INFORMASAUN IHA OIN | LIA-BOSOK NEʼEBÉ HADOOK EMA HUSI MAROMAK
Tanbasá ema barak sente susar atu hadomi Maromak?
“‘Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak no ho imi-nia neon tomak.’ Neʼe mak mandamentu neʼebé boot liu no primeiru.”—Jesus Kristu, tinan 33 ECa
Ema balu sente susar atu hadomi Maromak. Sira hanoin katak Maromak la hanoin ema no nia trata aat ema. Haree toʼok ema balu nia hanoin:
“Haʼu halo orasaun atu husu Maromak nia ajuda, maibé iha tempu hanesan haʼu sente katak Maromak dook husi haʼu no la rona haʼu-nia orasaun. Haʼu hanoin katak Maromak la iha sentimentu.”—Marco, husi rai-Itália.
“Maski haʼu hakarak tebes atu serbí Maromak, maibé haʼu sente nia dook husi haʼu. Haʼu hanoin katak Maromak mak laran-aat no hakarak deʼit atu kastigu ema. Haʼu la fiar katak nia hadomi ema.”—Rosa, husi rai-Guatemala.
“Bainhira haʼu sei labarik, haʼu fiar katak Maromak buka deʼit ita-nia sala, no nia hein deʼit atu fó-kastigu ba ita. Kuandu haʼu boot, haʼu hanoin katak Maromak la interese ba ita. Haʼu haree Maromak hanesan primeiru ministru neʼebé ukun ninia povu, maibé loloos nia la interese ba sira.”—Ramonab, husi rai-Kanadá.
Ita hanoin oinsá? Ita bele hadomi Maromak ka lae? Durante tinan atus ba atus, ema Kristaun husu pergunta neʼe. Porezemplu, uluk iha ema Kristaun barak neʼebé la halo orasaun ba Maromak. Tanbasá? Tanba sira taʼuk tebes nia. Matenek-naʼin ida kona-ba ema nia istória, naran Will Durant hatete: “Sala-naʼin sira la brani atu halo orasaun ba Maromak neʼebé laran-aat no dook husi ema.”
Tanbasá ema komesa haree Maromak nuʼudar “laran-aat no dook husi ema”? Saida mak Bíblia hanorin kona-ba Maromak. Se Ita aprende lia-loos kona-ba Maromak, neʼe bele ajuda Ita atu hadomi nia ka lae?
b Naran balu laʼós naran neʼebé loos.