NASAUN NO POVU
Vizita ba rai-Kamboja
IHA fatin balu iha rai-Kamboja, ita bele hetan suku sira neʼebé uma hotu namlele iha bee leten, merkadu neʼebé rame, no estrada sira nakonu ho motór neʼebé tula runguranga sasán oioin deʼit, hanesan manu, jeleira no buat oioin.
Ema Kamboja sempre hatudu laran-diʼak, gosta halo kolega no iha relasaun metin ba malu. Hanesan iha Timor, maski ema foin hasoru malu, sira mós bolu malu hanesan maun, mana, tia, tiu no avó.
Ema balu hela iha ró kiʼik laran, ema seluk iha uma neʼebé halo ho ai-riin aas, ka uma neʼebé namlele iha bee leten. Iha mós eskola, klínika, merkadu no pertamina neʼebé namlele iha bee leten.
Ema barak iha rai-Kamboja gosta han buah naga
Ema Kamboja gosta tebes han etu. Sira baibain han etu hamutuk ho modo oin tolu ka haat, inklui mós sopa. Sira gosta liu mak ikan. Baibain sira halo modo neʼebé midar, siin no meer no han hamutuk dala ida.
Maizumenus tinan 2000 liubá, kontratu-naʼin sira husi rai-Índia no ema seluk neʼebé halo viajen ba Xina komesa bá iha Kamboja atu fila liman hodi troka sasán hanesan hena sutra no besi oioin ho temperus no ai-morin oioin, elefante nia nehan no osan-mean. Neineik-neineik Índia no Xina nia kultura mós tama iha Kamboja, no tan neʼe relijiaun indú no budizmu sai buras iha neʼebá. Ohin loron, populasaun iha Kamboja porsentu 90 mak tuir relijiaun budizmu.
Testemuña ba Jeová iha rai-Kamboja fahe mensajen kona-ba esperansa husi Bíblia ba ema. Sira ajuda ema barak hodi uza livru Tuir Loloos, Saida mak Bíblia Hanorin? Livru neʼe bele hetan iha língua maizumenus 250, inklui mós lia-kambojanu.
Iha rai-Kamboja ema naʼin-1.500 liu estuda Bíblia ho Testemuña ba Jeová no sira buka-hatene kona-ba pergunta sira hanesan, “Ema mate iha-neʼebé?” no “Saida mak Maromak nia hakarak ba rai?”
Livru husi Testemuña ba Jeová, Tuir Loloos, Saida mak Bíblia Hanorin? bele hetan iha lia-kambojanu (hanesan iha dezeñu neʼe).