Vizita ba rai-Onduras

IHA lia-españól, “Onduras” katak “Kleʼan”. Oinsá mak rai neʼe naran Onduras? Tuir ema balu nia hanoin, bainhira Cristovão Colombo toʼo tiha iha rai neʼe iha Tasi Atlántiku nia sorin, nia dehan tasi neʼe mak “kleʼan”, tan neʼe mak rai neʼe nia naran sai “Onduras”.

Ema Onduras sira hafolin tebes família, sira laran-metin ba malu no serbisu hamutuk. Porezemplu, bainhira atu foti desizaun kona-ba buat oioin hanesan osan ka eduka oan, sira-nia toman mak feen-laʼen tenke tuur koʼalia hamutuk no halo desizaun hamutuk.

Ema barak liu iha rai-Onduras mak mestisu, ka raan kahur ho malae-mutin husi Europa no rai-naʼin. Maibé iha mós ema rai-naʼin orijinál sira, hanesan ema Xortí. Liután neʼe, iha mós rasa balu tan hanesan ema Garifuna, neʼebé tinan barak liubá mai toʼo rai-Onduras.

Ema Garifuna nia beiʼala mak ema afrikanu no ema rai-naʼin iha Tasi Karibe, neʼebé uluk hela iha illa São Vicente. Maizumenus iha tinan 1797, sira mai toʼo illas Bahía. Ikusmai, sira hela namkari iha fatin oioin iha Amérika Sentrál no Amérika Norte.

Ema Garifuna nia kultura mak dansa ho isin-moris tuir tambór nia lian. Sira mós hatais roupa tradisionál ho kór neʼebé moris no sira gosta konta istória ba malu. Sira-nia hahán tradisionál ida mak ereba, neʼe mak paun mihis belar boot neʼebé halo husi ai-farina uut.

Ohin loron iha rai-Onduras, ami Testemuña ba Jeová iha kongregasaun hamutuk maizumenus 400. Ami halaʼo reuniaun sira iha lia-españól, inglés, garifuna, miskito, xinés, no mós língua tilun-diuk nian.