KARTA PRIMEIRU HUSI JOÃO

1 Ami hakerek ba imi kona-ba ida neʼebé iha ona horiuluk kedas, neʼebé ami rona no haree ho ami-nia matan rasik, neʼebé ami hateke no kaer ho ami-nia liman; nia lori liafuan moris nian.+ 2 Sin, moris rohan-laek hatudu sai ona ba ami, no ami haree ona ida-neʼe no sai sasin+ kona-ba neʼe no fó sai ba imi. Moris rohan-laek+ neʼe husi ita-nia Aman no hatudu sai ona ba ami. 3 Ami fó-hatene ona ba imi buat neʼebé ami haree no rona,+ atu nuneʼe imi bele sai ida deʼit* ho ami hanesan ami ida deʼit ho Aman no ninia Oan-Mane Jesus Kristu.+ 4 No ami hakerek buat sira-neʼe atu ita-nia ksolok bele sai kompletu.

5 Ami rona liafuan tuirmai neʼe husi nia no ami fó sai ba imi: Maromak mak naroman+ no la iha nakukun ida iha nia.* 6 Se ita dehan: “Ita mak ida deʼit ho nia”, maibé ita kontinua laʼo iha nakukun laran,* ita bosok no la moris tuir lia-loos.+ 7 Maibé, se ita laʼo iha naroman laran* hanesan nia mós hela iha naroman laran, ita hotu sai ida deʼit, no ninia Oan-Mane Jesus nia raan bele hamoos ita-nia sala hotu.+

8 Se ita dehan: “Ita la iha sala”, ita bosok ita-nia an+ no lia-loos la hela iha ita. 9 Se ita fó sai ita-nia sala, Maromak neʼebé laran-metin no iha hahalok loos, sei perdua ita-nia sala no hamoos ita husi hahalok aat hotu.+ 10 Se ita dehan: “Ita la halo sala”, ita halo Maromak sai hanesan bosok-teen ida, no ninia liafuan la hela iha ita.

2 Haʼu-nia oan doben sira, haʼu hakerek buat sira-neʼe ba imi atu imi labele halo sala. Maibé se ema ida halo sala, ita iha ajuda-naʼin* ida neʼebé hamutuk ho Aman, ajuda-naʼin neʼe mak Jesus Kristu+ neʼebé halo buat loos iha Maromak nia oin.+ 2 Nia mak sakrifísiu+ neʼebé hasaʼe ona ba ita-nia sala,+ atu nuneʼe ita bele hadame malu ho Maromak,* no tuir loloos laʼós ba ita-nia sala deʼit, maibé mós ba mundu tomak nia sala.+ 3 Se ita kontinua halo tuir ninia ukun-fuan sira, neʼe katak ita hatene ona nia. 4 Ema neʼebé dehan: “Haʼu hatene ona nia”, maibé la halo tuir ninia ukun-fuan sira, ema neʼe bosok-teen, no lia-loos la hela iha ema neʼe. 5 Maibé ema neʼebé halo tuir ninia liafuan, ema neʼe hatudu katak ninia domin ba Maromak perfeitu ona.+ Liuhusi ida-neʼe mak ita hatene katak ita ida deʼit ho nia.+ 6 Ema neʼebé dehan katak sira ida deʼit ho nia, ema sira-neʼe iha obrigasaun atu kontinua laʼo tuir Jesus nia dalan.+

7 Maluk doben sira, haʼu hakerek ba imi, laʼós ukun-fuan foun, maibé ukun-fuan tuan neʼebé imi iha ona horiuluk kedas.+ No ukun-fuan tuan neʼe mak liafuan sira neʼebé imi rona ona. 8 Dala ida tan, haʼu hakerek ba imi ukun-fuan foun ida, no neʼe mak ukun-fuan neʼebé Jesus halo tuir no imi mós halo tuir, tanba nakukun lakon daudaun ona no naroman neʼebé loos sai nabilan daudaun ona.+

9 Ema neʼebé dehan katak nia iha naroman laran maibé nia odi+ ninia maluk, ema neʼe sei hela iha nakukun laran.+ 10 Ema neʼebé hadomi ninia maluk, hela nafatin iha naroman laran,+ no la iha buat ida neʼebé halo nia sidi. 11 Maibé ema neʼebé odi ninia maluk, ema neʼe iha nakukun laran no nia laʼo iha nakukun laran,+ no nia la hatene atu bá neʼebé,+ tanba nakukun taka netik ninia matan.

