Matenek-naʼin sira fiar katak Jesus moris duni iha rai ka lae?

Matenek-naʼin sira iha evidénsia oioin atu fiar katak Jesus moris duni iha rai. Kona-ba informasaun husi tempu antigu (maizumenus apóstolu sira-nia tempu toʼo tinan 200 EC) neʼebé temi Jesus no ema Kristaun sira, Encyclopædia Britannica Edisaun 2002 dehan: “Informasaun sira-neʼe hatudu katak iha tempu antigu, ema neʼebé kontra ema Kristaun sira mós la iha dúvida se Jesus moris duni ka lae. Maizumenus besik tinan 1800 toʼo 2000 EC mak ema foin hahú diskute malu kona-ba ida-neʼe maski la iha razaun neʼebé loos.”

Iha tinan 2006, livru Jesus and Archaeology dehan: “La iha matenek-naʼin ohin loron neʼebé duvida katak uluk iha duni ema Judeu ida naran Jesus, neʼebé José nia oan. Sira barak rekoñese katak ohin loron ita hatene ona buat barak kona-ba Jesus nia atividade no hanorin.”

Bíblia hatudu katak Jesus moris duni nuʼudar ema. Bíblia fó sai ninia beiʼala sira no família nia naran. (Mateus 1:1; 13:55) Bíblia mós fó sai ukun-naʼin sira-nia naran iha Jesus nia tempu. (Lucas 3:1, 2) Buat sira-neʼe halo matenek-naʼin sira fiar katak Bíblia hatoʼo informasaun neʼebé loos.