Pergunta husi haklaken-naʼin

◼ Diʼak atu ema Testemuña ba Jeová ida simu tratamentu no baixa iha ospitál neʼebé relijiaun ida mak tau matan ka lae?

Relijiaun barak iha ospitál atu fó tratamentu ba ema moras sira. Baibain, sira iha ospitál hanesan neʼe laʼós atu habelar hanorin husi Babilónia Boot. (Apok 18:​2, 4) Foufoun, karik sira halo ospitál atu halibur osan ba sira-nia relijiaun. Ohin loron, ospitál balu sei uza hela relijiaun nia naran, maibé laʼós relijiaun mak tau matan. No iha mós ospitál neʼebé relijiaun mak arranju hela sira-nia ema atu halaʼo serbisu.

Se ema Testemuña ba Jeová ida presiza bá ospitál, nia tenke halo desizaun rasik hodi hili atu bá ospitál relijiaun nian ka lae. Karik ema ida nia laran husik nia atu bá, no ema seluk nia laran la husik nia atu halo nuneʼe. (1 Tim 1:5) Mai ita hanoin kona-ba pontu balu atu ajuda ita foti desizaun kuandu hasoru situasaun hanesan neʼe.

Porezemplu, karik besik Ita-nia hela-fatin iha deʼit ospitál relijiaun nian. Ka maski iha ospitál seluk, maibé ospitál relijiaun nian mak fó tratamentu neʼebé diʼak liu. Karik ospitál relijiaun nian deʼit mak iha sasán kompletu atu halo tratamentu ba Ita-nia moras, ka doutór husi ospitál neʼe deʼit mak bele halo operasaun ruma. No mós, dala ruma ospitál relijiaun nian respeitu ita-nia desizaun kona-ba la simu raan, maibé ospitál seluk ka ospitál governu nian la respeitu ita-nia desizaun neʼe. Nuneʼe, antes atu hili ospitál ida-neʼebé mak Ita atu bá, diʼak atu hanoin kona-ba pontu hirak-neʼe.

Karik tanba Ita hanoin katak osan neʼebé Ita selu mak kolen ba tratamentu deʼit, Ita deside katak Ita bele bá ospitál relijiaun nian. Karik Ita hanoin katak ospitál relijiaun nian neʼe hanesan bisnis deʼit, no hanoin mós katak Ita la selu osan atu fó ajuda ka halo kontribuisaun hodi apoia relijiaun falsu neʼe. Maibé, Ita atu selu deʼit ba ai-moruk no tratamentu neʼebé Ita hetan.

Se Ita deside atu bá, Ita nuʼudar ema kristaun ida tenkesér kuidadu atu nunka hola parte iha sira-nia adorasaun neʼebé falsu. No mós, ita la bolu ema neʼebé halaʼo serbisu ka vizita ospitál ho títulu hanesan “Padre” ka “Madre”. (Mt 23:9) Ita tenke kuidadu an nafatin katak, Ita tama ospitál neʼe atu simu tratamentu deʼit, laʼós atu envolve an ho sira-nia relijiaun.

Kuandu baixa iha ospitál, Ita bele fó-hatene katak Ita mak ema Testemuña ba Jeová no hakarak simu vizita husi katuas kongregasaun nian. Hodi halo nuneʼe, Ita sei simu nafatin apoiu iha dalan espirituál durante tempu neʼebé Ita iha ospitál.​—1 Tes 5:​14.

Família neʼebé fiar-naʼin, katuas kongregasaun nian, no ema seluk iha kongregasaun presiza atu fó ajuda espirituál ba ita-nia irmaun no irmán neʼebé baixa ba tempu kleur iha ospitál, liuliu se sira mak katuas-ferik ona no tama iha ospitál relijiaun nian. Hodi halo nuneʼe, ita bele fó laran-­haksolok ba ema moras neʼe, no bele ajuda sira atu la hola parte iha atividade relijiaun falsu nian, maski la ho neon.

Hodi tetu didiʼak pontu hirak-neʼe, ita ida-idak tenke hanoin kona-ba ita-nia situasaun, no halo desizaun rasik kona-ba ospitál ida-neʼebé mak ita sei hili atu simu tratamentu.​—Gal 6:5.