Karta Husi Grupu Administradór

Maluk Testemuña ba Jeová:

Ami kontente tebes atu hakerek karta neʼe ba imi, maluk kristaun sira, neʼebé agora hamutuk naʼin-7.000.000 liu. Baibain kuandu ita hasoru malu ho ita-nia maluk sira husi rai seluk, ita sente katak ita iha ona relasaun besik ho sira. (Joao 13:34, 35) Ami fiar katak imi mós sei sente hanesan neʼe nuʼudar imi lee iha Buku Tahunan 2012, esperiénsia sira kona-ba ita-nia maluk fiar-naʼin husi rai oioin, no oinsá sira hatudu fiar no laran-metin.

Relatóriu sira neʼebé ami simu, hatudu katak imi hakaʼas an atu halo tuir arranju kona-ba Adorasaun Família nian. Inan-aman sira neʼebé iha oan kiʼik, inventa dalan oioin atu halaʼo adorasaun família nian atu halo oan sira gosta. (Ef 6:4) Feen-laʼen nia relasaun nuʼudar kaben-naʼin sai metin liután nuʼudar sira uza tempu hamutuk atu estuda Maromak nia Liafuan. (Ef 5:28-33) Sin, hodi halo tuir arranju kona-ba Adorasaun Família nian, ita ida-idak hetan buat diʼak nuʼudar ita estuda kleʼan Maromak nia Liafuan.—Jos 1:8, 9.

Ami hanoin tebes imi neʼebé terus tanba dezastre naturál sira neʼebé foin akontese daudauk. Ami mós hakarak foti oportunidade ida-neʼe atu fó obrigadu ba irmaun-irmán sira neʼebé prontu atu fó sira-nia an, hodi ajuda irmaun-irmán sira neʼebé sai vítima iha tempu susar sira-neʼe. (Apos 11:28-30; Gal 6:9, 10) Liután neʼe, iha kongregasaun ida-idak, imi haree katak ita-nia irmaun-irmán sira presiza duni ajuda, nuneʼe imi ho hakarak rasik fó ajuda ba sira. Hanesan ho feto ida naran Dorcada iha tempu Bíblia nian, imi mós “halo diʼak barak no fó ezmola barak”. (Apos 9:36) Imi bele fiar katak Jeová haree imi-nia hahalok diʼak neʼe no nia sei haraik bensaun ba imi.—Mt 6:3, 4.

Iha rai balu, ema neʼebé koko atu troka lei, la respeitu imi-nia direitu hodi halo lei balu atu fó susar ba imi. (Sal 94:20-22) Maski nuneʼe, tanba imi hatene katak susar neʼe sei mosu hanesan Jesus fó-hatene nanis, imi ho aten-brani tahan nafatin no buka protesaun husi Jeová. (Joao 15:19, 20) Imi bele fiar katak ami temi beibeik imi iha ami-nia orasaun nuʼudar imi kontinua atu “hatán ba ema neʼebé husu kona-ba imi-nia esperansa”.—1 Ped 3:13-15.

Ami mós hakarak gaba imi, irmaun-irmán sira, tanba imi hakaʼas an atu moos nafatin iha dalan morál, maski Satanás uza dalan oioin atu dada imi atu moris tuir mundu nia hahalok neʼebé foʼer. Ohin loron, ema nia hahalok neʼebé la iha morál sai aat liután, maibé imi buka atu “harii imi-nia kbiit iha . . . Naʼi, husi nia kbiit nia tulun”. (Ef 6:10) Tanba imi “tau hatais funu nian neʼebé Maromak haraik tiha ba imi”, imi bele tahan hasoru “Diabu nia babeur aat hotu”. (Ef 6:11, 12) Hodi hatene katak Jeová uza imi-nia ezemplu diʼak neʼe atu hatán ba ida neʼebé koʼalia aat ba nia, neʼe halo imi kontente.—Prov 27:11.

Ami kontente tebes atu hatene katak iha tinan 2011, ema hamutuk naʼin-19.374.737 tuir Memoriál. Ema barak tuir Memoriál tanba irmaun-irmán barak simu konvite atu foti pioneiru estra iha fulan-Abríl. Tanba imi-nia hakaʼas-an iha fulan-Abríl, ema rihun ba rihun iha mundu tomak bele haree katak ita hamutuk fó glória ba Maromak Jeová ho unidade! (Rom 10:18) Imi naʼin-2.657.377 neʼebé serbí nuʼudar pioneiru estra iha fulan-Abríl, no mós imi neʼebé hakaʼas an atu aumenta serbisu haklaken iha dalan seluk, halo duni ami-nia laran haksolok tanba imi hatudu katak imi laran-manas atu halo serbisu importante neʼe.—Sal 110:3; Kol 3:23.

Iha tinan kotuk, ema naʼin-263.131 hatudu katak sira dedika sira-nia an ba Jeová hodi hetan batizmu. Ami fó-agradese ba Jeová ba ida-neʼe, no ami mós fó obrigadu ba imi tanba imi ajuda ami iha serbisu atu konvida ema seluk atu: “‘Mai.’ Ema hotu neʼebé rona hatán bá: ‘Mai’ . . . ema hotu neʼebé hamrook, mai: ema hotu neʼebé hakarak bele kuru bee moris nian; simu deʼit lalika selu.” (Apok 22:17) Iha ita-nia reuniaun boot ba loron tolu iha tinan 2011, ita aprende buat barak kona-ba Maromak nia Reinu neʼebé ukun daudauk ona. Reuniaun boot neʼe halo ita sai laran-manas liután atu husu Maromak: “Halo Ita-nia Reinu Toʼo Mai Ami.” Ita fiar ba Jesus nia promete neʼebé dehan: “Haʼu sei mai lalais duni.” Tan neʼe, mai ita mós ho laran tomak hatán Jesus nia liafuan neʼe hanesan ho apóstolu João hodi hatete: “Amen; mai, Naʼi Jesus.”—Apok 22:20.

Nuʼudar imi hein ida-neʼe ho matan-moris, la haluha katak ami hadomi tebes imi ida-idak, irmaun-irmán sira, neʼebé hatudu domin ba Jeová ho imi-nia “hahalok no lia-loos”!—1 Joao 3:18.

Imi-nia irmaun sira,

Grupu Administradór husi Testemuña ba Jeová