12 Haʼu hakerek ba imi, haʼu-nia oan doben sira, tanba imi-nia sala hetan ona perdua tanba ninia naran.+ 13 Haʼu hakerek ba imi, aman sira, tanba imi hatene ona nia neʼebé iha ona horiuluk kedas. Haʼu hakerek ba imi, mane joven sira, tanba imi manán ona aat-naʼin.*+ Haʼu hakerek ba imi, labarik sira, tanba imi hatene ona Aman.+ 14 Haʼu hakerek ba imi, aman sira, tanba imi hatene ona nia neʼebé iha ona horiuluk kedas. Haʼu hakerek ba imi, mane joven sira, tanba imi forte+ no Maromak nia liafuan hela iha imi+ no imi manán ona aat-naʼin.*+

15 Keta hadomi mundu ka buat neʼebé iha mundu.+ Se ema ida hadomi mundu, domin ba Aman la hela iha nia,+ 16 tanba buat hotu iha mundu neʼe, hanesan hakarak isin nian,+ hakarak matan nian+ no foti an kona-ba rikusoin,* buat sira-neʼe la mai husi Aman, maibé mai husi mundu neʼe. 17 Liután neʼe, mundu neʼe no ninia hakarak sira sei lakon tiha,+ maibé ema neʼebé halo Maromak nia hakarak sei moris ba nafatin.+

18 Oan doben sira, agora mak oras ikus, no hanesan imi rona ona katak Kristu nia inimigu* sei mosu mai,+ agora mós Kristu nia inimigu barak mosu ona,+ nuneʼe ita hatene katak agora mak oras ikus. 19 Uluk sira hamutuk ho ita maibé sira husik hela ita tanba sira laʼós parte ba ita-nia grupu.*+ Se sira parte ba ita-nia grupu, entaun sira hela nafatin ho ita. Maibé sira husik hela ita no ida-neʼe hatudu katak laʼós ema hotu mak parte ba ita-nia grupu.+ 20 No Maromak neʼebé santu hili* ona imi+ no imi hotu iha ona koñesimentu. 21 Haʼu hakerek ba imi, laʼós tanba imi la hatene lia-loos,+ maibé tanba imi hatene, no tanba lia-bosok la mai husi lia-loos.+

22 Sé mak bosok-teen? Ema bosok-teen mak ema neʼebé dehan katak Jesus laʼós Kristu,+ loos ka lae? Ema neʼe mak Kristu nia inimigu,*+ nia nega ona Aman no Oan-Mane. 23 Ema hotu neʼebé nega Oan-Mane, nia laʼós ida deʼit ho Aman.+ Maibé ema hotu neʼebé simu Oan-Mane,+ nia ida deʼit ho Aman.+ 24 Kona-ba imi, buat neʼebé imi rona ona horiuluk kedas tenke hela nafatin iha imi.+ Se buat neʼebé imi rona horiuluk kedas hela nafatin iha imi, imi sei nafatin sai ida deʼit ho Oan-Mane no mós ho Aman. 25 Liután neʼe, buat neʼebé nia rasik promete ba ita mak moris rohan-laek.+

26 Haʼu hakerek buat sira-neʼe ba imi kona-ba ema sira neʼebé koko atu lohi imi. 27 Kona-ba imi, tanba Maromak hili* ona imi+ liuhusi ninia espíritu no espíritu neʼe nafatin hela iha imi, entaun imi la presiza tan atu ema ida hanorin imi. Maibé Maromak uza espíritu neʼe atu hanorin imi kona-ba buat hotu,+ no neʼe loos no la bosok. Entaun nafatin sai ida deʼit+ ho nia hanesan espíritu hanorin ona ba imi. 28 Neʼe duni, oan doben sira, nafatin sai ida deʼit ho nia, atu nuneʼe kuandu nia hatudu sai ninia an, ita bele koʼalia nakloke+ no la subar an husi nia ho moe bainhira nia toʼo ona mai.* 29 Se imi hatene katak nia iha hahalok loos, imi mós hatene katak ema hotu neʼebé halo hahalok loos moris mai husi nia.+

3 Haree oinsá Aman nia domin boot tebes ba ita,+ tanba nia bolu ona ita nuʼudar ninia oan!*+ No ita mak ninia oan duni. Tan neʼe mak mundu la hatene ita,+ tanba mundu la hatene nia.+ 2 Maluk doben sira, agora ita mak Maromak nia oan,+ maibé ita seidauk hatene loloos ita sei sai oinsá iha futuru.+ Ita hatene katak iha tempu neʼebé nia hatudu sai ninia an, ita sei sai hanesan nia, tanba ita sei haree nia. 3 No ema hotu neʼebé tau esperansa ba nia, sira hamoos ona sira-nia an+ hanesan nia* neʼebé moos.

