Pergunta husi lee-naʼin

Salmo 144:12-15 aplika ba Maromak nia povu ka ba estranjeiru laran-aat sira neʼebé temi iha versíkulu 11?

Maski lia-ebraiku husi eskritura neʼe bele komprende iha dalan oioin, maibé informasaun sira tuirmai sei ajuda ita komprende ho loloos versíkulu sira-neʼe koʼalia kona-ba sé.

1. Hanoin kona-ba Salmo 144 tomak. Liafuan “hodi nuneʼe” iha versíkulu 12, hatudu katak bensaun sira neʼebé temi iha versíkulu 12 toʼo 14 aplika ba ema laran-loos, sira neʼebé husu atu hetan ‘salvasaun’ husi ema aat (versíkulu 11). Versíkulu 15 mós apoia ideia neʼe. Liafuan rua “ksolok” aplika ba ema neʼebé hanesan, ema neʼebé “adora Jeová nuʼudar ninia Maromak!”

2. Esplikasaun neʼe apoia malu ho eskritura seluk neʼebé temi Maromak nia bensaun ba ninia povu neʼebé laran-metin ba nia. Salmo 144 fó sai David nia esperansa katak, bainhira Maromak salva tiha nasaun Izraél husi inimigu, Maromak sei fó bensaun ba ninia povu atu iha moris neʼebé diʼak no haksolok. (Levítico [Imamat] 26:9, 10; Deuteronômio [Ulangan] 7:13; Salmo [Mazmur] 128:1-6) Porezemplu, Deuteronômio 28:4 hatete: “Bensaun sei toʼo ba imi-nia oan sira no ba rezultadu husi imi-nia toʼos no bensaun sei toʼo ba imi-nia animál-hakiak nia oan sira, imi-nia karau-oan no bibi-oan sira.” Neʼe mak buat neʼebé akontese duni iha David nia oan Salomão nia ukun, nasaun Izraél moris ho diʼak no hakmatek. No Salomão nia ukun mós sai ilas ba Mesias nia ukun iha futuru.​—1 Reis (Raja-Raja) 4:20, 21; Salmo (Mazmur) 72:1-20.

Esplikasaun neʼe ajuda ita atu haree ho momoos katak Salmo 144 tomak fó sai esperansa neʼebé Jeová nia povu hein ba tempu kleur ona. Neʼe mak kona-ba Jeová atu halakon ema aat hotu, tuirmai nia sei lori dame no fó bensaun ba ema laran-loos ba nafatin.​—Salmo (Mazmur) 37:10, 11.