Karta husi Grupu Administradór

Irmaun-irmán doben sira:

“Ami sempre fó obrigadu ba Maromak kuandu ami temi kona-ba imi hotu iha ami-nia orasaun, basá iha ita-nia Aman Maromak nia oin ami nunka haluha serbisu neʼebé imi halo ho fiar no domin, no oinsá imi tahan susar tanba imi-nia esperansa iha Naʼi Jesus Kristu.” (1 Tesalónika 1:2, 3) Liafuan furak sira-neʼe haleno duni ami-nia sentimentu ba imi! Ami hatoʼo ami-nia agradese ba Jeová tanba imi no imi-nia serbisu sira. Tanbasá?

Tinan kotuk imi halo ona serbisu ho “fiar no domin” ba Maromak nia Ukun. Imi barak aumenta imi-nia serbisu haklaken. Balu muda ba fatin ka nasaun seluk hodi serbí iha rai neʼebé presiza haklaken-naʼin. Balu tan halo haklaken públiku nian. Iha tempu Memoriál, tempu katuas área vizita no iha tempu neʼebé ita halaʼo kampaña espesiál iha fulan-Agostu 2014, imi barak mós foti pioneiru estra. Maski imi ida-idak nia situasaun la hanesan, maibé ami haree duni katak imi hotu hakaʼas an hodi halo Maromak nia serbisu ho laran tomak no tanba ida-neʼe ami gaba tebes imi. (Koloso 3:23, 24) Imi-nia “serbisu neʼebé imi halo ho fiar” mak fó razaun mai ami hakarak hatoʼo ami-nia agradese ba Jeová!

Ami mós agradese tebes ba “serbisu neʼebé imi halo ho . . . . domin” ba konstrusaun sira neʼebé halaʼo daudaun iha mundu tomak. Ita presiza tebes halo konstrusaun sira-neʼe tanba Jeová nia povu aumenta barak tan iha mundu tomak. (Isaías [Yesaya] 60:22) Hanoin toʼok, tinan kotuk deʼit haklaken-naʼin aumenta toʼo 8.201.545. No fulan-fulan ema neʼebé estuda Bíblia ho ita saʼe toʼo 9.499.933. Tanba movimentu neʼe mak ita presiza aumenta luan ka halo foun sukursál sira. Neʼe mós katak ita presiza harii tan Reuniaun-Fatin barak! Iha tempu neʼebé hanesan, ita mós presiza eskritóriu tradusaun iha fatin oioin hodi ema neʼebé tradús bele hela no halo sira-nia serbisu iha área neʼebé ema koʼalia língua neʼe.

Karik neʼe bele book ita atu hanoin, ‘Haʼu bele halo saida hodi fó apoiu ba konstrusaun sira-neʼe?’ Karik ita bele fó ita-nia forsa atu ajuda halo konstrusaun sira-neʼe, ka se ita la iha matenek iha área konstrusaun nian, ita bele kontribui ita-nia orsamentu ba projetu importante sira-neʼe. (Provérbios [Amsal] 3:9, 10) Iha tempu ema Izraél harii tabernákulu, povu nia laran book sira hodi fó sasán barak tebes atu apoia konstrusaun neʼe toʼo sira presiza halo anúnsiu katak sasán toʼo ona, la bele fó tan ona. (Êxodo [Keluaran] 36:5-7) Ita fiar katak ezemplu husi eskritura sira-neʼe book duni ita hotu nia laran, loos ka lae? Imi-nia “serbisu neʼebé imi halo ho . . . domin” ba serbisu sagrada importante neʼe mós razaun ida tan mai ami atu fó agradese ba Jeová!

Ita mós kontente tebes hodi haree katak irmaun barak hamriik metin tebes iha lia-loos. Porezemplu, hahú husi tinan 1950, ema hatama ita-nia irmaun sira iha Koreia-Súl ba komarka tan deʼit irmaun sira-neʼe hakarak mantein neutrál iha buat polítiku nian. Irmaun barak mak hasoru ona susar sira-neʼe, maibé sira hamriik metin nafatin. Sira-nia laran-metin neʼe hametin duni ita hotu nia fiar, loos ka lae?

Iha rai-Eritreia ema sulan ita-nia irmaun naʼin-tolu ba tinan 20 ona. Seluk, hanesan irmán ho sira-nia oan, ema mós hatama sira ba komarka maibé ladún kleur hanesan irmaun sira. Sira koko ona dalan barak atu hasai irmaun sira husi komarka, maibé seidauk iha susesu. Maski nuneʼe mós ita-nia irmaun sira hamriik metin nafatin. Tan deʼit atu laran-metin ba Jeová, sira presiza moris iha terus laran. Ita labele haluha irmaun laran-metin sira hanesan neʼe iha ita-nia orasaun.—Roma 1:8, 9.

Ita balu la presiza hasoru problema hanesan neʼe, maibé karik ita mós hasoru daudaun problema seluk hanesan idade aumenta ba daudaun, problema ho saúde, família ka kaben neʼebé la iha lia-loos kontra ita, ka problema seluk tan. Maski nuneʼe, imi nafatin serbí Jeová ho laran-metin! (Tiago 1:12) Ami gaba tebes imi kona-ba buat sira-neʼe. Neʼe mós razaun ida tan mai ami atu fó-agradese ba Jeová.

Loos duni, serbisu neʼebé imi halo ho fiar no domin, no oinsá imi tahan susar, buat sira-neʼe fó duni razaun mai ami atu “fó agradese ba Jeová, tanba nia mak diʼak”. (Salmo [Mazmur] 106:1) Ami hadomi tebes imi hotu, no ami harohan ba Jeová atu hametin no sustenta nafatin imi-nia fiar, no fó bensaun ba imi atu imi bele serbí nia ba nafatin.

Imi-nia irmaun sira,

Grupu Administradór husi Testemuña ba Jeová