KARTA HUSI TIAGO

1 Husi Tiago,+ Maromak nia atan no mós Naʼi Jesus Kristu nia atan, ba suku 12 neʼebé namkari iha fatin oioin:

Kumprimentus ba imi!

2 Haʼu-nia maun-alin sira, haksolok bá kuandu imi hasoru susar* oioin,+ 3 tanba imi hatene katak imi-nia fiar neʼebé hetan ona koko iha dalan hanesan neʼe sei halo imi aprende atu tahan susar.+ 4 Hodi tahan nafatin susar, imi sei treinu didiʼak imi-nia an, atu nuneʼe imi bele sai kompletu no sai diʼak iha buat hotu, hodi la falta buat ida.+

5 Tan neʼe, se imi ida presiza matenek, nia tenke husu beibeik ba Maromak,+ no Maromak sei fó matenek ba nia,+ tanba Maromak fó ba ema hotu ho laran-luak no la hamoe sira.*+ 6 Maibé nia tenke kontinua husu ho fiar+ no labele laran-rua,+ tanba ema neʼebé laran-rua mak hanesan tasi nia laloran neʼebé anin huu bá-mai. 7 Tuir loloos, ema hanesan neʼe labele hein katak nia sei simu buat ida husi Jeová;* 8 nia mak ema neʼebé halo desizaun namlele,+ no la metin iha ninia dalan hotu.

9 Maibé maun-alin sira neʼebé kiak tenke haksolok* tanba sira hetan ona pozisaun neʼebé aas,+ 10 no ema riku tenke haksolok tanba nia hetan pozisaun neʼebé kiʼik liu,+ tanba hanesan ai-funan iha rai-luan, nia sei lakon. 11 Tanba loro-matan saʼe no sai manas loos toʼo halo ai-funan neʼe namlaek, no ninia funan monu tiha no lakon ninia furak. Nuneʼe mós ho ema riku, nia sei lakon bainhira nia duni tuir rikusoin.+

12 Ksolok ba ema neʼebé kontinua tahan susar,+ tanba kuandu Maromak simu ona nia, nia sei simu koroa moris nian,+ koroa neʼebé Jeová* promete ona ba ema sira neʼebé kontinua hadomi nia.+ 13 Kuandu hasoru susar, ema ida labele dehan: “Maromak koko haʼu.” Tanba ema labele koko Maromak no nia mós la koko ema ida ho buat neʼebé aat. 14 Maibé ema ida-idak hetan koko liuhusi ninia hakarak rasik neʼebé dada nia no tenta nia.*+ 15 Tuirmai kuandu hakarak neʼe sai buras ona, neʼe hamosu sala,* no kuandu halo ona sala, neʼe sei lori ba mate.+

16 Haʼu-nia maun-alin doben sira, imi keta lohi imi-nia an.* 17 Prezente diʼak ida-idak no prezente hotu neʼebé perfeitu mai husi leten,+ no tun mai husi Aman naroman lalehan nian.+ Nia la muda ka la troka hanesan lalatak neʼebé muda bá-mai.+ 18 Nia fó moris ba ita liuhusi ninia liafuan lia-loos nian tanba neʼe mak ninia hakarak,+ atu nuneʼe ita bele sai hanesan ai-fuan primeiru husi ninia kriasaun sira.+

19 Haʼu-nia maun-alin doben sira, hatene ida-neʼe bá: Ema hotu tenke lalais atu rona, la ansi atu koʼalia,+ no neineik atu hirus,+ 20 tanba ema nia hirus la kumpre buat neʼebé loos iha Maromak nia oin.+ 21 Tan neʼe, soe tiha buat foʼer hotu no hahalok aat hotu,*+ no ho laran-maus simu Maromak nia liafuan neʼebé nia kuda daudaun iha imi, liafuan neʼebé bele salva imi.*

22 Maibé, imi tenke sai ema neʼebé halo tuir Maromak nia liafuan,+ laʼós ema neʼebé rona deʼit, no lohi ninia an ho hanoin neʼebé sala. 23 Tanba ema neʼebé rona deʼit Maromak nia liafuan no la halo tuir,+ nia hanesan ema neʼebé haree nia oin iha espellu. 24 Haree tiha ninia an, nia bá no haluha kedas nia mak ema oinsá. 25 Maibé ema neʼebé hateke didiʼak ba ukun-fuan neʼebé perfeitu+ no fó liberdade, no kontinua halo tuir ukun-fuan neʼe, nia laʼós ema neʼebé rona deʼit no haluha, maibé nia halo Maromak nia serbisu no nia sei haksolok ho ninia serbisu neʼe.+

