Haree buat neʼebé diʼak husi ita-nia serbisu makaʼas
1. Saida mak bele hamenus ita-nia laran-manas kona-ba serbisu haklaken?
1 Maromak kria ema atu ‘haree buat neʼebé diʼak husi sira-nia serbisu makaʼas’. (Ecle 2:24) Maibé, kuandu ita la haree buat neʼebé diʼak husi ita-nia serbisu haklaken, ita bele sente laran-tun no la iha haksolok no hamenus ita-nia laran-manas kona-ba serbisu neʼe. Entaun, saida mak bele ajuda ita atu hanoin nafatin buat neʼebé diʼak kona-ba serbisu haklaken?
2. Tanbasá mak ita presiza iha hanoin neʼebé loos kona-ba ema neʼebé ita hasoru iha serbisu haklaken?
2 Hanoin neʼebé loos kona-ba serbisu haklaken: Hanoin-hetan kona-ba Jesus nia serbisu haklaken. Maski ema uitoan deʼit mak rona ba nia, maibé nia bele hetan susesu duni iha serbisu neʼe. (Joao 17:4) Iha Jesus nia ai-knanoik kona-ba ema neʼebé kari fini, nia fó-hatene nanis katak ema barak sei la simu mensajen kona-ba Maromak nia Ukun. (Mt 13:3-8, 18-22) Maski nuneʼe, ita-nia hakaʼas-an sei lori rezultadu barak neʼebé diʼak.
3. Oinsá mak ita bele “fó fuan” maski ema barak la simu mensajen neʼebé ita haklaken?
3 Dalan neʼebé ita fó fuan barak: Iha Jesus nia ai-knanoik, nia dehan katak sira neʼebé simu mensajen sei “fó fuan”. (Mt 13:23) Porezemplu, bainhira trigu-kain ida sai boot, nia fó fuan hodi halo fini barak, laʼós katak kuda fali trigu-kain foun. Entaun, nuʼudar ema kristaun, ita fó fuan iha serbisu haklaken neʼe laʼós kona-ba halo dixípulu foun barak, maibé neʼe kona-ba kari fini lia-loos nian barak liután. Ita halo nuneʼe bainhira ita haklaken beibeik kona-ba Maromak nia Ukun. Ida-neʼe lori buat “diʼak” barak no halo ita sente kontente, maski ema simu ka la simu ita-nia mensajen. Ita hola parte atu halo santu Maromak nia naran Jeová. (Isa 43:10-12; Mt 6:9) Ita kontente ho knaar espesiál nuʼudar Maromak nia serbisu-naʼin. (1 Kor 3:9) No ita-nia “liafuan sira husi ibun” halo Jeová sente kontente tebes.—Ebr 13:15, 16.
4. Maski ita rasik la hatene, rezultadu saida mak ita bele hetan husi serbisu haklaken?
4 No mós, maski ita rasik la hatene, maibé ita-nia serbisu haklaken bele lori rezultadu neʼebé diʼak. Porezemplu, karik ema balu neʼebé rona ba Jesus nia mensajen, la sai ninia dixípulu kedas, maibé depois tiha Jesus mate mak sira foin sai dixípulu. Hanesan neʼe mós ho fini lia-loos nian neʼebé ita kari iha ema nia laran, dala ruma la moris kedas. Maibé, maski ita la hatene karik liu tiha tempu uitoan ema neʼe bele tama lia-loos. Loos duni, ita-nia serbisu haklaken lori buat diʼak barak. Tan neʼe, mai ita nafatin “fó fuan barak” no hatudu katak ita mak Jesus nia dixípulu sira.—Joao 15:8.