Serbisu neʼebé halo ita haksolok tebes
1. Ohin loron, ita hola parte iha serbisu importante saida?
1 Iha Jesus nia tempu, ema sente haksolok tebes kuandu sira haree Jesus fó isin-diʼak ba ema sira neʼebé moras. (Lc 5:24-26) Ohin loron, ita haksolok iha serbisu atu ajuda ema hatene kona-ba Maromak Jeová, neʼe mak fó isin-diʼak iha dalan espirituál. (Apok 22:1-3, 17) Ita kontente tebes atu lee esperiénsia sira kona-ba oinsá Maromak Jeová nia Liafuan no espíritu santu ajuda ema troka sira-nia moris! Maibé, buat neʼebé halo ita haksolok liu mak ita bele hola parte iha serbisu neʼe hodi estuda Bíblia ho ema neʼebé laʼo ba oin ho diʼak.
2. Saida mak halo ita kontente bainhira ita hanorin lia-loos ba ema?
2 Saida mak Maromak nia naran? Tanbasá mak Maromak husik terus? Saida mak Maromak nia Ukun sei halo ba ema? Ita kontente atu fó resposta ba pergunta sira-neʼe, no ita mós kontente kuandu ita haree estudante Bíblia haksolok tebes bainhira nia aprende lia-loos. (Prov 15:23; Lc 24:32) Nuʼudar estudante laʼo ba oin, karik nia komesa uza Maromak Jeová nia naran, hadiʼa dalan neʼebé nia hatais, la halo tan hahalok neʼebé ladiʼak, no hahú haklaken ba ema seluk. Se nia laʼo ba oin toʼo dedika nia an no hetan batizmu, nia sei sai ita-nia irmaun ka irmán no maluk serbisu-naʼin. Hakat sira-neʼe halo duni ita kontente tebes.—1 Tes 2:19, 20.
3. Ita bele halo saida deʼit atubele hetan estudu Bíblia?
3 Ita bele hola parte? Se ita hakarak hola parte iha serbisu neʼebé halo ita haksolok tebes, husu Maromak Jeová atu ajuda ita halaʼo estudu Bíblia, no halo tuir buat neʼebé ita husu iha orasaun. (1 Joao 5:14) Haklaken iha tempu no fatin neʼebé ita bele hetan ema. Uza oportunidade hotu hodi konvida ema atu estuda Bíblia. (Ecle 11:6) Kuandu ita hasoru ema neʼebé hatudu interese no ita kuda fini lia-loos iha sira-nia laran, halo vizita fali atu rega.—1 Kor 3:6-9.
4. Tansá mak ita tenke uza oportunidade hotu hodi konvida ema atu estuda Bíblia?
4 Sei iha ema barak tan neʼebé hamlaha no hamrook ba justisa. Nuneʼe, sé mak sei ajuda sira atu hatene kona-ba Maromak Jeová? Sé mak sei estuda Bíblia ho sira? (Mt 5:3, 6) Ho laran-haksolok mai ita hola parte iha serbisu haklaken no halo dixípulu antes serbisu neʼe ramata.—Isa 6:8.