PERGUNTA HUSI LEE-NAʼIN
“Promesa” no “sinál” neʼebé Maromak fó ba ema kose-mina ida-idak mak saida?—2 Korinto 1:21, 22.
Iha tempu uluk, ema hanehan kadeli ba rai-mean ka lilin-been hodi sai sinál ida atu legaliza dokumentu
Promesa: Livru ida hatete katak liafuan gregu neʼebé tradús ba “promesa” husi 2 Korinto 1:22 mak liafuan neʼebé uza bainhira halo “akordu legál no akordu kontratu nian”, no signifika katak selu uluk sorin, ka fó uluk osan uitoan ba buat neʼebé atu sosa kotu, hodi nuneʼe, ema neʼe iha direitu atu simu fali buat ida. Liafuan neʼe mós iha signifika katak halo juramentu no bele refere kona-ba halo legál ba kontratu ida”. Bainhira ema ida hetan kose-mina, neʼe hanesan Jeová halo ona promesa ida ba sira, maibé sira-nia kolen mak bainhira simu isin neʼebé la dodok iha lalehan, hanesan hakerek iha 2 Korinto 5:1-5. Neʼe mós inklui atu simu prezente moris neʼebé labele mate tan.—1 Korinto 15:48-54.
Iha lia-gregu modernu, liafuan sira-neʼe mós refere ba kadeli prenda nian. Neʼe kona loos ema kose-mina sira-nia situasaun tanba Bíblia kompara sira hanesan Kristu nia feen.—2 Korinto 11:2; Apokalipse 21:2, 9.
Sinál: Iha tempu uluk, se ema atu prova katak sasán neʼe ninian, sasán neʼe laʼós falsu, ka atu halo akordu ruma, nia tenke tau karimbu atu halo sinál ida. Kona-ba ema kose-mina mós hanesan, espíritu santu mak sira-nia “sinál” neʼebé hatudu katak sira mak Maromak nian. (Éfeso 1:13, 14) Sinál neʼe sei sai metin ba sira iha tempu neʼebé sira mate ho laran-metin ba Jeová, ka selae, maizumenus iha tempu neʼebé antes terus boot hahú.—Éfeso 4:30; Apokalipse 7:2-4.