Fó sinál respeitu nian ba bandeira, vota, no halo serbisu neʼebé troka serbisu militár

Fó sinál respeitu nian ba bandeira. Testemuña ba Jeová fiar katak hakruʼuk an ka fó sinál respeitu nian ba bandeira, neʼebé dala barak akompaña ho inu nasionál, mak hahalok adorasaun nian atu hahiʼi nasaun ka nia ukun-naʼin sira, laʼós Maromak, nuʼudar salvasaun nia hun. (Isaías 43:11; 1 Korinto 10:14; 1 Joao 5:21) Ukun-naʼin neʼebé hakarak simu hahiʼi hanesan neʼe mak liurai ida neʼebé iha forsa boot tebes iha rai-Babilónia antigu, naran Nabucodonosor. Atu hatudu katak nia iha pozisaun boot, nia harii estátua neʼebé boot no obriga ninia povu atu hakruʼuk ba estátua neʼe kuandu rona múzika neʼebé hanesan inu nasionál. Maibé, ema Ebreu naʼin-tolu—Sadraque, Mesaque no Abednego—lakohi atu hakruʼuk, maski sira tenke hetan kastigu-mate.—Daniel, kapítulu 3.

Iha ita-nia tempu, matenek-naʼin ida kona-ba istória, naran Carlton Hayes, hakerek katak bandeira mak “símbolu atu haburas domin no laran-metin ba nasaun, no buat neʼebé sagradu atu adora nasaun”. Nia dehan: “Mane hasai xapeu kuandu haree ema marxa daudaun ho bandeira; no atu hahiʼi bandeira, ema hakerek poezia no labarik kanta inu.” Nia hatutan tan katak, atu haburas domin ba nasaun, iha “loron boot”, hanesan 4 Jullu ba ema amerikanu nuʼudar loron independénsia Estadus Unidus Amérika nian; iha ema neʼebé sai nuʼudar “santu no eroi sira”; no iha mós “templu”, katak fatin neʼebé sagradu ba nasaun. Iha serimónia públiku ida iha rai-Brazíl, ulun-naʼin ida husi tropa militár hatete: “Ema hanaʼi no adora bandeira . . . hanesan sira adora rai neʼebé sira moris ba.” Sin, hanesan The Encyclopedia Americana hakerek iha tempu uluk, “bandeira mak sagradu, hanesan krús”.

Edisaun foun husi ensiklopédia neʼe hatete katak inu nasionál mak “liafuan neʼebé fó sai povu nia domin ba nasaun, no dala barak husu Maromak nia ajuda no protesaun ba povu no ukun-naʼin sira”. Tan neʼe, Maromak Jeová nia atan komprende katak serimónia neʼebé atu haburas domin ba nasaun, hodi fó sinál respeitu nian ba bandeira no kanta inu nasionál, mak hanesan adorasaun. Loos, livru The American Character (Hahalok ema amerikanu nian) konta kona-ba Testemuña ba Jeová nia oan sira neʼebé la fó sinál respeitu nian ba bandeira no la halo juramentu atu fó laran ba nasaun iha eskola iha Estadus Unidus Amerika nian, no dehan: “Ikusmai, desizaun neʼebé Tribunál Aas Liu (iha Estadus Unidus) mak foti ona kona-ba kazu sira-neʼe hatudu ho klaru katak atividade hanesan neʼe mak atividade atu adora nasaun.”

Maski Maromak Jeová nia povu la hola parte iha serimónia ruma neʼebé, tuir sira-nia hanoin, kontra hasoru Bíblia, sira respeitu ema seluk nia direitu atu halo nuneʼe. Sira mós respeitu ba bandeira nasionál nuʼudar símbolu nasaun nian no rekoñese governu nuʼudar “ukun-naʼin” neʼebé halaʼo serbisu nuʼudar “Maromak nia atan”. (Roma 13:1-4) Testemuña ba Jeová la haluha atu harohan kona-ba “liurai no naʼi-ulun sira”. Tansá mak sira halo hanesan neʼe? Tanba sira hakarak atu “moris hakmatek no iha dame, hodi hamtaʼuk Maromak no moris nuʼudar ema”.​—1 Timoteo 2:2.