26 Se ema ida hanoin katak nia adora Maromak, maibé la kontrola* ninia nanál,+ nia bosok ninia laran rasik no ninia adorasaun saugati deʼit. 27 Adorasaun* neʼebé moos no la foʼer tuir ita-nia Aman Maromak nia hanoin mak neʼe: tau matan ba oan-kiak+ no feto-faluk sira+ iha sira-nia susar,+ no kontinua hadook an husi hahalok aat iha mundu neʼe.+

2 Haʼu-nia maun-alin sira, imi hatudu fiar ba ita-nia Naʼi Jesus Kristu neʼebé iha glória, no iha tempu hanesan imi mós hatudu hahalok todan ba sorin ka?+ 2 Se ema naʼin-rua tama atu tuir imi-nia reuniaun, mane ida iha kadeli osan-mean iha ninia liman no hatais roupa karun, no mane ida seluk kiak no hatais roupa foʼer, 3 imi sei simu ema neʼebé hatais roupa karun ho kontente no dehan: “Ita-Boot tuur iha fatin diʼak neʼe”, no imi sei dehan ba ema kiak: “Ó hamriik deʼit”, ka dehan: “Tuur besik fatin neʼebé haʼu tau haʼu-nia ain.”+ 4 Se nuneʼe, imi haree ona grupu ida diʼak liu fali grupu seluk, loos ka lae?+ No imi sai ona juís neʼebé halo desizaun aat, loos ka lae?+

5 Haʼu-nia maun-alin doben sira, rona didiʼak bá. Maromak hili ema kiak sira tuir mundu nia haree atu sira sai riku ho fiar+ no simu ninia Ukun* nuʼudar liman-rohan, neʼebé nia promete ona ba sira neʼebé hadomi nia, loos ka lae?+ 6 Maibé imi la hatudu respeitu ba ema kiak sira. Ema riku sira mak hanehan imi+ no lori imi ba tribunál, loos ka lae? 7 Maromak fó ona naran diʼak ba imi, maibé sira koʼalia aat naran neʼe, loos ka lae? 8 Se imi kumpre liurai nia ukun-fuan hodi tuir eskritura neʼebé dehan: “Imi tenke hadomi imi-nia maluk hanesan imi-nia an rasik”,+ imi halo buat neʼebé diʼak. 9 Maibé se imi kontinua todan ba sorin,+ imi halo sala ona, no ukun-fuan neʼe hatudu katak imi* kontradór.+

10 Tanba ema neʼebé halo tuir Ukun-Fuan hotu, maibé halo sala kontra ukun-fuan ida deʼit, nia kontra ona ukun-fuan hotu.+ 11 Tanba ida neʼebé dehan: “Imi labele halo sala seksuál ho ema neʼebé laʼós imi-nia kaben”,*+ nia mós dehan: “Imi labele oho ema.”+ Entaun, se imi la halo sala seksuál ho ema neʼebé laʼós imi-nia kaben* maibé imi oho ema, imi kontra ona ukun-fuan. 12 Kontinua koʼalia no hatudu hahalok hanesan ema sira neʼebé sei hetan tesi-lia tuir ukun-fuan ba povu neʼebé livre.*+ 13 Tanba ema neʼebé la hatudu laran-sadiʼa sei hetan tesi-lia la ho laran-sadiʼa.+ Laran-sadiʼa mak diʼak liu fali* tesi-lia.

14 Haʼu-nia maun-alin sira, se ema ida dehan katak nia iha fiar maibé la hatudu liuhusi hahalok, neʼe lori benefísiu saida?+ Fiar neʼe labele salva nia, loos ka lae?+ 15 Se maluk fiar-naʼin sira presiza roupa* no sira-nia ai-han la toʼo ba loron neʼe, 16 no imi ida dehan ba sira: “Bá ho dame, haʼu hein katak imi sei hetan roupa no sai bosu”, maibé imi la fó buat neʼebé sira presiza ba sira-nia isin, entaun neʼe lori benefísiu saida?+ 17 Nuneʼe mós ho fiar, se ita la hatudu liuhusi hahalok, fiar neʼe mate.+

