Hakaʼas an atu estuda ho ema, maski ita okupadu tebes
1. Tanbasá mak haklaken-naʼin balu dada an atu konvida ema atu estuda Bíblia?
1 Haklaken-naʼin balu dada an atu konvida ema atu estuda Bíblia tanba sira okupadu tebes. Tuir loloos, atu ajuda estudante ida, ita presiza uza tempu barak. Ita presiza tempu atu prepara antes bá estuda, atu halaʼo estudu, no tempu atu ajuda estudante Bíblia atu halo mudansa kona-ba problema ruma iha ninia moris. Apóstolu Paulo hatete katak nia fó ninia moris tomak hodi ajuda nia maluk sira iha Tesalonika atu hatene kona-ba Jeová. (1 Tes 2:7, 8) Entaun, oinsá mak ita bele estuda Bíblia ho ema maski ita okupadu tebes?
2. Tanba domin ba Jeová, oinsá mak ida-neʼe book ita atu uza ita-nia tempu?
2 Presiza tempu atu serbí Jeová: Tuir loloos, ita presiza uza tempu barak atu serbí Jeová. Ita presiza tempu atu tuir reuniaun beibeik, bá haklaken, lee Bíblia, no halo orasaun. Porezemplu, hanoin toʼok kona-ba feen ka laʼen neʼebé okupadu tebes. Maski nuneʼe sira kontente atu uza tempu hodi bele hamutuk ho sira-nia kaben. Hanesan neʼe mós, ita sente kontente hodi bele “uza” tempu atu serbí Jeová tanba ita hadomi nia. (Ef 5:15-17; 1 Joao 5:3) Jesus dehan katak parte importante iha ita-nia adorasaun mak hodi hanorin ema seluk atu sai dixípulu. (Mt 28:19, 20) Hodi hanoin didiʼak kona-ba knaar neʼe sei ajuda ita atu hakaʼas an no halaʼo ita-nia responsabilidade atu estuda Bíblia ho ema seluk.
3. Ita bele halo saida se situasaun ruma hapara ita atu halaʼo estudu Bíblia?
3 Ita bele halo saida se ita-nia serbisu, ka moras todan ka responsabilidade iha kongregasaun hapara ita atu halaʼo estudu Bíblia? Dala ruma haklaken-naʼin balu la bele halaʼo sira-nia estuda tanba sira tenke bá fatin dook. Maski nuneʼe, sira hakaʼas an atu estuda ho sira-nia estudante liuhusi telefone. Haklaken-naʼin seluk neʼebé moras todan husu sira-nia estudante atu mai iha sira-nia uma hodi bele estuda hamutuk. Dala ruma haklaken-naʼin ida bele husu maluk seluk atu halaʼo estudu se sira rasik la bele halo tanba buat ruma akontese.
4. Bensaun saida deʼit mak ita hetan hodi estuda Bíblia ho ema seluk?
4 Apóstolu Paulo sente kontente tebes hodi fó nia tempu no forsa tomak atu ajuda ema seluk aprende kona-ba lia-loos. (Apos 20:35) Kuandu nia hanoin kona-ba ninia maluk sira neʼebé nia ajuda iha Tesalonika, ida-neʼe book nia atu fó-agradese ba Jeová. (1 Tes 1:2) Entaun, maski ita okupadu tebes iha ita-nia moris ita mós bele aumenta ita-nia haksolok iha serbisu haklaken hodi estuda Bíblia ho ema seluk.