Banati-tuir profeta sira—Amós
1. Oinsá mak Amós nia ezemplu bele fó laran-manas mai ita?
1 Dala ruma Ita sente katak Ita la iha matenek atu haklaken tanba Ita la eskola boot ka lae? Se nuneʼe, profeta Amós nia ezemplu bele ajuda Ita. Maski Amós halo deʼit serbisu nuʼudar bibi-atan no koʼa ai-fuan sira iha tempu koʼa nian, maibé Jeová fó knaar ba Amós atu hatoʼo ninia mensajen neʼebé importante. (Amós 1:1; 7:14, 15) Nuneʼe mós, Jeová uza ema neʼebé haraik-an no kbiit-laek atu hatoʼo ninia mensajen ohin loron. (1 Kor 1:27-29) Saida tan mak ita bele aprende husi profeta Amós kona-ba ita-nia serbisu haklaken?
2. Tanbasá mak ita bele laran-metin nafatin maski ema fó-terus mai ita?
2 Laran-metin nafatin maski ema kontra: Kuandu Amós hatoʼo Maromak nia mensajen ba Israel nia suku sanulu, amlulik Amazia rona kona-ba neʼe. Amlulik Amazia adora estátua karau-aman no nia hatán ho hirus ba Amós maizumenus hanesan neʼe: ‘Ó fila uma ona! Husik ami mesak! Ami iha ona relijiaun!’ (Amós 7:12, 13) No mós, Amazia troka fali liafuan neʼebé Amós hatoʼo hodi book Liurai Jeroboão atu bandu Amós nia serbisu. (Amós 7:7-11) Maibé Amós la taʼuk. Ohin loron mós, ulun-naʼin relijiaun balu buka ajuda husi polítiku-naʼin sira atu fó-terus ba Jeová nia povu. Maibé, Jeová fó fiar mai ita katak maski ema uza kroʼat naran deʼit atu hasoru ita, sira sei la hetan susesu.—Isa 54:17.
3. Ohin loron, ita haklaken kona-ba mensajen rua saida?
3 Haklaken Maromak nia tesi-lia no bensaun iha futuru: Maski Amós fó-hatene nanis kona-ba Maromak nia tesi-lia ba Israel nia suku sanulu, maibé nia mós fó-hatene kona-ba Jeová nia promete ba ninia povu, katak Maromak sei simu fali sira no sei fó bensaun barak ba sira. (Amós 9:13-15) Ohin loron, ita mós haklaken kona-ba Maromak nia “loron justisa nian”, maibé ida-neʼe parte ida deʼit husi liafuan diʼak kona-ba Maromak nia Ukun neʼebé ita tenke hatoʼo ba ema. (2 Ped 3:7; Mt 24:14) Sin, iha funu Armagedon, Maromak Jeová sei halakon ema aat hotu, no ida-neʼe sei loke dalan ba ita atu bele moris iha mundu foun neʼebé hanesan jardín Eden.—Sal 37:34.
4. Tanbasá mak ita bele fiar katak ita bele kumpre Jeová nia hakarak?
4 Klaru katak haklaken iha mundu neʼebé ema barak kontra ita koko duni ita-nia laran-metin atu kumpre ita-nia dedikasaun ba Jeová. (Joao 15:19) Maski nuneʼe, ita bele fiar katak Jeová sei kontinua fó mai ita kbiit neʼebé ita presiza atu kumpre ninia hakarak, hanesan nia halo ho Amós.—2 Kor 3:5.