18 Maibé, ema ida sei dehan: “Ó iha fiar, no haʼu iha hahalok. Oinsá mak ó bele hatudu ó-nia fiar mai haʼu se ó la halo hahalok diʼak? Haʼu sei hatudu ba ó haʼu-nia fiar liuhusi hahalok.” 19 Ó fiar katak iha Maromak ida deʼit ka? Se nuneʼe, ó halo buat neʼebé diʼak. Maibé, anju aat sira mós fiar no nakdedar.+ 20 Ó ema beik-teen, ó hakarak hatene ka? Fiar la iha folin se la hatudu liuhusi hahalok. 21 Maromak haree ita-nia aman Abraão nuʼudar ema laran-loos liuhusi hahalok bainhira nia hasaʼe ona ninia oan Isaac iha altár, loos ka lae?+ 22 Entaun, ida-neʼe hatudu katak ita bele haree ninia fiar liuhusi ninia hahalok no ninia fiar sai perfeitu liuhusi ninia hahalok,+ 23 no eskritura tuirmai neʼe kumpre ona: “Abraão tau fiar ba Jeová,* no tan neʼe Maromak haree nia nuʼudar ema laran-loos”,+ no bolu nia nuʼudar Jeová* nia belun.+

24 Imi haree ona katak ema bele sai nuʼudar ema laran-loos liuhusi hahalok, laʼós liuhusi fiar deʼit. 25 Nuneʼe mós ho feto-aat* Raab, Maromak haree nia nuʼudar ema laran-loos liuhusi hahalok, bainhira nia simu espiaun sira* ho laran-diʼak no haruka sira fila liuhusi dalan seluk.+ 26 Neʼe duni, hanesan isin neʼebé la hamutuk ho iis* mak mate,+ nuneʼe mós fiar neʼebé la hamutuk ho hahalok mak mate.+

3 Haʼu-nia maun-alin sira, ema barak iha imi-nia leet labele sai mestre,* tanba imi hatene katak ita sei hetan tesi-lia neʼebé todan liu.*+ 2 Ita hotu halo sala* dala barak.+ Se ema ida la halo sala ho ninia liafuan, nia mak ema perfeitu, nia bele kontrola ninia isin tomak. 3 Se ita tau kuda-freun* iha kuda nia ibun atu nia bele halo tuir ita, ita kontrola mós ninia isin tomak. 4 Haree mós ba ró sira: Maski ró sira boot loos no anin makaʼas mak lori sira, maibé ró-naʼin bele kontrola ho kamudi neʼebé kiʼik tebes hodi lori ró ba fatin neʼebé nia hakarak bá.

5 Nuneʼe mós, nanál mak parte kiʼik ida husi isin, maibé ho nanál mak ita gaba an kona-ba buat boot. Ahi neʼebé kiʼik bele han ai-laran neʼebé boot, loos ka lae? 6 Nanál mós hanesan ahi ida.+ Husi ita-nia isin-lolon tomak, nanál mak nakonu ho buat aat, tanba nanál hafoʼer isin-lolon tomak+ no nanál hanesan ahi neʼebé estraga ema nia moris tomak, no ahi neʼe mai husi Gehena.* 7 Ema bele halo maus animál oioin hanesan animál fuik, manu, animál neʼebé dolar,* no animál iha tasi; tuir loloos ema halo maus ona animál sira-neʼe. 8 Maibé la iha ema ida mak bele kontrola nanál. Nanál neʼe labele kontrola no halo aat, no nakonu ho venenu neʼebé halo ema mate.+ 9 Ho nanál mak ita hahiʼi ita-nia Aman Jeová,* maibé ho nanál ita mós fó-malisan ba ema neʼebé kria ona “tuir Maromak nia ilas”.+ 10 Liuhusi ibun ida deʼit mak ita fó bensaun no malisan.

Haʼu-nia maun-alin sira, buat sira hanesan neʼe labele akontese duni.+ 11 Bee meer no bee moos* labele suli sai husi bee-matan ida deʼit, loos ka lae? 12 Haʼu-nia maun-alin sira, ai-figeira labele fó oliveira-fuan, no uvas-hun labele fó figeira fuan, loos ka lae?+ Nuneʼe mós bee-matan neʼebé iha bee meer labele fó bee moos, loos ka lae?