Vota iha eleisaun polítiku nian. Ema kristaun neʼebé loos respeitu ema seluk nia direitu atu bá vota. Sira la kontra eleisaun, no halo tuir ukun-naʼin sira neʼebé hili tiha ona. Maibé sira nafatin neutrál kona-ba polítika. (Mateus 22:21; 1 Pedro 3:16) Entaun, se ema kristaun ida hela iha rai neʼebé estadu mak obriga atu vota ka hasoru situasaun susar hanesan ema seluk sai hirus tebes ba ema neʼebé la bá tuir vota, saida mak nia sei halo? Karik ema kristaun ida hanoin-hetan katak Sadraque, Mesaque, no Abednego bá toʼo Dura, fatin neʼebé halaʼo serimónia, no bele hanoin katak nia mós iha situasaun hanesan neʼe, no ninia laran husik nia atu bá vota-fatin. Maibé, nia sei kuidadu atu labele kontra ninia desizaun atu nafatin neutrál kona-ba polítika. Nia tenke hanoin kona-ba matadalan neen tuirmai neʼe:

1. Jesus nia dixípulu sira “laʼós husi mundu neʼe nian”.—Joao 15:19.

2. Ema kristaun reprezenta Kristu no ninia Reinu.—Joao 18:36; 2 Korinto 5:20.

3. Ema neʼebé iha kongregasaun kristaun iha laran ida no fiar ida deʼit tanba iha domin hanesan domin neʼebé Kristu hatudu ba ema.—1 Korinto 1:10; Koloso 3:14.

4. Kuandu Ita apoia ulun-naʼin ruma iha eleisaun, Ita sei hola parte atu simu responsabilidade kona-ba buat neʼebé ulun-naʼin neʼe mak halo.—Haree matadalan husi 1 Samuel 8:5, 10-18 no 1 Timoteo 5:22.

5. Kuandu povu Izraél hakarak ema ida atu sai sira-nia liurai, Maromak Jeová hanoin ida-neʼe nuʼudar hahalok neʼebé la simu Nia.—1 Samuel 8:7.

6. Ema kristaun sira tenke haklaken Maromak nia Reinu ba ema hotu neʼebé iha hanoin oioin kona-ba polítika. Se nia la neutrál, nia la bele haklaken ba ema hotu-hotu.—Mateus 24:14; 28:19, 20; Ebreu 10:35.

Halo serbisu neʼebé troka serbisu militár. Iha rai balun, ba ema neʼebé lakohi tama serbisu militár, estadu haruka atu halo serbisu seluk durante tempu balun. Kuandu ita hasoru situasaun hanesan neʼe, ita presiza halo orasaun, no karik ita bele koʼalia ho maluk kristaun seluk neʼebé iha esperiénsia barak ona. Depois neʼe, ita tetu didiʼak informasaun neʼebé hetan ona no foti desizaun tuir ita ida-idak nia laran.—Provérbios 2:1-5; Filipe 4:5.

Maromak nia Liafuan haruka ita atu “hamtaʼuk liurai no naʼi-ulun sira, sarani sira halo tuir sira-nia haruka, sei hadiʼa an nafatin atu halo hahalok diʼak, . . . la buka istori malu”. (Tito 3:1, 2) Hodi hanoin-hetan liafuan sira-neʼe, Ita bele husu ba Ita-nia an: ‘Simu serbisu ida-neʼe sei kontra haʼu-nia desizaun atu nafatin neutrál nuʼudar ema kristaun ka lae?’ (Miquéias 4:3, 5) ‘Serbisu neʼe sei halo haʼu envolve an iha relijiaun falsu ka lae?’ (2 Korinto 6:16, 17) ‘Serbisu ida-neʼe sei halo susar mai haʼu atu halaʼo haʼu-nia responsabilidade nuʼudar ema kristaun, no bele mós hapara haʼu atu halaʼo knaar sira-neʼe ka lae?’ (Mateus 28:19, 20; Efeso 6:4; Ebreu 10:24, 25) ‘Ka iha parte seluk, halo serbisu neʼe sei ajuda haʼu atu aumenta haʼu-nia serbisu nuʼudar ema kristaun ka lae?’​—Ebreu 6:11, 12.

Se ema kristaun ida deside katak nia bele simu serbisu neʼebé troka serbisu militár duké tama komarka, maluk kristaun sira tenke respeitu ninia desizaun. (Roma 14:10) Maibé, se nia hanoin katak nia la bele halo serbisu hanesan neʼe, sira mós tenke respeitu desizaun neʼe.​—1 Korinto 10:29; 2 Korinto 1:24.