Tanbasá mak Testemuña ba Jeová la diskute malu ho ema neʼebé duun sira?
Ami Testemuña ba Jeová halo tuir Bíblia nia matadalan hodi la diskute malu ho ema neʼebé duun ka goza ami. Porezemplu, Bíblia dehan: “Ema neʼebé korrije ema ulun-toos sei hamoe nia an rasik.” (Provérbios [Amsal] 9:7, 8; 26:4) Entaun, ami gosta liu atu halo Maromak kontente, duké gasta tempu no forsa atu diskute malu ho ema neʼebé duun matak ami.—Salmo (Mazmur) 119:69.
Iha “tempu atu nonook no tempu atu koʼalia”. (Eclesiastes [Pengkhotbah] 3:7) Ami koʼalia ho ema neʼebé hakarak tebes atu hatene lia-loos, maibé ami hasees an husi diskute malu. Hodi halo nuneʼe, ami halo tuir Jesus no ninia dixípulu sira-nia ezemplu.
Jesus la buka atu diskute malu bainhira ema duun matak nia iha Pilatos nia oin. (Mateus 27:11-14; 1 Pedro 2:21-23) Jesus mós la hola lia bainhira ema duun katak nia mak lanu-teen no kaan-teen, maibé ninia hahalok hatudu sai katak ema sira-neʼe nia hanoin mak sala. Jesus rasik hatete: “Liuhusi ema nia hahalok loos mak nia hatudu sai ninia matenek.” (Mateus 11:19) Maibé, iha situasaun seluk neʼebé Jesus presiza duni atu hatán ba ema, nia ho aten-brani hatán ba sira neʼebé hatete aat nia.—Mateus 15:1-3; Marcos 3:22-30.
Jesus hanorin ninia dixípulu atu la sente triste se ema duun matak sira. Nia dehan: “Kontente ba imi kuandu ema koʼalia aat imi no fó-terus ba imi no koʼalia lia-bosok oioin neʼebé aat hasoru imi tanba haʼu.” (Mateus 5:11, 12) Maski nuneʼe, Jesus mós promete atu ajuda ninia dixípulu sira bainhira sira iha oportunidade atu fó sasin ba ema neʼebé duun sira. Nia hatete: “Haʼu sei fó ba imi liafuan no matenek neʼebé imi-nia inimigu sira hotu la bele koʼalia buat ida atu hatán.”—Lucas 21:12-15.
Apóstolu Paulo haruka ema kristaun atu la istori malu ho ema neʼebé kontra sira-nia fiar. Nia dehan katak haksesuk malu mak “saugati deʼit no la lori buat diʼak ida”.—Tito 3:9; Roma 16:17, 18.
Apóstolu Pedro anima ema kristaun atu defende sira-nia fiar se bele. (1 Pedro 3:15) Maibé, nia hatene katak dalan diʼak liu atu fó sasin kona-ba sira-nia fiar mak liuhusi hahalok, laʼós liafuan. Nia hakerek: “Maromak nia hakarak mak atu imi halo buat neʼebé diʼak, hodi nuneʼe imi bele halo lakon liafuan folin-laek husi sira neʼebé beik.”—1 Pedro 2:12-15.