Simu bensaun husi ita-nia Kriadór ba nafatin

Maromak promete ba profeta Abraão katak ninia bei-oan ida sei lori bensaun ba “nasaun sira hotu iha mundu”. (Génesis 22:18) Sé mak bei-oan neʼe?

Maizumenus tinan 2.000 liubá, Maromak fó ba Jesus, neʼebé nuʼudar Abraão nia bei-oan, kbiit boot atu halo milagre sira. Liuhusi milagre sira-neʼe hatudu katak promesa neʼebé Maromak halo ho Abraão sei toʼo ba nasaun sira liuhusi Jesus.—Galásia 3:14.

Milagre sira neʼebé Jesus halo ajuda ema atu haree katak Maromak hili nia atu fó bensaun ba ema, no oinsá mak Maromak sei uza nia atu fó bensaun ba nafatin. Haree toʼok oinsá milagre sira neʼebé Jesus halo hatudu sai ninia hahalok furak sira.

Laran-sadiʼa—Jesus kura ema moras.

Dala ida, ema neʼebé moras-lepra husu Jesus atu kura nia. Jesus kaer nia no dehan: “Haʼu hakarak!” Mane neʼe nia moras-lepra lakon kedas.—Marcos 1:40-42.

Laran-luak—Jesus fó ai-han ba ema neʼebé hamlaha.

Jesus lakohi ema atu hamlaha. Dala rua, nia halo milagre hodi uza deʼit paun fuan balu no ikan balu atu fó han ema rihun ba rihun. (Mateus 14:17-21; 15:32-38) Ema hotu kontente no sei iha hahán resin barak.

Hanoin ema—Jesus halo ema mate moris fali.

Tanba “hanoin tebes” feto-faluk ida, Jesus halo ninia oan-mane moris fali husi mate tanba la iha ema seluk tan mak tau matan ba feto-faluk neʼe.—Lucas 7:12-15.