4 Ema neʼebé kontinua halo sala, nia mós kontra beibeik ukun-fuan, no sala katak kontra ukun-fuan. 5 Imi mós hatene katak nia mai* atu hasai ita-nia sala sira,+ no la iha sala iha nia. 6 Ema hotu neʼebé nafatin ida deʼit ho nia, sira la kontinua halo sala.+ Ema neʼebé kontinua halo sala seidauk haree nia ka hatene nia. 7 Oan doben sira, keta husik ema ida lohi imi. Ema neʼebé kontinua halo hahalok loos, nia mak ema laran-loos hanesan Jesus mak laran-loos. 8 Ema neʼebé kontinua halo sala, nia mai husi Diabu, tanba Diabu halo sala ona horiuluk kedas.*+ Tan neʼe, Maromak nia Oan-Mane mai* ho objetivu atu harahun Diabu nia serbisu hotu.+

9 Ema hotu neʼebé moris mai husi Maromak la kontinua halo sala,+ tanba Maromak nia espíritu* hela iha ema sira hanesan neʼe, no ema neʼe labele kontinua halo sala, tanba nia moris mai husi Maromak.+ 10 Nuneʼe, ita bele hatene Maromak nia oan no Diabu nia oan liuhusi dalan tuirmai neʼe: Ema neʼebé la kontinua halo hahalok loos la mai husi Maromak, nuneʼe mós ho ema neʼebé la hadomi ninia maluk.+ 11 Neʼe mak lia-menon neʼebé imi rona ona horiuluk kedas katak ita tenke hadomi malu.+ 12 Ita labele sai hanesan Caim, neʼebé mai husi aat-naʼin* no oho ninia alin.+ Tanbasá mak nia oho ninia alin? Tanba Caim nia hahalok mak aat,+ maibé ninia alin nia hahalok mak loos.+

13 Maun-alin sira, imi keta hakfodak kuandu mundu odi imi.+ 14 Ita hatene katak ita husik tiha ona mate no agora ita moris,+ tanba ita hadomi ita-nia maun-alin sira.+ Ema neʼebé la hatudu domin hela nafatin iha mate.+ 15 Ema hotu neʼebé odi ninia maluk, ema neʼe mak ohodór,+ no imi hatene katak ema neʼebé ohodór la simu moris rohan-laek.+ 16 Ita hatene kona-ba domin tanba Jesus Kristu fó ninia moris* ba ita,+ no ita mós iha obrigasaun atu fó ita-nia moris ba ita-nia maun-alin sira.+ 17 Maibé, se ema iha sasán mundu neʼe nian no nia haree katak ninia maun-alin falta buat ruma, no nia lakohi hatudu laran-sadiʼa ba ninia maun-alin, entaun oinsá mak nia bele dehan katak nia hadomi Maromak?+ 18 Oan doben sira, ita tenke hatudu domin laʼós ho liafuan ka ibun deʼit,+ maibé ho hahalok+ no lia-loos.+

19 Ho ida-neʼe mak ita hatene katak ita iha lia-loos, no ita sei hametin ita-nia laran hodi fiar* katak Maromak simu ita 20 maski ita-nia laran duun ita kona-ba buat ruma, tanba Maromak mak boot liu fali ita-nia laran no hatene buat hotu.+ 21 Maluk doben sira, se ita-nia laran la duun ita, ita bele koʼalia nakloke ba Maromak,+ 22 no buat naran deʼit neʼebé ita husu, ita simu husi nia,+ tanba ita halo tuir ninia ukun-fuan sira no halo buat neʼebé nia gosta. 23 Tuir loloos, ninia ukun-fuan mak tuirmai neʼe: ita tenke iha fiar ba ninia Oan-Mane Jesus Kristu+ nia naran no hadomi malu,+ hodi tuir ukun-fuan neʼebé nia fó ona ba ita. 24 Liután neʼe, ema neʼebé halo tuir ninia ukun-fuan, ema neʼe nafatin ida deʼit ho nia, no nia sai ida deʼit ho ema neʼe.+ No liuhusi espíritu neʼebé nia fó mai ita, ita hatene katak nia nafatin ida deʼit ho ita.+

