Halo planu ba buat neʼebé espirituál
1 Ita hotu iha knaar neʼebé espesiál, neʼe mak hahiʼi Maromak Jeová ba nafatin! Maibé atubele halaʼo nafatin knaar neʼe, ita bele halo planu espirituál oioin agora kedas, no hakaʼas an atu hetan ida-neʼe. Hodi nuneʼe ita bele uza ita-nia kbiit ho didiʼak. (1 Kor 9:26) Planu saida mak diʼak ba Ita?
2 Estuda Bíblia: Ita prepara ba reuniaun hotu ka lae? Se nuneʼe, Ita mós uza tempu atu hanoin kleʼan no halo riset ka lae? Porezemplu, semana-semana, kuandu Ita prepara Ita-nia Menara Pengawal ka prepara ba Reuniaun Estudu Livru nian, Ita buka deʼit resposta ba pergunta ida-idak ka Ita lee eskritura hotu neʼebé temi no hanoin kleʼan kona-ba informasaun neʼebé Ita estuda? Ita bele halo planu atu buka informasaun liután semana-semana kona-ba programa atu lee Bíblia husi Eskola Servisu Teokrátiku ka lae? Presiza tempu no hakaʼas an atu halo ida-neʼe. Maibé se halo duni, Ita sei hetan bensaun barak.—Prov 2:4, 5.
3 Reuniaun kongregasaun nian: Planu seluk mak tuir beibeik reuniaun lima neʼebé kongregasaun halaʼo semana-semana. Diʼak atu toʼo reuniaun-fatin sedu hodi bele ransu hamutuk ho maluk fiar-naʼin sira no mós halo parte iha kanta no orasaun atu loke reuniaun. Hodi nuneʼe ita hotu bele fó laran-manas ba malu iha kongregasaun laran. Ita mós bele hakaʼas an atu fó komentáriu iha reuniaun ida-idak no buka atu halo diʼak liután ita-nia komentáriu. Karik Ita bele koʼalia kona-ba oinsá mak eskritura ida apoia informasaun iha parágrafu laran. No mós, karik Ita bele hatudu oinsá mak informasaun sira-neʼe bele uza iha ita-nia moris loroloron nian.—Ebr 10:24, 25.
4 Haklaken: Atu ita-nia serbisu haklaken bele sai diʼak liután, ita presiza halo planu. Ita rasik iha planu kona-ba oras neʼebé Ita hakarak atu hetan fulan-fulan ka lae? Ema balun sente katak diʼak ba sira atu halo planu hanesan neʼe. Ita bele hadiʼa buat ruma kona-ba Ita-nia haklaken ka lae? Porezemplu, koko makaʼas atu uza Bíblia durante Ita haklaken husi uma ba uma, ajuda Ita-nia vizita fali atu laʼo ba oin, hakaʼas an atu hahú estudu Bíblia ho ema seluk, ka hanorin ema ho didiʼak durante estuda ho sira.
5 Inan-aman, imi ajuda imi-nia oan atu halo planu kona-ba serbisu ba Maromak Jeová ka lae? Ajuda sira atu haree katak serbí nuʼudar pioneiru, misionáriu, ka serbisu iha Betél mak dalan neʼebé diʼak atu hatudu sira-nia agradese ba Maromak Jeová.—Ecle 12:1.
6 Nuʼudar ita hanoin kleʼan kona-ba ita-nia atividade sira, depois halo planu ba buat neʼebé espirituál, no hakaʼas an atu hetan ida-neʼe, ita sei sente ksolok hodi halaʼo Maromak nia serbisu, no sei fó laran-manas ba ema seluk.—Rom 1:12.