Grilu ida ne’ebé iha kbiit boot atu rona

GRILU ida (Copiphora gorgonensis) iha rai-Amérika Súl iha tilun neʼebé kiʼik maizumenus sentímetru 0,1. Maski nuneʼe, grilu neʼe nia tilun iha kbiit atu rona hanesan ema nian. Grilu neʼe bele hatene didiʼak kona-ba lian oioin neʼebé nia rona maski dook. Porezemplu, grilu neʼe bele hatene kona-ba lian husi grilu seluk no lian husi niki neʼebé buka atu han sira.

Hanoin toʼok kona-ba neʼe: Grilu neʼe nia tilun mak iha ninia ain rua neʼebé iha oin. Grilu neʼe nia tilun simu lian, no troka lian neʼe, no halo analiza ba lian sira-neʼe, hanesan ema nia tilun mós halo. Maibé, sientista sira hetan buat importante ida iha grilu neʼe nia tilun. Iha nia tilun laran, iha kuak ida neʼebé bele sai nakonu ho been, no kuak neʼe naruk no kloot. Parte neʼe, neʼebé sira bolu nuʼudar vesíkula akústika, halaʼo knaar hanesan ho animál mamíferu sira-nia tilun. Parte neʼe mak ajuda grilu neʼe atu rona ho didiʼak.

Matenek-naʼin ida naran profesór Daniel Robert, husi Universidade Bristol School of Biological Sciences iha rai-Inglaterra, fó sai katak buat neʼebé ema foin hetan husi grilu neʼe bele ajuda enjeñeiru sira hodi halo ekipamentu kiʼik ida neʼebé bele ajuda ema neʼebé ladún rona moos. Matenek-naʼin sira fiar katak ida-neʼe bele ajuda atu halo diʼak liután teknolojia ultrasóniku.

Tuir ita-nia hanoin oinsá? Grilu neʼe nia tilun neʼebé iha kbiit atu rona ho didiʼak mosu mesak deʼit? Ka Maromak mak kria ida-neʼe?