4 Maluk doben sira, keta fiar liafuan* hotu+ neʼebé haree hanesan husi Maromak, maibé koko liafuan* sira-neʼe hodi haree se neʼe mai duni husi Maromak ka lae,+ tanba profeta falsu barak mosu ona iha mundu.+

2 Imi bele hatene se liafuan ida mai husi Maromak ka lae liuhusi ida-neʼe: Liafuan hotu neʼebé rekoñese katak Jesus Kristu mai ona nuʼudar ema* mak liafuan neʼebé mai husi Maromak.+ 3 Maibé liafuan hotu neʼebé la rekoñese Jesus, la mai husi Maromak.+ Liután neʼe, ida-neʼe mak liafuan husi Kristu nia inimigu,* neʼebé imi rona ona katak atu mai,+ no agora nia mosu ona iha mundu neʼe.+

4 Oan doben sira, imi mai husi Maromak, no imi manán ona ema sira-neʼe,+ tanba nia neʼebé ida deʼit ho imi+ mak boot liu fali nia neʼebé ida deʼit ho mundu.+ 5 Profeta falsu sira-neʼe mai husi mundu,+ tan neʼe mak sira koʼalia buat neʼebé mai husi mundu no mundu rona ba sira.+ 6 Ita mai husi Maromak. Ema neʼebé hatene Maromak, sira rona ita,+ no ema neʼebé la mai husi Maromak la rona ba ita.+ Ho ida-neʼe mak ita bele hatene ida-neʼebé mak liafuan lia-loos nian no ida-neʼebé mak liafuan neʼebé sala.+

7 Maluk doben sira, mai ita hatudu nafatin domin ba malu,+ tanba domin mai husi Maromak. Ema hotu neʼebé hatudu domin mak Maromak nia oan no hatene Maromak.+ 8 Ema neʼebé la hatudu domin la hatene Maromak, tanba Maromak mak domin.+ 9 Maromak hatudu ninia domin mai ita iha dalan tuirmai neʼe: Maromak haruka ninia Oan-Mane mesak+ mai mundu atu ita bele hetan moris liuhusi nia.+ 10 Maromak nia domin hanesan neʼe: Nia haruka ninia Oan-Mane nuʼudar sakrifísiu+ neʼebé hasaʼe ona ba ita-nia sala+ hodi nuneʼe ita bele hadame malu ho nia.* Maromak halo nuneʼe laʼós tanba ita hadomi ona Maromak, maibé tanba nia hadomi ita.

11 Maluk doben sira, se Maromak hadomi ita iha dalan hanesan neʼe, entaun ita mós iha obrigasaun atu hadomi malu.+ 12 La iha ema ida mak haree ona Maromak.+ Se ita kontinua hadomi malu, Maromak nafatin hela iha ita no ninia domin sai perfeitu iha ita.+ 13 Ita hatene katak ita nafatin ida deʼit ho nia no nia ida deʼit ho ita, tanba nia fó ona ninia espíritu ba ita. 14 Laʼós neʼe deʼit, ita rasik mós haree ona no fó sasin katak Aman haruka ona ninia Oan-Mane mai nuʼudar salvadór ba mundu.+ 15 Ema neʼebé rekoñese katak Jesus mak Maromak nia Oan-Mane,+ Maromak nafatin ida deʼit ho nia no nia ida deʼit ho Maromak.+ 16 No ita hatene ona no fiar katak Maromak hadomi ita.+

Maromak mak domin,+ no ema neʼebé nafatin hela iha domin, nia nafatin ida deʼit ho Maromak no Maromak nafatin ida deʼit ho nia.+ 17 Iha dalan hanesan neʼe mak domin sai perfeitu iha ita, atu nuneʼe ita bele koʼalia nakloke*+ iha loron tesi-lia nian, tanba iha mundu neʼe ita mós sai ona hanesan nia.* 18 Ema neʼebé iha domin, nia la taʼuk.+ Domin neʼebé perfeitu halakon* taʼuk, tanba taʼuk hanetik ita. Tuir loloos, ema neʼebé taʼuk, ninia domin seidauk sai perfeitu.+ 19 Ita hatudu domin tanba nia hadomi uluk ita.+

