Aprende husi Maromak nia Liafuan
Bíblia fó-hatene nanis kona-ba futuru ka lae?
Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.
1. Buat hotu-hotu neʼebé Bíblia fó-hatene nanis sai loos ka lae?
Só Maromak Forsa Boot Liu Hotu deʼit mak bele hatene kona-ba buat hotu neʼebé sei akontese iha futuru. (Amós 3:7) Porezemplu, husi tempu uluk, nia fó-hatene nanis kona-ba bainhira mak Mesias, ka Kristu sei mosu. Nia fó-hatene katak Mesias sei mai husi Abraão nia bei-oan. Nia mós fó-hatene katak Mesias sei sai ukun-naʼin neʼebé loke dalan atu ema neʼebé halo tuir Maromak sei hetan fali moris perfeitu no sei la moras tan. (Gênesis [Kejadian] 22:18; Isaías [Yesaya] 53:4, 5) Mesias neʼebé promete nanis ona sei moris mai iha Belém.—Lee Miquéias (Mikha) 5:2.
Jesus mak ida neʼebé Maromak hili atu sai Mesias. Tinan 700 liu antes Jesus moris, Bíblia fó-hatene nanis katak Mesias sei moris husi virjen ida, no katak ema sei odi nia. Bíblia mós fó-hatene nanis katak nia sei fó ninia moris atu kasu ema barak nia sala, no katak ema sei hakoi nia iha ema riku nia rate. (Isaías 7:14; 53:3, 9, 12) Bíblia mós hatete katak Mesias sei tama iha Jerusalém hodi saʼe kuda-burru no katak ema sei faʼan nia ho folin osan-mutin 30. Bíblia fó-hatene nanis kona-ba neʼe tinan 500 liu antes ida-neʼe akontese. Liafuan hotu-hotu neʼebé Bíblia fó-hatene nanis kona-ba Mesias sai loos.—Lee Zacarias (Zakharia) 9:9; Mateus 27:9.
2. Maromak bele fó sai nanis bainhira mak buat ruma sei akontese ka lae?
Tinan 500 liu antes Mesias mosu, Bíblia fó-hatene nanis kona-ba tinan saida mak Jesus sei hatudu nia an nuʼudar Mesias. Bíblia koʼalia kona-ba semana 7 ho tan semana 62, neʼe katak hamutuk semana 69. Maibé semana neʼe laʼós semana neʼebé iha loron hitu, maibé semana tinan nian, katak, semana ida mak tinan hitu. Entaun kuandu sura hamutuk, neʼe sai tinan 483. Maibé bainhira mak komesa atu sura tinan neʼe? Tuir Bíblia, tinan neʼe komesa sura kuandu Maromak nia atan naran Neemias toʼo Jerusalém no komesa atu harii fali sidade. Rai-Pérsia nia istória hatudu katak ida-neʼe akontese iha tinan 455 molok Kristu. (Neemias 2:1-5) Entaun, kuandu ita sura tinan 483 husi tinan 455 molok Kristu, neʼe lori ita ba tinan 29, no iha tinan neʼe mak Jesus hetan batizmu atu sai Mesias. Sin, buat neʼebé Bíblia fó-hatene nanis sai loos duni.—Lee Daniel 9:25.
3. Buat neʼebé Bíblia fó-hatene nanis sai loos ohin loron ka lae?
Jesus fó-hatene nanis kona-ba saida mak sei akontese iha ita-nia tempu. Porezemplu, nia fó-hatene nanis katak ema sei haklaken lia-foun diʼak reinu nian. Reinu neʼe mak Maromak nia Ukun neʼebé sei lori buat diʼak ba ema neʼebé hadomi Maromak iha mundu tomak. Maromak nia Ukun mós sei halakon buat aat hotu iha mundu neʼe.—Lee Mateus 24:14, 21, 22.
Bíblia fó-hatene nanis sinál ida-idak neʼebé hatudu katak mundu aat neʼe atu ramata. Maski ema haree mundu neʼe hanesan laʼo ba oin, maibé Bíblia fó-hatene nanis katak ema sei halo aat raiklaran neʼe. Ema sei terus tanba funu, rai-hamlaha, rai-nakdoko, no moras-peste iha fatin oioin. (Lucas 21:11; Apokalipse 11:18) Ema sei la moris tuir Maromak nia matadalan kona-ba morál. Iha tempu susar sira-neʼe, Jesus nia dixípulu sira sei haklaken lia-foun diʼak kona-ba Maromak nia Ukun ba ema iha mundu tomak.—Lee Mateus 24:3, 7, 8; 2 Timoteo 3:1-5.
4. Ema nia moris iha futuru sei sai oinsá?
Maromak Forsa Boot Liu Hotu iha planu diʼak ba sira neʼebé laran-metin ba nia. Jesus Kristu hamutuk ho ema naʼin-144.000 neʼebé Maromak hili husi rai, sei ukun mundu tomak husi lalehan. Sira sei hamutuk iha Maromak nia governu hodi ukun rai ba tinan rihun ida. Ema mate sei moris hiʼas no iha oportunidade atu simu moris rohan-laek. Liután neʼe, Maromak nia Ukun sei kura ema hotu. Moras no mate sei la iha tan.—Lee Apokalipse 5:10; 20:6, 12; 21:4, 5.
Atu hetan informasaun liután, haree pájina 23-25 no 197-201 husi livru Tuir Loloos, Saida mak Bíblia Hanorin?