13 Iha imi-nia leet, iha ema neʼebé matenek no iha kbiit atu komprende ka lae? Se nuneʼe, nia tenke hatudu hahalok diʼak ho laran-maus neʼebé mai husi matenek. 14 Maibé se imi sai laran-moras+ no hanoin deʼit atu istori malu,*+ keta gaba an+ kona-ba imi-nia matenek, tanba ida-neʼe mak bosok hodi kontra realidade. 15 Neʼe laʼós matenek neʼebé mai husi leten. Matenek neʼe mai husi mundu nian,+ tuir hakarak isin, no husi anju aat sira. 16 Tanba kuandu ema laran-moras no istori malu,* sei hamosu mós runguranga no buat aat oioin.+

17 Maibé matenek husi lalehan, primeiru mak moos,+ tuirmai buka dame,+ la ulun-toos,*+ prontu atu halo tuir, nakonu ho laran-sadiʼa no hahalok diʼak,+ la todan ba sorin+ no la laran-makerek.+ 18 Liután neʼe, sira neʼebé buka dame+ kari fini dame nian iha situasaun neʼebé dame no koʼa hahalok loos nuʼudar ninia rezultadu.+

4 Saida mak hun ba kontra malu no istori malu neʼebé mosu iha imi-nia leet? Buat sira-neʼe nia hun mak imi-nia hakarak isin nian neʼebé hamosu kontra malu iha imi-nia laran,* loos ka lae?+ 2 Imi labele hetan buat neʼebé imi hakarak. Imi kontinua oho malu no kaan buat neʼebé ema seluk nian, maibé imi labele hetan. Imi kontinua istori malu no kontra malu.+ Imi labele hetan tanba imi la husu. 3 Kuandu imi husu, imi la simu tanba imi husu ho objetivu neʼebé sala. Imi-nia objetivu mak atu bele uza buat sira-neʼe hodi halo kontente imi-nia hakarak isin nian.

4 Imi neʼebé la hatudu laran-metin,* imi la hatene ka? Sai belun ho mundu halo imi sai Maromak nia inimigu. Tan neʼe, ema naran deʼit neʼebé hakarak sai belun ho mundu neʼe, nia halo ninia an sai Maromak nia inimigu.+ 5 Eskritura dehan: “Ita-nia laran* book ita atu sai laran-moras hodi kaan buat oioin.” Entaun, imi hanoin katak eskritura hatete nuneʼe la ho razaun ka?+ 6 Maibé, Maromak hatudu laran-diʼak neʼebé boot mai ita, no neʼe ajuda ita atu manán hakarak aat sira-neʼe. Tan neʼe, eskritura dehan: “Maromak kontra ema neʼebé loko an,+ maibé nia hatudu laran-diʼak boot ba ema neʼebé haraik an.”+

7 Tan neʼe, hakruʼuk ba Maromak;+ maibé kontra hasoru Diabu,+ no nia sei halai husi imi.+ 8 Hakbesik ba Maromak, no nia sei hakbesik ba imi.+ Imi ema sala-naʼin sira, hamoos imi-nia liman bá,+ no imi neʼebé laran namlele, hamoos imi-nia laran bá.+ 9 Imi tenke triste, lelir no tanis.+ Halo imi-nia hamnasa sai fali triste, no imi-nia ksolok sai fali laran-kraik. 10 Haraik an bá iha Jeová* nia oin,+ no nia sei foti aas imi.+

11 Maun-alin sira, labele koʼalia kontra malu tan.+ Ema neʼebé koʼalia kontra ninia maun-alin ka tesi-lia ba ninia maun-alin, ema neʼe koʼalia kontra ukun-fuan no tesi-lia kona-ba ukun-fuan. Agora se ó tesi-lia kona-ba ukun-fuan, ó laʼós ema neʼebé halo tuir ukun-fuan, maibé juís ida. 12 Iha ida deʼit mak fó Ukun-Fuan no Juís,+ nia mak bele salva ema no halakon ema.+ Maibé kona-ba ó, ó mak sé atu tesi-lia ba ó-nia maluk?+

13 Imi balu dehan: “Ohin ka aban ita sei halo viajen ba sidade neʼe no ita sei hela iha neʼebá tinan ida, no ita sei halo negósiu no manán osan”,+ 14 maibé imi la hatene imi-nia moris sei sai oinsá loos iha loron aban.+ Tanba imi hanesan abuabu neʼebé mosu ba tempu uitoan no depois lakon fali.+ 15 Tuir loloos, imi tenke dehan: “Se neʼe mak Jeová* nia hakarak,+ ita sei moris no halo ida-neʼe ka ida neʼebá.” 16 Maibé agora imi foti an no gaba an deʼit. Gaba an hanesan neʼe mak aat. 17 Tan neʼe, se ema ida hatene oinsá atu halo buat neʼebé loos maibé la halo, nia halo ona sala.+