20 Se ema ruma dehan: “Haʼu hadomi Maromak”, maibé nia odi ninia maluk, ema neʼe bosok-teen.+ Tanba se nia la hadomi ninia maluk+ neʼebé nia haree, sá tan hadomi Maromak neʼebé nia labele haree.+ 21 Nia fó ona ukun-fuan tuirmai neʼe ba ita: Ema neʼebé hadomi Maromak tenke hadomi mós ninia maluk.+

5 Ema hotu neʼebé fiar katak Jesus mak Kristu, sira moris mai husi Maromak,+ no ema hotu neʼebé hadomi Aman Maromak, hadomi mós Maromak nia oan sira. 2 Ita hatene katak ita hadomi Maromak nia oan sira+ se ita hadomi Maromak no halo tuir ninia ukun-fuan sira. 3 Tanba domin ba Maromak signifika katak ita halo tuir ninia ukun-fuan sira,+ no ninia ukun-fuan sira la susar liu atu kumpre,*+ 4 tanba Maromak nia oan hotu manán mundu.+ No ho ita-nia fiar mak ita manán tiha ona mundu.+

5 Sé mak bele manán mundu neʼe?+ Neʼe mak sira neʼebé fiar katak Jesus mak Maromak nia Oan-Mane, loos ka lae?+ 6 Jesus Kristu mai ho bee no raan. Nia mai laʼós ho bee deʼit,+ maibé ho bee no raan.+ No espíritu mak fó sasin,+ tanba espíritu mak lia-loos. 7 Iha buat tolu neʼebé fó sasin: 8 espíritu,+ bee+ no raan.+ Buat tolu neʼe fó sasin neʼebé hanesan.

9 Se ita simu ema nia sasin, oinsá liután ho sasin husi Maromak. Tanba neʼe mak sasin neʼebé Maromak fó, no nia fó sasin kona-ba ninia Oan-Mane. 10 Ema neʼebé tau fiar ba Maromak nia Oan-Mane, ema neʼe simu ona sasin neʼebé Maromak fó ba nia iha ninia laran. Ema neʼebé la tau fiar ba Maromak halo ona Maromak hanesan bosok-teen,+ tanba nia la tau fiar ba sasin neʼebé Maromak fó sai ona kona-ba ninia Oan-Mane. 11 Neʼe mak sasin neʼebé Maromak fó sai ona, katak Maromak fó ita moris rohan-laek,+ no moris neʼe mai liuhusi ninia Oan-Mane.+ 12 Ema neʼebé ida deʼit ho Oan-Mane, nia hetan moris neʼe, maibé ema neʼebé la sai ida deʼit ho Maromak nia Oan-Mane, nia la hetan moris neʼe.+

13 Haʼu hakerek buat sira-neʼe ba imi neʼebé tau fiar ona ba Maromak nia Oan-Mane nia naran,+ atu nuneʼe imi bele hatene katak imi hetan moris rohan-laek.+ 14 No ita fiar* nia,+ katak buat naran deʼit neʼebé ita husu hodi tuir ninia hakarak, nia rona ita.+ 15 No se ita hatene katak nia rona buat naran deʼit neʼebé ita husu, ita hatene katak ita sei simu buat neʼebé ita husu ona ba nia.+

16 Se ema ida haree ninia maluk halo sala neʼebé la lori ba mate, nia sei harohan kona-ba ninia maluk neʼe, no Maromak sei fó moris ba ninia maluk neʼe,+ sin, neʼe kona-ba sira neʼebé halo sala neʼebé la lori ba mate. Maibé iha mós sala neʼebé lori ba mate.+ Kona-ba sala neʼe mak haʼu la haruka nia atu harohan. 17 Hahalok aat hotu mak sala,+ maibé iha sala neʼebé la lori ema ba mate.

18 Ita hatene katak ema hotu neʼebé moris mai husi Maromak, sira la kontinua halo sala, maibé ida* neʼebé moris mai husi Maromak tau matan ba sira, no aat-naʼin* labele kaer metin sira.+ 19 Ita hatene katak ita mai husi Maromak, maibé aat-naʼin* mak domina mundu tomak.+ 20 Maibé ita hatene katak Maromak nia Oan-Mane mai tiha ona,+ no nia fó ona matenek* ba ita atu ita bele hetan koñesimentu kona-ba Maromak neʼebé loos. No liuhusi ninia Oan-Mane Jesus Kristu, ita sai ida deʼit ona ho nia.+ Nia mak Maromak neʼebé loos no hun ba moris rohan-laek.+ 21 Oan doben sira, hadook an husi estátua.*+