ami hadomi, 2 no ba ami-nia feton Áfia, ba ami-nia maluk funu-naʼin Arkipo,+ no ba kongregasaun* neʼebé iha ó-nia uma:+

3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak neʼebé boot no haraik dame ba imi.

4 Haʼu sempre fó agradese ba haʼu-nia Maromak kuandu haʼu temi ó iha haʼu-nia orasaun,+ 5 tanba haʼu rona beibeik kona-ba ó-nia fiar no domin neʼebé ó hatudu ba Naʼi Jesus no ba ema santu* hotu. 6 Haʼu harohan katak fiar neʼebé ó iha hanesan ema seluk nian, bele book ó atu rekoñese buat diʼak hotu neʼebé ita simu liuhusi Kristu. 7 Haʼu hetan ona ksolok boot no sente kmaan tanba haʼu rona kona-ba ó-nia domin, tanba ema santu sira-nia laran* hetan kmaan liuhusi ó neʼebé mak haʼu-nia maluk fiar-naʼin.

8 Tanba razaun neʼe, maski haʼu iha liberdade atu koʼalia nuʼudar Kristu nia apóstolu hodi haruka ó atu halo buat neʼebé loos, 9 maibé diʼak liu haʼu husu ó atu halo ida-neʼe tanba ó-nia domin, tanba haʼu Paulo, haʼu katuas ona no agora haʼu iha dadur laran tanba Kristu Jesus. 10 Haʼu husu ó buat ida kona-ba haʼu-nia oan Onésimo,+ tanba haʼu sai ona hanesan aman+ ba nia bainhira haʼu iha komarka laran. 11 Uluk nia la iha folin ba ó, maibé agora nia folin-boot ba ó no ba haʼu. 12 Agora haʼu haruka nia fila fali ba ó, nia mak ema neʼebé haʼu hadomi.*

13 Haʼu hakarak atu nia hela hamutuk ho haʼu iha neʼe atu nuneʼe nia bele kontinua ajuda haʼu hodi taka ó-nia fatin, durante haʼu iha dadur tanba liafuan diʼak.+ 14 Maibé haʼu lakohi halo buat ida se la hetan lisensa husi ó, atu nuneʼe ó halo buat diʼak laʼós tanba haʼu mak obriga, maibé tanba ó-nia hakarak rasik.+ 15 Karik tan neʼe mak nia haketak an husi ó ba tempu badak,* atu nuneʼe ó bele simu fali nia ba nafatin, 16 laʼós tan nuʼudar atan,+ maibé liu fali atan, nuʼudar maluk fiar-naʼin. Haʼu hadomi tebes nia,+ maibé ó sei hadomi nia liután nuʼudar atan no mós nuʼudar maluk fiar-naʼin iha Naʼi. 17 Tan neʼe, se ó haree haʼu nuʼudar belun, simu nia bá ho laran-diʼak hanesan ó simu haʼu. 18 Liután neʼe, se nia halo sala ruma ba ó ka debe buat ruma husi ó, husik haʼu mak lori ninia todan. 19 Haʼu Paulo, haʼu hakerek ho haʼu-nia liman rasik katak haʼu sei selu fali buat neʼebé Onésimo debe. Tuir loloos, ó hatene katak ó debe haʼu kona-ba ó-nia moris rasik. 20 Sin, haʼu-nia maluk fiar-naʼin, haʼu hein katak haʼu bele simu ajuda neʼe husi ó iha Naʼi. Fó kmaan ba haʼu-nia laran* iha Kristu.

21 Haʼu fiar katak ó sei halo tuir buat neʼebé haʼu husu, tan neʼe mak haʼu hakerek ba ó, tanba haʼu hatene katak ó sei halo barak liu fali buat neʼebé haʼu dehan. 22 Maibé laʼós neʼe deʼit, ó mós prepara fatin ba haʼu atu hela, tanba haʼu hein katak liuhusi imi-nia orasaun sira haʼu sei fila fali ba imi.*+

23 Epafras+ haruka kumprimentus ba ó, nia mak haʼu-nia maluk dadur tanba Kristu Jesus, 24 nuneʼe mós Marcos, Aristarco,+ Demas+ no Lucas haruka sira-nia kumprimentus,+ sira mak haʼu-nia maluk serbisu-naʼin.

25 Haʼu hein katak Naʼi Jesus Kristu nia laran-diʼak neʼebé boot sei hamutuk ho espíritu* neʼebé imi hatudu.