5 Imi neʼebé riku, rona bá, tanis no lelir bá kona-ba susar sira neʼebé sei akontese ba imi.+ 2 Imi-nia rikusoin sai dodok ona, no kukulai* han tiha ona imi-nia roupa.+ 3 Imi-nia osan-mean no osan-mutin sai ferrujen ona, no ferrujen sira-neʼe sei sai sasin hodi hatudu sai imi-nia sala no sei han imi-nia isin. Iha loron ikus sira, buat neʼebé imi rai hela sei sai hanesan ahi.+ 4 Rona bá! Serbisu-naʼin sira neʼebé koʼa iha imi-nia toʼos kontinua hakilar tanba imi la selu sira-nia kolen, no Jeová* neʼebé ukun tropa lalehan nian rona ona sira-nia halerik atu husu ajuda.+ 5 Imi moris diʼak ona no buka ksolok deʼit ba imi-nia an iha rai. Imi han no halo bokur imi-nia isin* toʼo loron oho nian.+ 6 Imi tesi-lia no mós oho ona ema neʼebé halo hahalok loos. Tanba razaun neʼe mak nia* kontra imi, loos ka lae?

7 Tan neʼe, maun-alin sira, hatudu pasiénsia bá toʼo tempu neʼebé Naʼi hatudu katak nia toʼo ona mai.*+ Haree bá! Toʼos-naʼin kontinua hein katak rai sei fó rezultadu neʼebé folin-boot, no nia hatudu pasiénsia toʼo udan primeiru no udan ikus* tun.+ 8 Imi mós tenke hatudu pasiénsia.+ Hametin imi-nia laran bá, tanba tempu besik daudaun atu Naʼi hatudu katak nia toʼo ona mai.*+

9 Maun-alin sira, imi keta muramura* ba malu, atu nuneʼe Naʼi la tesi-lia ba imi.+ Haree bá! Juís hamriik daudaun iha odamatan oin. 10 Maun-alin sira, halo tuir ezemplu diʼak husi profeta sira neʼebé koʼalia hodi Jeová* nia naran;+ halo tuir sira-nia ezemplu kona-ba tahan buat neʼebé la iha justisa+ no hatudu pasiénsia.+ 11 Ita dehan ona katak ema sira neʼebé tahan terus mak ema neʼebé kontente.*+ Imi rona ona oinsá Job tahan terus toʼo rohan+ no haree bensaun neʼebé Jeová* fó ona ba nia,+ no neʼe hatudu katak Jeová* iha domin neʼebé boot tebes* no laran-sadiʼa.+

12 Haʼu-nia maun-alin sira, importante liu mak imi labele jura tan hodi lalehan, rai ka buat seluk. Maibé se imi dehan ‘Sin’, tenkesér sin, no ‘Lae’, tenkesér lae,+ atu nuneʼe Maromak labele tesi-lia ba imi.

13 Iha ema ruma neʼebé hetan terus iha imi-nia leet ka lae? Nia tenke kontinua halo orasaun.+ Iha ema ruma neʼebé laran-haksolok iha imi-nia leet ka lae? Nia tenke kanta knananuk hahiʼi nian.*+ 14 Iha ema ruma neʼebé moras iha imi-nia leet ka lae? Nia tenke bolu katuas sira+ iha kongregasaun,* no sira sei halo orasaun ba nia no kose mina ba nia+ hodi Jeová* nia naran. 15 No orasaun neʼebé ema hatoʼo ho fiar sei halo ema moras* sai diʼak fali, no Jeová* sei halo nia hamriik. No mós, se nia halo ona sala, ninia sala sei hetan perdua.

16 Tan neʼe, koʼalia nakloke hodi fó sai imi-nia sala+ ba malu no halo orasaun ba malu, atu nuneʼe imi bele hetan kura. Ema laran-loos nia harohan iha forsa boot tebes.*+ 17 Elias mak ema ida neʼebé iha sentimentu hanesan ita, maibé nia halo orasaun ho laran atu udan labele tau, no udan la tau iha nasaun neʼe durante tinan tolu no fulan neen.+ 18 Tuirmai nia halo fali orasaun, no udan tau husi lalehan no rai fó rezultadu.+

19 Haʼu-nia maun-alin sira, se ema dada ema ruma iha imi-nia leet hodi laʼo sees husi lia-loos no ema seluk ajuda nia fila fali, 20 hatene bá katak ema neʼebé ajuda sala-naʼin ida atu fila fali hodi husik tiha ninia dalan neʼebé sala,+ ema neʼe sei salva sala-naʼin neʼe nia moris* husi mate no ajuda atu hamoos* tiha sala barak.+