Kuda-burru neʼebé koʼalia

RONA tiha ona kuda-burru koʼalia ka lae? Karik ó hatete: ‘Lae, animál sira la bele koʼalia.’ Maibé, Bíblia konta kona-ba kuda-burru ida neʼebé koʼalia duni. Mai ita haree oinsá ida-neʼe akontese.

Ema Izraél prepara daudauk atu tama rai Kanaan. Balac, Moab nia liurai, taʼuk ba ema Izraél. Tan neʼe, nia husu ema matenek ida, naran Balaão, atu mai hotar ema Izraél. Balac promete atu fó osan barak ba Balaão, nuneʼe Balaão saʼe kuda-burru atu bá hasoru Balac.

Jeová lakohi Balaão atu bá hotar Nia povu. Nuneʼe, nia haruka anju ida ho surik naruk atu hamriik iha dalan klaran hodi hapara Balaão. Balaão la bele haree anju neʼe, maibé kuda-burru bele. Nuneʼe, kuda-burru koko atu sees husi anju, no ikusliu toba deʼit iha dalan. Balaão hirus tebes, no baku kuda-burru neʼe ho ai.

Depois, Jeová halo Balaão rona kuda-burru koʼalia. Kuda-burru husu Balaão: ‘Saida mak haʼu halo ba Ita hodi Ita baku haʼu?’

Balaão hatete: ‘Ó halo haʼu hanesan ema beik. Se haʼu iha surik karik, haʼu oho tiha ó!’

Kuda-burru husu: ‘Uluk haʼu trata Ita hanesan neʼe ka lae?’

Balaão hatán: ‘Lae.’

Depois, Jeová husik Balaão haree anju ho surik neʼebé hamriik iha dalan. Anju neʼe hatete: ‘Tanbasá ó baku ó-nia kuda-burru? Haʼu mai atu hapara ó, tanba ó labele bá hotar Izraél. Se ó-nia kuda-burru la sees husi haʼu karik, haʼu sona ó mate, maibé haʼu la hakanek ó-nia kuda-burru.’

Balaão hatete: ‘Haʼu halo sala. Haʼu la hatene katak Ita-Boot hamriik iha dalan.’ Anju husik Balaão bá, no Balaão bá hasoru Balac. Balaão koko nafatin atu hotar Izraél, maibé Jeová halo nia fó bensaun ba Izraél dala tolu.