“Matenek hatudu an loloos hodi ninia hahalok sira”
1. Kuandu ita halaʼo serbisu haklaken, dala ruma ita hasoru situasaun saida?
1 Dala ruma ita hasoru ema neʼebé trata aat ita tanba sira komprende sala kona-ba Testemuña ba Jeová. Karik sira rona informasaun neʼebé la loos husi rádiu ka televizaun. Iha rai balu ema koñese ita nuʼudar “relijiaun neʼebé perigu”. Se ita hasoru situasaun hanesan neʼe, ita presiza halo saida?
2. Kuandu hasoru ema neʼebé hatete aat ita, saida mak ajuda ita atu la laran-tun?
2 Hanoin ho loos: Jesus no ninia dixípulu sira iha apóstolu sira-nia tempu mós hetan susar husi ema neʼebé la komprende no hatete aat sira. (Apos 28:22) Maibé Maromak Jeová nia atan sira-neʼe la husik susar neʼe halo sira sente moe kona-ba sira-nia serbisu haklaken. Jesus hatete: “Matenek hatudu an loloos hodi ninia hahalok sira.” (Mt 11:18, 19) Jesus kontinua halaʼo ninia Aman nia hakarak ho laran-manas hodi fiar katak ema neʼebé buka duni lia-loos sei simu lia-foun diʼak. Ita mós bele banati-tuir Maromak nia Oan nia ezemplu hodi hanoin katak nia mós hetan susar hanesan ita.
3. Tansá mak ita lalika hakfodak kuandu ema koʼalia aat no fó-terus ita?
3 Jesus hatete katak mundu sei odi ninia dixípulu sira hanesan mundu odi nia. (Joao 15:18-20) Tan neʼe, ita lalika hakfodak kuandu ema koʼalia aat no fó-terus ita. Tuir loloos, ita presiza prepara ita-nia an atu hasoru susar neʼebé boot liu, basá Satanás nia loron hela uitoan deʼit, tan neʼe nia sai hirus liután. (Apok 12:12) Ita bele haksolok tanba ita hatene katak mundu neʼebé Satanás ukun besik ona atu ramata.
4. Se ita hasoru ema neʼebé la respeitu ita, ita bele halo saida?
4 Hatán ho laran-diʼak: Maski hasoru ema neʼebé la respeitu ita ka koʼalia kontra ita, ita presiza nafatin hatán ho laran-diʼak no laran-maus. (Prov 15:1; Kol 4:5, 6) Se bele, diʼak mós atu esplika ba sira katak ema barak rona informasaun neʼebé la loos kona-ba Testemuña ba Jeová, ka husu: “Saida mak halo Ita hanoin hanesan neʼe?” Se ita koʼalia ho laran-maus, karik ema sei hanoin katak informasaun neʼebé nia rona mak sala no karik iha futuru nia mós hakarak atu rona ita. Maibé se hasoru ema neʼebé hirus tebes, diʼak liu atu hadook an husi ema neʼe iha dalan neʼebé hatudu respeitu. Ita bele fiar katak Maromak Jeová hafolin ita-nia serbisu haklaken maski ema la simu ita.—Isa 52:7.