Liafuan ida ho signifika neʼebé kleʼan

IHA tempu antigu, dala ruma mane sira uza deʼit liafuan “feto” hodi bolu feto ida, maibé tuir ema ebreu nia kultura, neʼe mak dalan neʼebé respeitu atu bolu feto. Jesus mós halo hanesan neʼe. Porezemplu, bainhira Jesus kura tiha feto ida neʼebé laʼo bonko ba tinan 18, nia dehan: “Feto, agora ó livre ona husi ó-nia moras.” (Lucas 13:10-13) Jesus mós uza liafuan neʼe hodi koʼalia ba ninia inan rasik. (João 19:26; 20:13) Maibé iha tan liafuan ida neʼebé respeitu liu fali liafuan “feto”.

“Oan-feto.” Bíblia uza liafuan mamar neʼe bainhira koʼalia ba feto balu. Liafuan neʼe mak Jesus uza hodi koʼalia ba feto ida neʼebé raan suli ba tinan 12 ona. Dalan neʼebé feto neʼe hakbesik ba Jesus kontra Maromak nia Ukun-Fuan tanba ninia kondisaun halo nia la moos. Moisés nia Ukun-Fuan hatete katak ema neʼebé la moos tenkesér haketak an husi ema seluk. (Levítico [Imamat] 15:19-27) Maibé nia presiza tebes ajuda, tanba “nia hetan terus barak ona iha doutór sira-nia liman no nia mós gasta ona nia osan hotu, maski nuneʼe nia la sai diʼak, maibé sai aat liután”.—Marcos 5:25, 26.

Feto neʼe laʼo neineik husi ema-lubun nia leet no hakbesik Jesus husi kotuk hodi kaer Jesus nia unuk ninin. Ninia raan para kedas no la suli tan! Feto neʼe hanoin katak ema la hatene saida mak nia foin halo, maibé Jesus husu: “Sé mak kona haʼu?” (Lucas 8:45-47) Ho ida-neʼe, feto neʼe sai taʼuk no nakdedar hodi monu ain ba Jesus “no fó sai lia-loos hotu”.—Marcos 5:33.

Jesus koʼalia ho laran-diʼak atu halo kalma feto neʼe hodi dehan: “Haʼu-nia oan-feto, aten-brani bá!” (Mateus 9:22) Matenek-naʼin sira kona-ba Bíblia hatete katak liafuan “oan-feto” iha lia-ebraiku no lia-gregu bele uza atu fó sai “laran-diʼak no domin”. Tan neʼe mak tuirmai Jesus hatete ba nia: “Ó-nia fiar mak halo ó sai diʼak. Laʼo ho dame bá, no sai isin-diʼak bá husi ó-nia moras boot neʼe.”—Marcos 5:34.

Ema riku naran Boas mós uza liafuan neʼe bainhira nia koʼalia ba Rute, feto husi rai-Moab. Iha tempu neʼebá Rute nia laran sente taʼuk tanba nia hili fulin restu husi ema neʼebé nia la koñese nia toʼos. Maibé Boas hatete ba nia: “Rona mai, haʼu-nia oan-feto.” Tuirmai nia haruka Rute atu kontinua hili fulin sira-neʼe. Rute monu ain ba Boas hodi husu tansá mak Boas hatudu laran-diʼak ba nia maski nia ema estranjeiru ida. Boas hatán fali ho liafuan sira neʼebé halo Rute sente laran-kmaan, nia dehan: “Haʼu rona tiha ona kona-ba buat hotu neʼebé ó halo ona ba ó-nia banin-feto [feto-faluk Noemi] . . . Haʼu hein katak Jeová sei haraik bensaun ba ó tanba buat neʼebé ó halo ona.”—Rute 2:8-12.

Jesus no Boas hatudu ezemplu neʼebé diʼak ba katuas kongregasaun sira! Dala ruma katuas naʼin-rua presiza fó ajuda ba irmán neʼebé sente laran-tun. Katuas sira-neʼe sei halo orasaun uluk atu buka matadalan husi Jeová no tuirmai rona didiʼak ba irmán neʼe. Se sira mak halo nuneʼe, sira sei hatene oinsá atu fó laran-manas no laran-kmaan ba irmán neʼe liuhusi Maromak nia Liafuan.—Roma 15:4.