Jigante sira iha mundu

SE EMA ida laʼo besik mai ó, no ema neʼe ain-aas tebes toʼo uma nia forru, ó sente oinsá? Ema hanesan neʼe jigante ida! Uluk, loloos iha jigante sira iha mundu. Bíblia hatudu katak sira-nia aman mak anju sira husi lalehan. Maibé, oinsá mak ida-neʼe mosu?

Hanoin-hetan katak anju aat, Satanás, serbisu makaʼas atu halo problema. Nia mós koko atu dada anju sira atu halo aat. Depois, anju balu rona ba Satanás. Sira husik sira-nia serbisu neʼebé Maromak fó ba sira iha lalehan. No sira tun mai Rai no halo sira-nia isin hanesan ema nian. Hatene tanbasá?

Tanba Bíblia hatete katak anju sira-neʼe, ka Maromak nia oan sira-neʼe, haree feto bonita iha Rai no hakarak moris hamutuk ho sira. Tan neʼe, sira tun mai Rai no kaben ho feto sira-neʼe. Bíblia hateten katak ida-neʼe sala, tanba Maromak halo anju sira atu moris iha lalehan.

Kuandu anju no sira-nia feen iha bebé, bebé sira-neʼe la hanesan bebé seluk. Kuandu sira foin moris, karik haree hanesan deʼit. Maibé, sira sai boot no boot liu, no sai forte no forte liu, toʼo sira sai hanesan jigante.

Jigante sira-neʼe aat. No tanba sira boot no forsa tebes, sira halo aat ba ema. Sira koko atu obriga ema hotu atu sai aat hanesan sira.

Enoc mate ona, maibé iha mundu tomak, sei iha ema ida neʼebé diʼak. Nia naran Noé. Nia sempre halo tuir saida mak Maromak hakarak nia atu halo.

Iha loron ida, Maromak fó-hatene Noé katak tempu toʼo ona ba Maromak atu halakon ema aat hotu. Maibé, Maromak sei salva Noé, nia família no animál barak. Mai ita haree oinsá mak Maromak halo ida-neʼe.