“Ami labele para atu koʼalia”
1 Jesus Kristu mak tau matan hela serbisu haklaken. (Mateus 28:20; Marcos 13:10) Maski agora ita iha ema naʼin-8.000.000 mak haklaken hela iha rai maizumenus 239, maibé serbisu haklaken seidauk bele para. Se Maromak seidauk hatete katak serbisu neʼe remata ona, ita “labele para atu koʼalia” kona-ba buat sira neʼebé ita aprende.—Apóstolu 4:20.
2 Sadere ba Maromak nia espíritu: Satanás koko makaʼas tebes atu halo ita laran-tun. (Apokalipse 12:17) Ita ema sala-naʼin nia fraku mós bele lori problema oioin mai ita. Buat hirak-neʼe bele halo ita la tau tan atensaun ba serbisu importante haklaken neʼe. Maibé, se ita tau fiar tomak ba Jeová, nia sei ajuda ita tahan hasoru problema sira-neʼe ho ninia espíritu.
3 Bainhira ema fó terus makaʼas ba kongregasaun sira iha apóstolu sira-nia tempu, irmaun sira hasaʼe orasaun ba Maromak hodi ajuda sira bele kontinua haklaken ninia liafuan ho aten-brani nafatin. Jeová hatán sira-nia orasaun hodi fó ninia espíritu ba sira atu sira bele laran-manas nafatin no hamosu hakarak iha sira-nia laran hodi haklaken nafatin. Ikusmai sira mós kontinua la para haklaken liafuan diʼak ho aten-brani.—Apóstolu 4:29, 31; 5:42.
4 Keta husik ema nia liafuan halo taʼuk ita: Ema nia liafuan ka ema koʼalia aat ita mós bele hamenus ita-nia brani atu haklaken ba ema. Maibé sei hanoin-hetan ka lae apóstolu Pedro ho apóstolu sira seluk nia liafuan bainhira sira koʼalia ba Sinédriu iha Apóstolu 5:29-32? Gamaliel mós rekoñese katak serbisu Maromak nian, la iha ema ida mak bele halakon. Neʼe laʼós tanba ita-nia kbiit, maibé tanba Jeová iha ita-nia kotuk mak ita bele kumpre serbisu neʼe!—Zacarias (Zakharia) 4:6.
5 Mai ita hotu buka nafatin Jeová nia espíritu atu ajuda ita kontinua haklaken liafuan diʼak ho laran-manas. Mai ita mós haburas nafatin sentimentu neʼebé hanesan Jeremias nian, neʼe mak liafuan kona-ba Maromak nia Ukun hanesan ahi neʼebé sunu hela deʼit iha ita-nia ruin sira. (Jeremias [Yeremia] 20:9) Atu para la koʼalia tan mós labele!