Karta husi Grupu Administradór

Maluk doben sira:

Ami kontente tebes atu hakerek surat ba imi iha tinan neʼe neʼebé espesiál tebes! Iha tinan 2014, Liurai Jesus Kristu nia Ukun halo tinan 100 husi tempu neʼebé nia komesa ukun iha ninia inimigu sira-nia leet.—Salmo (Mazmur) 110:1, 2.

Iha fulan-Outubru, kuandu ita-nia organizasaun halaʼo reuniaun tinan nian, Grupu Administradór fó sai Bíblia Sagrada Tradusaun Mundu Foun neʼebé hadiʼa fali iha lia-inglés. Tradusaun neʼe mak diʼak liu hotu neʼebé ema bele hetan. Iha tempu uluk, maizumenus tinan 60 liubá, Jeová uza ninia oan kose-mina sira atu halo Bíblia Tradusaun Mundu Foun. (Roma 8:15, 16) Ida-neʼe halo tradusaun neʼe espesiál tebes, loos ka lae?

Ba tinan barak ona, Komisaun Hakerek nian tau atensaun liu kona-ba tradús Bíblia ba língua barak. Ohin loron, bele hetan Tradusaun Mundu Foun kompletu ka la kompletu iha língua hamutuk 121. Ami husu ba imi atu hatudu ba Jeová katak imi hafolin duni Bíblia neʼebé imi iha. Lee Bíblia loroloron no hanoin kleʼan kona-ba buat neʼebé imi lee. Se imi halo nuneʼe, imi sei hakbesik liután ba Bíblia nia Hakerek-naʼin, Maromak Jeová.—Tiago 4:8.

Kuandu ita rona kona-ba susar sira neʼebé ita-nia irmaun-irmán sira hasoru, neʼe book ita-nia laran. Dala ruma, sira la bele haksolok hamutuk ho sira-nia irmaun-irmán sira. Porezemplu, foin daudauk família ida iha rai-Ásia hasoru susar boot. Derrepente deʼit inan iha família neʼe moras no isin tomak matek. Doutór sira hotu bilán no la bele kura nia. Neʼe triste tebes! Agora, ninia laʼen presiza tau matan ba nia iha tempu hotu. Sira-nia oan-mane no oan-feto naʼin-rua hatudu ezemplu diʼak nuʼudar ema kristaun hodi apoia sira-nia inan-aman. Família ida-neʼe, no mós imi hotu neʼebé tahan hasoru susar oioin bele sente haksolok tanba imi hamriik metin kuandu imi-nia fiar hetan koko. (Tiago 1:2-4) Jeová nia oan kose-mina sira no mós bibi seluk bele kontente kuandu tahan hasoru susar, tanba ita hatene katak ita sei simu bensaun moris rohan-laek iha futuru!—Tiago 1:12.

Iha tinan kotuk, ema hamutuk naʼin-19.241.252 mak tuir Memoriál. Kapás tebes atu haree ema barak fó hahiʼi ba Jeová no Jesus Kristu hodi tuir reuniaun neʼebé importante liu hotu ba Maromak nia povu! Durante tempu Memoriál, ema rihun ba rihun foti pioneiru estra iha fulan-Marsu no Abríl. Neʼe kapás tebes! No ami fiar imi kontente atu rona katak ema neʼebé foti pioneiru estra durante katuas área nia vizita, bele tuir reuniaun tomak ba pioneiru sira, maski nia la vizita iha fulan-Marsu ka Abríl. Ema neʼebé matan-moris iha dalan espirituál komprende katak importante tebes atu sai okupadu nafatin iha serbisu haklaken no kongregasaun nia atividade sira. Hodi halo nuneʼe, ita bele hamriik metin kuandu Satanás koko atu halakon ita-nia fiar no lori ita ba dalan sala.—1 Korinto 15:58.

Kapás tebes katak durante tinan serbisu nian neʼebé foin liubá, ema naʼin-277.344 hatudu katak sira dedika sira-nia an ba Jeová hodi hetan batizmu, no agora sira laʼo iha dalan ba moris rohan-laek hamutuk ho sira-nia maluk kristaun sira iha mundu tomak. (Mateus 7:13, 14) Ita-nia irmaun-irmán foun sira-neʼe presiza ita-nia ajuda atu “hamriik metin” iha fiar. (Koloso 2:7) Kontinua atu fó laran-manas ba malu atu bele tahan toʼo rohan. (Mateus 24:13) “Fó laran-manas ba sira neʼebé laran-tun, apoia sira neʼebé fraku, hatudu pasiénsia ba ema hotu.” (1 Tesalónika 5:14) Mai ita hotu “halo orasaun beibeik” hodi hatete: “Halo Ita-nia Ukun toʼo mai rai.”—1 Tesalónika 5:17; Mateus 6:10.

Ami hein katak imi sei gosta lee Buku Tahunan 2014. Ami hakarak fó-hatene ba imi hotu neʼebé hadomi Maromak Jeová katak ami hadomi tebes imi!

Imi-nia irmaun sira,

Grupu Administradór husi Testemuña ba Jeová