Naran ida husi Bíblia neʼebé hetan iha sasán antigu

Iha 2012, arkeólogu sira buka-hetan kusi rai-mean ida husi tinan 3.000 liubá. Kusi neʼe rahun loos ona. Peskizadór sira kontente tebes kona-ba kusi neʼe. Tanbasá? Sira laʼós kontente kona-ba kusi neʼe, maibé kona-ba liafuan neʼebé hakerek iha kusi neʼe.

Bainhira arkeólogu sira tau hamutuk fali pedasuk ida-idak husi kusi neʼe mak sira foin bele lee liafuan Kanaán neʼebé hakerek iha kusi neʼe. Liafuan sira-neʼe mak: “Eshba’al Ben Beda”, signifika katak “Beda nia oan-mane Esbaal”. Neʼe mak dala primeiru arkeólogu sira buka-hetan naran neʼe neʼebé hakerek iha sasán husi tempu antigu nian.

Tuir loloos Bíblia temi ema ida ho naran Esbaal. Nia mak Liurai Saul nia oan. (1 Crônicas [Tawarikh] 8:33; 9:39) Profesór Yosef Garfinkel, nia mós ema ida husi sira neʼebé buka-hetan kusi neʼe, nia hatete: “Ita hakfodak tanba naran Esbaal neʼebé Bíblia temi, mosu deʼit iha tempu neʼebé Liurai David ukun, maibé agora mós tama ona iha arkeólogu sira-nia lista.” Neʼe mak evidénsia ida tan neʼebé hatudu katak arkeolojia mós apoia Bíblia!

Iha Bíblia, Saul nia oan-mane Esbaal mós bolu naran Isboset. (2 Samuel 2:10) Tanbasá mak “baal” troka fali ho “boset”? Peskizadór sira esplika katak ema neʼebé hakerek Segundu Samuel lakohi uza naran Esbaal tanba naran neʼe bele fó-hanoin ema Izraél sira kona-ba Baal, maromak udan no anin fuik neʼebé ema Kanaán sira adora. Maibé ita sei bele buka-hetan naran Esbaal husi livru Crônicas.