NASAUN NO POVU
Vizita ba rai-Indonézia
RAI-INDONÉZIA iha illa kiʼik sira maizumenus hamutuk 17.000. Ema neʼebé hela iha neʼebá hatudu laran-diʼak tebes, pasiénsia, hatudu respeitu no laran-luak.
Ema Indonézia toman han etu hamutuk ho hahán seluk neʼebé baibain tau ho ai-manas. Sira mós han ai-fuan. Iha fatin balu iha rai-indonézia, família sira tuur iha biti kuandu han hamutuk. Sira uza sira-nia liman atu foti hahán hodi tau hamutuk ho etu. Ema Indonézia barak hatete katak han ho liman hanesan neʼe halo gostu liu.
Durian mak ai-fuan neʼebé iha isin neʼebé mamar. Ema barak gosta ai-fuan neʼe maski nia iis makaʼas tebes
Ema Indonézia gosta arte, dansa no múzika. Instrumentu ida naran angklung halo husi au. Kuandu doko instrumentu neʼe, nia halo lian. Kuandu ema barak toka hamutuk, sira presiza doko hamutuk sira-nia angklung tuir ida-idak nia parte.
Lekirauk naran orangutan mak animál boot liu neʼebé hela iha ai-leten. Sira hela iha ai-laran iha rai-Sumatra no rai-Borneu. Orangutan aman ida nia todan bele toʼo besik kilograma 91 no kuandu nia loke luan nia liman rua, neʼe naruk toʼo metru 2 liu
Tuir rai-Indonézia nia istória, maizumenus tinan 600 liubá, ema barak tuir relijiaun Indú no Buda iha rai-Indonézia. Depois tinan 100 liutiha neʼe, ema barak simu relijiaun Izlaun neʼebé tama iha Indonézia nia kultura. Maizumenus iha tempu hanesan neʼe, ema husi Europa laʼo rai hodi buka ai-tahan morin no temperu, no sira mós lori sira-nia relijiaun kristaun.
Husi tinan 1931, Testemuña ba Jeová halaʼo sira-nia serbisu atu hanorin Bíblia iha rai-Indonézia. Agora daudaun, iha Testemuña ba Jeová naʼin-22.000 liu neʼebé hela iha Indonézia no sira mós hakaʼas an atu bele kontaktu ema tilun-diuk sira. Sira mós halaʼo reuniaun espesiál atu hanoin-hetan Jesus nia mate iha língua ba ema tilun-diuk sira no ema naʼin-500 liu tuir reuniaun neʼe.
Livru Matan-moris bá! halo iha língua hamutuk 98, inklui mós Bahasa Indonesia