Jesus promete duni ba naʼok-teen neʼebé iha nia sorin atu moris iha lalehan ka lae?

Tuir Bíblia Liafuan diak ba imi, Jesus promete ba kriminozu ida neʼebé kastigu iha nia sorin: “Tebes, haʼu dehan ba ó: ohin kedas ó sei hamutuk ho haʼu iha lalehan.” (Lucas 23:43) Maibé Bíblia balun tradús Jesus nia liafuan neʼe nuʼudar: “Haʼu hatete loloos ba ó ohin, ó sei hamutuk ho haʼu iha Paraízu.” Oinsá mak ita hatene Jesus la dehan ba naʼok-teen neʼe katak nia sei hamutuk ho nia iha lalehan?

Ulukliu, mai ita haree ema aat neʼe tuir kritériu ka lae atu bá lalehan. Ema sira neʼebé iha esperansa atu bá lalehan tenke hetan batizmu ho bee no ho espíritu santu hodi sai Jesus nia dixípulu no sai Maromak nia oan hakiak. (Joao 3:3, 5) Sira mós presiza halo tuir Maromak nia matadalan kona-ba morál no iha hahalok sira hanesan laran-moos, laran-metin no laran-sadiʼa. (1 Korinto 6:9-11) Sira mós tenke laran-metin nafatin ba Maromak no Kristu toʼo sira ramata sira-nia moris iha rai. (Lucas 22:28-30; 2 Timoteo 2:12) Se sira halo tuir kritériu neʼe mak sira bele simu moris-hiʼas ba lalehan no hetan knaar espesiál atu serbí nuʼudar amlulik no liurai ho Kristu, hodi ukun ema ba tinan rihun ida.—Apokalipse 20:6.

Maibé ema neʼebé iha Jesus nia sorin, nia moris nuʼudar naʼok-teen no nia mate mós nuʼudar kriminozu. (Lucas 23:32, 39-41) Maski nia hatudu respeitu kuandu nia koʼalia ba Jesus, hodi dehan: “Hanoin haʼu wainhira Ita toʼo Ita-nia reinu”, maibé nia seidauk hetan batizmu ho espíritu santu no seidauk sai Jesus nia dixípulu. (Lucas 23:42) Nia mós la hatudu laran-metin no hahalok diʼak seluk durante ninia moris. Klaru katak Jesus sei la promete ba nia atu ukun hamutuk ho ninia dixípulu sira seluk neʼebé hatudu ona sira-nia laran-metin.—Roma 2:6, 7.

Hanoin toʼok kona-ba ezemplu neʼe: Se ema ida naʼok Ita-nia osan maibé depois neʼe nia husu perdua, karik Ita deside atu la lori nia ba tribunál. Maibé Ita sei tau fiar ba nia ka lae atu kaer responsabilidade iha Ita-nia bisnis ruma, ka husik nia mak tau matan ba Ita-nia família? Klaru katak Ita sei fó responsabilidade neʼe ba ema neʼebé Ita tau fiar tiha ona. Hanesan neʼe mós ho sira neʼebé iha esperansa atu moris iha lalehan. Liuhusi sira-nia hahalok iha rai, sira presiza hatudu katak sira sei halo tuir Maromak kuandu sira ukun iha lalehan. (Apokalipse 2:10) Maski naʼok-teen neʼe koʼalia ba Jesus ho laran, maibé nia la halo hahalok sira-neʼe.

Jesus dehan ba ema aat neʼe katak nia sei hamutuk ho Jesus iha lalehan iha loron neʼe ka lae? Neʼe la akontese tanba iha tempu neʼebá Jesus rasik mós la bá kedas lalehan. Tuir loloos, nia “iha rai laran”, katak rate laran, ba loron tolu. (Mateus 12:40; Marcos 10:34) No depois Jesus moris hiʼas, nia iha rai ba loron 40 antes nia saʼe bá lalehan. (Apostolu 1:3, 9) Ida-neʼe hatudu katak ema aat neʼe la bá lalehan ho Jesus iha loron neʼebé sira mate.

Se nuneʼe, saida mak Paraízu neʼebé Jesus promete ba naʼok-teen neʼe? Depois ema aat neʼe moris hiʼas, nia sei hela iha mundu neʼebé hanesan jardín furak, neʼe mak Paraízu neʼebé Jesus sei ukun. (Apostolu 24:15; Apokalipse 21:3, 4) Atu aprende liután kona-ba Paraízu no saida mak Maromak hakarak ita atu halo, bele kontaktu ho Testemuña ba Jeová.