Hakarak hatene?

Tansá mak Jesus hatete atu “la rai-hela tua foun iha tua-fatin kulit tuan”?

▪ Iha tempu Bíblia nian, ema toman atu rai-hela tua iha animál nia kulit. (Josué 9:13) Porezemplu, sira halo botir husi animál nia kulit, hanesan bibi nia kulit. Atu halo botir husi kulit, ema tesi animál nia ulun no ain, no hasai animál nia kulit husi ninia isin ho kuidadu atu labele koʼa borus nia kabun. Depois ema habai kulit neʼe toʼo sai maran, no sira suku fali kuak husi kakorok no ain neʼebé tesi tiha, maibé husik loke kuak ida atu bele fui husi kuak neʼe. Depois, ema taka kuak neʼe hodi tau buat ruma atu sulan netik ka kesi ho tali.

Neineik-neineik, kulit sai toos no la bele sai luan ona. Nuneʼe tua-fatin neʼebé tuan, ladiʼak ona atu rai-hela tua foun, tanba tua foun kontinua atu aumenta alkol no gás. Tan neʼe, tua foun neʼe bele halo kulit tuan neʼebé sai toos ona nakfera. Maibé, ida-neʼe la akontese ho kulit foun tanba kulit neʼe bele sai luan. Tanba ida-neʼe mak Jesus koʼalia kona-ba buat neʼebé ema barak hatene iha ninia tempu. Nia koʼalia kona-ba saida mak akontese se ema tau tua foun iha tua-fatin kulit tuan: “Tua foun sei halo fera tua-fatin kulit tuan hodi halo tua nakfakar deʼit, no tua-fatin kulit sei sai aat. Maibé tua foun sei tau iha tua-fatin kulit foun, no sira rua sei la lakon.”—Lucas 5:37, 38.

Sé mak ema neʼebé “prontu atu oho” neʼebé Paulo temi kuandu soldadu Roma kaer nia?

▪ Tuir istória iha livru Apostolu, kuandu mosu situasaun manas iha templu iha Jeruzalein, komandante soldadu Roma nian kaer apóstolu Paulo tanba hanoin katak nia mak ulun ba grupu ho “ema rihun haat” neʼebé kontra governu no neʼebé “prontu atu oho”. (Apostolu 21:30-38) Saida mak ita hatene kona-ba ema sira-neʼe, neʼebé “prontu atu oho”?

Liafuan gregu neʼebé tradús ba ‘ema neʼebé prontu atu oho’ mai husi liafuan latín sicarii, katak “ema neʼebé uza kriis”. Iha apóstolu sira-nia tempu, ema ida neʼebé hakerek ema nia istória, naran Flávio Josefo, hatete katak ema neʼebé kaer kriis sira-neʼe mak grupu judeu nian ida neʼebé hadomi tebes sira-nia rai, neʼebé kontra Roma nia ukun no organiza atu oho Roma nia polítiku-naʼin sira.

Josefo hatete katak ema sira-neʼe “oho ema iha loron, no iha sidade laran, no sira halo ida-neʼe liuliu iha tempu neʼebé iha festa boot, tanba kuandu sira iha ema barak nia leet, sira bele subar sira-nia kriis iha sira-nia faru laran, hodi nuneʼe sira bele sona sira-nia inimigu”. Kuandu ema neʼebé sira sona monu no mate, sira finje hirus atu ema ida la bele deskonfia katak sira mak oho ema neʼe. Josefo mós hatete katak ema sira neʼebé kaer kriis, ikusmai sai nuʼudar ulun ba ema judeu sira neʼebé funu hasoru Roma iha tinan 66-70. Tan neʼe mak komandante Roma nian hakarak tebes atu kaer grupu neʼe nia ulun-naʼin.

[Dezeñu iha pájina 13]

Tua-fatin kulit tuan

[Dezeñu iha pájina 13]

Dezeñu kona-ba ema neʼebé kaer kriis