Jesus moris-mai toʼo mate

Maromak haruka anju Gabriel ba feto-raan ida neʼebé diʼak tebes, naran Maria. Nia hatete ba Maria katak Maria sei koʼus oan ida neʼebé sei ukun ba nafatin nuʼudar liurai. Oan neʼe mak Jesus, moris-mai iha balada-luhan, no bibi-atan sira vizita nia iha neʼebá. Tuirmai, fitun ida hatudu dalan ba ema sira husi leste atu bá toʼo labarik kiʼikoan neʼe. Ita sei aprende sé mak halo fitun neʼe mosu, no oinsá mak Maromak proteje Jesus husi ema neʼebé hakarak oho nia.

Tuirfalimai, ita sei haree Jesus, kuandu tinan 12 ona, koʼalia ho mestre sira iha templu. Tinan 18 liutiha neʼe, Jesus hetan batizmu, nia hahú halaʼo knaar neʼebé Maromak haruka nia atu halo iha Rai, haklaken no hanorin kona-ba Reinu. Atu ajuda halaʼo knaar neʼe, Jesus hili mane naʼin-12 nuʼudar apóstolu.

No mós, Jesus halo milagre barak. Nia fó-han ba ema rihun ba rihun ho ikan no paun uitoan deʼit. Nia kura ema moras sira, no mós halo ema mate moris filafali. Ikusliu, ita sei aprende kona-ba buat barak neʼebé akontese ba Jesus iha loron ikus iha ninia moris, no oinsá mak ema oho nia. Jesus haklaken maizumenus tinan tolu ho balun, nuneʼe, PARTE 6 hatoʼo istória neʼebé akontese durante tinan 34 resin nia laran.