Oinsá atu koʼalia hamutuk ho Ita-nia oan joven

TANSÁ MAK SUSAR?

Kuandu Ita-nia oan sei kiʼik, nia koʼalia ba Ita kona-ba buat hotu. Maibé, kuandu nia sai joven ona, nia la koʼalia tan ba Ita. No kuandu Ita koko atu koʼalia ho nia, nia hatudu katak nia la gosta atu koʼalia ho Ita ka nia hakarak haksesuk malu deʼit ho Ita.

Maibé Ita bele duni koʼalia ho Ita-nia oan joven. Oinsá? Ulukliu, mai ita haree razaun rua tansá mak susar ba Ita atu koʼalia hamutuk ho Ita-nia oan joven.

TANSÁ MAK SUSAR NEʼE MOSU?

Hakarak atu iha liberdade. Ita-nia oan joven sei sai ema boot neʼebé hatene kaer responsabilidade, no hatene oinsá atu hasoru susar neʼebé mosu iha ninia moris rasik. Maibé ida-neʼe sei akontese neineik-neineik, laʼós derrepente deʼit. Dala ruma, maski joven balu nia idade seidauk toʼo atu hetan liberdade barak, maibé sira hakarak ona hetan ida-neʼe. Iha parte seluk, inan-aman balu ladún fó liberdade ba sira-nia oan maski sira-nia oan nia idade toʼo ona atu iha liberdade liután. Ida-neʼe hamosu duni problema entre inan-aman no oan joven sira. Joven ida ho tinan 16, naran Jasona hatete: “Haʼu-nia inan-aman koko atu kontrola buat hotu iha haʼu-nia moris. Se sira la fó liberdade liután ba haʼu kuandu haʼu tinan 18, haʼu sei sai husi uma.”

Matenek atu komprende situasaun. Baibain, labarik kiʼikoan sira hanoin deʼit kona-ba saida mak loos no saida mak sala. Hanoin toʼok kona-ba ezemplu neʼe. Kuandu amá fahe dose ba rua hodi fó ba ninia oan kiʼik naʼin-rua, fasil deʼit ba ninia oan sira atu komprende katak hahalok neʼe mak justisa, tanba sira naʼin-rua simu dose neʼebé fahe hanesan. Maibé joven sira-nia hanoin la hanesan neʼe, sira bele komprende ona kona-ba situasaun. No ida-neʼe importante tebes tanba sei ajuda joven sira atu haburas sira-nia kbiit atu hanoin. Joven sira hatene katak atu halo buat neʼebé loos ka justisa, neʼe la dehan katak Ita sempre hatudu hahalok neʼebé hanesan ba ema hotu. Sin, Ita-nia oan joven bele hanoin rasik kona-ba oinsá atu rezolve susar neʼebé nia hasoru, maibé problema mak nia mós bele haburas hanoin neʼebé la hanesan ho Ita-nian.

SAIDA MAK ITA BELE HALO?

Koʼalia halimar ho Ita-nia oan. Buka tempu atu koʼalia halimar ho Ita-nia oan. Porezemplu, inan-aman balu haree katak kuandu sira koko atu koʼalia ba sira-nia oan joven ho oin ba oin, sira-nia oan lakohi koʼalia nakloke. Maibé kuandu sira halo serbisu ka laʼo hamutuk, tempu hanesan neʼe mak sira-nia oan joven bele koʼalia nakloke.—Matadalan husi Bíblia: Deuteronômio (Ulangan) 6:6, 7.

Lalika koʼalia barak. Kuandu Ita ho Ita-nia oan joven iha hanoin neʼebé la hanesan, Ita lalika haksesuk malu ho nia hodi buka atu manán deʼit. Duké halo nuneʼe, diʼak liu atu Ita koʼalia sai buat neʼebé Ita hakarak no tuirmai la koʼalia barak tan. Maski Ita hanoin Ita-nia oan joven la rona ba buat neʼebé Ita koʼalia, maibé ikusmai nia sei hanoin no komprende buat neʼebé Ita hatete ba nia. Tan neʼe, diʼak liu atu la koʼalia barak hodi bele fó oportunidade ba Ita-nia oan joven atu hanoin kona-ba buat neʼebé Ita hatete ba nia.—Matadalan husi Bíblia: Provérbios (Amsal) 1:1-4.

Rona no prontu atu troka hanoin. Kuandu Ita-nia oan joven fó sai ninia hanoin, rona didiʼak no la koko atu hapara nia koʼalia. Hodi nuneʼe Ita bele hatene ho klaru kona-ba ninia problema. No mós, koko atu la sai toos demais. Se Ita toos demais kona-ba Ita-nia lei sira, Ita-nia oan joven sei koko atu buka dalan atu la halo tuir lei sira-neʼe subasubar. No kuandu Ita-nia oan halo ida-neʼe, neʼe hanesan nia halaʼo ninia moris ho oin-rua. Livru ida (Staying Connected to Your Teenager) hatete: ‘Kuandu labarik halo ida-neʼe, sira sei finje halo tuir sira-nia inan-aman, maibé kuandu inan-aman la haree, sira sei halo sira rasik nia hakarak deʼit.’—Matadalan husi Bíblia: Filipe 4:5.

Kalma nafatin. Joven feto ida naran Kari hatete: “Kuandu haʼu no haʼu-nia amá haksesuk malu, amá sai hirus ho buat hotu neʼebé haʼu koʼalia. Ida-neʼe halo haʼu laran-kanek, no ami komesa istori malu.” Entaun, duké sai hirus kedas, diʼak liu atu dehan buat ruma neʼebé hatudu katak Ita komprende Ita-nia oan joven nia sentimentu. Porezemplu, duké dehan: “Neʼe laʼós problema boot”, diʼak liu dehan: “Haʼu komprende tansá ó sente hanesan neʼe.”—Matadalan husi Bíblia: Provérbios 10:19.

Labele fó-hatene buat neʼebé oan tenke halo, maibé fó matadalan. Bele kompara Ita-nia oan joven nia matenek atu komprende situasaun hanesan isin neʼebé presiza hetan treinu hodi sai forte. Diʼak atu la rezolve kedas kuandu Ita-nia oan hasoru problema ruma, maibé uza oportunidade neʼe atu fó treinu ba nia. Depois koʼalia hamutuk kona-ba problema neʼe no buat neʼebé Ita-nia oan bele halo atu rezolve ida-neʼe, Ita bele dehan ba nia: “Neʼe buat balu deʼit neʼebé ó bele halo. Ó bele hanoin kona-ba buat hirak-neʼe ba loron ida ka rua nia laran, depois neʼe ita sei koʼalia hamutuk fali no fó-hatene ba haʼu kona-ba ó-nia desizaun no tansá mak ó hakarak hili ida-neʼe.”—Matadalan husi Bíblia: Ebreu 5:14.