Banati-tuir profeta sira—Oseias
1. Dala ruma ita husu pergunta saida ba ita-nia an?
1 Kuandu ita hanoin Jeová nia laran-luak no laran-sadiʼa, karik ita husu ba ita-nia an: ‘Haʼu prontu atu halo sakrifísiu saida ba Jeová?’ (Salmo [Mazmur] 103:2-4; 116:12) Oseias halo tuir Jeová nia mandamentu maski nia tenke halo sakrifísiu oioin iha ninia moris. Oinsá mak ita bele banati-tuir Oseias nia ezemplu?
2. Oinsá mak ita bele banati-tuir Oseias nia ezemplu diʼak kona-ba haklaken nafatin?
2 Haklaken iha tempu susar: Oseias hatoʼo Maromak nia mensajen liuliu ba nasaun Israel nia suku sanulu neʼebé husik ona adorasaun loos. Liurai Jeroboão II halo buat aat oioin iha Jeová nia haree no kontinua halaʼo adorasaun ba karau-oan, neʼebé Jeroboão I mak hahú. (2 Reis [Raja-Raja] 14:23, 24) Liurai sira seluk neʼebé tuir Jeroboão II mós lakohi adora Jeová, toʼo ikusmai nasaun suku sanulu neʼe lakon iha tinan 740 molok Kristu. Maski Oseias tenke halaʼo ninia knaar iha situasaun hanesan neʼe, nia nafatin serbí nuʼudar profeta ho laran-metin durante tinan 59 ka liu. Ita mós haklaken nafatin ho laran-metin maski ema la rona ka fó-terus ita?—2 Timoteo 4:2.
3. Oinsá mak Oseias fó sai Jeová nia laran-sadiʼa liuhusi ninia moris rasik?
3 Fó sai Jeová nia laran-sadiʼa: Jeová haruka Oseias atu kaben ho “feen neʼebé sei halo sala-foʼer”. (Oséias [Hosea] 1:2) Maski Oseias nia feen Gomer hahoris oan ida ba Oseias, lakleur nia mós iha oan rua husi mane seluk. Maibé Oseias prontu atu fó perdua ba ninia feen hodi fó sai Jeová nia laran-sadiʼa ba ema Israel kuandu sira arrepende an. (Oséias [Hosea] 3:1; Roma 9:22-26) Ita mós prontu atu husik ita rasik nia diʼak hodi fó-hatene Jeová nia laran-sadiʼa ba ema hotu ka lae?—1 Korinto 9:19-23.
4. Irmaun-irmán balu halo sakrifísiu saida deʼit atu serbí Jeová?
4 Jeová nia atan balu aumenta serbisu haklaken hodi husik serbisu neʼebé bele manán osan boot. Balu tan mós klosan nafatin ka la iha oan hodi tau uluk serbisu ba Jeová. Kuandu ita hanoin kona-ba Oseias, karik ita sente: ‘Haʼu la bele halo buat neʼebé nia halo.’ Maski nuneʼe, nuʼudar ita hafolin liután Jeová nia laran-diʼak no hametin liután ita-nia fiar ba espíritu santu nia kbiit, karik Jeová mós sei uza ita iha dalan neʼebé ita uluk nunka hanoin, hanesan Oseias.—Mateus 19:26; Filipe 2:13.