Treinu Ita-nia oan sira atu sai haklaken-naʼin
1. Salmo 148:12, 13 fó laran-manas ba inan-aman kristaun atu halo saida?
1 Maromak Jeová konvida labarik no joven sira atu hahiʼi nia. (Sal 148:12, 13) Nuneʼe, inan-aman kristaun hanorin sira-nia oan kona-ba lia-loos husi Bíblia no Maromak nia matadalan kona-ba morál. Maibé inan-aman mós tenke halo buat seluk tan. Sira presiza treinu oan sira atu sai haklaken-naʼin. Oinsá mak ita bele halo ida-neʼe hodi tuir oan nia idade?
2. Oinsá mak inan-aman nia ezemplu diʼak bele book sira-nia oan?
2 Hatudu ezemplu diʼak: Juis Gideão fó-hatene ba ninia soldadu naʼin-300: “Aprende hodi haree haʼu.” (Juíz 7:17) Baibain oan sira haree tuir sira-nia inan-aman. Aman ida serbisu iha kalan, no kuandu fila ba uma iha sábadu dadeer, duké toba deʼit, nia lori ninia oan sira bá haklaken maski nia kole no matan-dukur. Maski nia la hatete ho liafuan, maibé liuhusi nia hahalok, nia hanorin sira katak serbisu haklaken mak buat ida neʼebé importante tebes. (Mat. 6:33) Ita-nia oan sira haree katak Ita kontente atu hola parte iha adorasaun, hanesan halo orasaun, lee Bíblia, fó komentáriu iha reuniaun, no haklaken ka lae? Neʼe la dehan katak ita nunka halo sala. Maibé se ita-nia oan sira haree katak ita hakaʼas an atu serbí Maromak Jeová, ida-neʼe bele book sira atu halo tuir.—Deut 6:6, 7; Rom 2:21, 22.
3. Inan-aman bele ajuda sira-nia oan atu halo planu saida deʼit hodi tuir oan nia idade?
3 Halo planu hodi tuir oan nia idade: Inan-aman sira hakaʼas an atu fó treinu ba sira-nia oan hanesan oinsá laʼo, koʼalia no hatais roupa mesak. Nuʼudar oan sira sai boot, inan-aman ajuda sira atu halo buat seluk tan. Se inan-aman mak ema kristaun, sira mós ajuda sira-nia oan atu halo planu kona-ba laʼo ba oin iha lia-loos. Planu sira-neʼe tenke tuir oan nia idade. (1 Kor 9:26) Ita hanorin ita-nia oan sira atu fó komentáriu iha sira-nia liafuan rasik no atu prepara sira-nia diskursu iha Eskola Serbisu Kristaun ka lae? (Sal 35:18) Ita treinu sira atu haklaken iha dalan oioin ka lae? Ita fó laran-manas ba sira atu hetan batizmu no foti pioneiru ka lae? Ita ajuda ita-nia oan sira atu ransu ho irmaun-irmán neʼebé kontente no laran-manas iha serbisu haklaken ka lae?—Prov. 13:20.
4. Tanbasá mak diʼak ba inan-aman atu komesa treinu sira-nia oan husi kiʼik kedas?
4 Ema neʼebé hakerek salmu ida hatete: “Oh, Maromak, Ita mak hanorin haʼu husi haʼu-nia tempu joven, no toʼo agora haʼu nafatin fó-hatene Ita-nia serbisu sira neʼebé furak tebes.” (Sal 71:17) Komesa atu treinu ita-nia oan sira husi kiʼik kedas atu sai haklaken-naʼin. Ita-nia hakaʼas-an sei sai hanesan hun neʼebé metin, ida-neʼe mós sei ajuda sira kuandu sira sai boot!—Prov. 22:6.