Buat aat hotu mai husi neʼebé?

K OMANDANTE ida neʼebé reprezenta Nasoins Unidas iha rai-Ruanda hatete: “Haʼu fiar duni katak Diabu Satanás iha.” Nia koʼalia nuneʼe tanba nia hanoin fali buat neʼebé akontese iha tinan 1994 kuandu Nasoins Unidas taka matan hodi husik deʼit rasa rua oho malu. Ema seluk neʼebé koʼalia kona-ba buat aat neʼebé akontese iha tempu neʼebá, hatete: “Se ema duvida katak Diabu iha, bá haree toʼok rate neʼebé ema rihun ba rihun hakoi.” Diabu mak halo buat aat sira-neʼe ka lae?

Ema barak hanoin katak violénsia no terus aat neʼebé akontese iha mundu neʼe la mai husi espíritu aat ida. Maibé ema balu hanoin katak hahalok aat sira-neʼe akontese tanba hakarak aat neʼebé iha nanis iha ema nia laran. Ema seluk fali hanoin katak iha grupu riku neʼebé iha kbiit boot, neʼebé kontrola ema hodi ukun mundu ba tempu kleur. No ema seluk tan duun governu no ukun-naʼin sira ba buat aat neʼebé akontese iha mundu.

Ita hanoin oinsá? Mundu neʼe nakonu ho buat aat. Maski ukun-naʼin sira koko atu hadiʼa buat aat no terus neʼebé akontese iha mundu, maibé buat sira-neʼe sei iha nafatin. Tanbasá mak ema kontinua atu halo buat aat hanesan neʼe? Tanbasá mak ema la hanoin kona-ba rezultadu aat neʼebé mosu husi sira-nia hahalok aat? Iha buat ruma neʼebé kontrola ema ka lae? Sé mak ukun mundu neʼe? Resposta ba pergunta sira-neʼe sei halo Ita hakfodak.