Aproveita oportunidade oioin hodi habelar Bíblia nia mensajen!
1. David nia ezemplu hanorin ita kona-ba saida?
1 Liurai David nunka husik ninia situasaun hanetik nia hodi halo tuir ninia planu. Porezemplu, nia hakarak tebes atu harii uma ida ba Jeová. Bainhira nia hatene katak harii uma neʼe laʼós ninia knaar, duké loro-loron tuur hanoin tanbasá mak nia la bele halo knaar neʼe, nia buka fali dalan seluk hodi apoia deʼit Salomão hodi harii Maromak nia templu. (1 Reis [Raja-Raja] 8:17-19; 1 Crônicas [Tawarikh] 29:3-9) Oinsá mak ita bele banati-tuir David nia ezemplu hodi buka dalan oioin atu habelar Bíblia nia mensajen?
2. Tanbasá diʼak hodi haree fali ita-nia situasaun?
2 Aproveita ita-nia situasaun: Ema balu halo simples sira-nia moris hodi sira bele foti serbisu pioneiru estra ka pioneiru regulár. (Mateus 6:22, nota-rodapé) Ita bele halo tuir sira ka lae? Halo orasaun hodi haree didiʼak kona-ba ita rasik nia situasaun. Karik ‘Maromak loke hela odamatan boot’ ida ba ita. Se nuneʼe, aproveita oportunidade sira-neʼe!—1 Korinto 16:8, 9.
3. Maski situasaun la permite atu foti pioneiru, ita sei bele aproveita oportunidade saida deʼit hodi haklaken ba ema?
3 Oinsá se ita-nia situasaun moris nian la permite ba ita hodi foti pioneiru? La bele husik situasaun hanesan neʼe taka dalan ba ita hodi buka fali dalan seluk atu haklaken ba ema. Porezemplu, iha serbisu fatin ita sempre iha oportunidade koʼalia hamutuk ho ema seluk. Se ita luta hela ho ita-nia saúde, karik ita mós bele uza oportunidade bainhira ita bá haree doutór ka ema seluk mai vizita ita hodi haklaken ho ema sira-neʼe. Keta haluha mós ita iha arranju ba irmaun-irmán sira neʼebé kusta tebes haklaken tanba idade ona ka moras todan atu hatama deʼit minutu 15. Bainhira hatama relatóriu, ita tenke hakerek hotu buat neʼebé ita halo iha dalan la formál nian, hanesan oras haklaken ka livru ho tratu sira ka konvite sira neʼebé ita fahe ba ema. Karik ita hanoin oras haklaken hanesan neʼe la vale buat ida, maibé se ita soma oras sira-neʼe hamutuk iha fulan ida nia laran, ita sei hakfodak rasik.
4. Ita iha hakarak metin atu halo saida?
4 Ita hotu iha situasaun neʼebé la hanesan, maibé ita hotu bele aproveita oportunidade oioin hodi habelar liafuan diʼak husi Bíblia. Se ita halo duni nuneʼe, ita-nia laran mós sente kmaan tanba ita hatene katak ita hakaʼas an ona hodi halo tuir Maromak nia hakarak.—Marcos 14:8; Lucas 21:2-4.